پرەزيدەنت جۇماعاليەۆ پەن اتامقۇلوۆتى جاڭا قىزمەتكە تاعايىنداۋدىڭ سەبەبىن ءتۇسىندىردى

«مەن بۇل شارۋانى باياعىدا ىسكە اسىرۋدى ويلاستىرعان ەدىم. سەبەبى، سىرتقى ىستەر مينيسترلىگىن تازا ساياسي ۇيىم دەپ ويلايدى. ءبىراق، ءبىز رەسەي دە، قىتاي دا، امەريكا دا ەمەسپىز. بىزدە قايداعى جاھاندىق شارۋالار بولۋى مۇمكىن. الايدا قازىرگى تاڭدا امەريكانىڭ ەلشىلىگى ءوز ەلىنىڭ كومپانيالارىنىڭ مۇددەلەرىن قالاي العا جىلجىتىپ جاتقانىن كورىپ وتىرسىزدار. ءبىر جاعداي تۋىنداي قالسا بىردەن بىزگە كەلەدى. ال بىزدە ونداي جوق. كەرىسىنشە، يندۋستريا، اۋىل شارۋاشىلىعى مينيسترلىگى بولسىن، ءبىز ءار مينيسترلىكتەن ەلشىلىككە كەڭەسشى تاعايىندادىق. اقىرىندا، ولاردىڭ نە ىستەپ جاتقانىن ەشكىم بىلمەيدى. ءار مينيسترلىك ءوز وكىلىن جىبەرۋدە. مىنە، سوندىقتان، سىرتقى ىستەر مينيسترلىگىمەن سىرتقى ەكونوميكالىق بايلانىستاردى رەتتەۋ ماسەلەسى الدىمىزدا باياعىدان تۇرعان ەدى»، - دەدى نۇرسۇلتان نازاربايەۆ.

ەلباسىنىڭ ايتۋىنشا، ينۆەستيسيا مەن ەكسپورتقا قاتىستى ماسەلەلەردى س ءى م قىزمەتكەرلەرى رەتتەۋى كەرەك.

«ولارعا بۇل جۇمىس ىڭعايلى. ولار تىلدەر مەن ەلدەردى بىلەدى. شتاتتاردىڭ ءبارىن دە سولارعا بەرۋدى ءجون سانادىق. 500 ادامعا دەيىن ساندالىپ، نە ىستەرىن بىلمەي جۇرگەنشە، ءبىر ورگاننىڭ وسى شارۋانى باقىلاعانى دۇرىس. سول سەبەپتى، مينيسترلىكتىڭ پروفيلىنە ازداپ وزگەرىس ەنگىزدىك. وسى ەكونوميكانى بىلەتىن ادام كەرەك بولعاندىقتان، ماماندىعى مەتاللۋرگ، مالايزيادا ەلشى، ەۋروپادا كونسۋل بولعان، جان-جاقتى تاراپتى، ەكونوميكانى جاقسى بىلەتىن مينيستر اتامقۇلوۆتى تاعايىندادىق. ياعني، بۇرىنعى مينيستر باسقا جۇمىسقا اۋىسىپ جاتىر. وسىعان بايلانىستى اسقار جۇماعاليەۆ قازاقستان رەسپۋبليكاسى پرەمەر-ءمينيسترىنىڭ ورىنباسارى - قازاقستان رەسپۋبليكاسىنىڭ قورعانىس جانە اەروعارىش ونەركاسىبى ءمينيسترى بولدى. ول بۇرىن عارىش سالاسىندا ىستەگەن. ونىڭ اسكەري ءبىلىمى بار. سايكەسىنشە، ۆيتسە-پرەمەر رەتىندە قورعانىس ونەركاسىبى مەن عارىش سالاسىندا ەڭبەك ەتەتىن بولادى»، - دەدى نۇرسۇلتان نازاربايەۆ.

ەسكە سالا كەتسەك، بۇعان دەيىن مەملەكەت باسشىسى جىل قورىتىندىسى بويىنشا ەلىمىزدىڭ بۇقارالىق اقپارات قۇرالدارى وكىلدەرىمەن كەزدەسكەنىن حابارلاعان بولاتىنبىز.

كەزدەسۋدە نۇرسۇلتان نازاربايەۆ بيىل ەلىمىزدە بولعان ماڭىزدى وقيعالاردى قورىتىندىلاپ، جۋرناليستەردىڭ سۇراقتارىنا جاۋاپ بەردى.

سۇحباتتىڭ تەلەۆيزيالىق نۇسقاسى 2018 -جىلعى 28 -جەلتوقساندا رەسپۋبليكالىق تەلەارنالاردان كورسەتىلەدى.

ايتا كەتسەك، كەشە ق ر پرەزيدەنتى اكىمشىلىگىنىڭ باسشىسى اسەت يسەكەشەۆ ەلىمىزدىڭ سىرتقى ىستەر مينيسترلىگى ۇجىمىنا ۆەدومستۆونىڭ جاڭا باسشىسىن تانىستىرعان ەدى. بۇل لاۋازىمدى قىزمەتكە بەيبىت باكىر ۇلى اتامقۇلوۆ كەلدى.

ال بەيبىت اتامقۇلوۆ باسقارعان قورعانىس جانە اەروعارىش ونەركاسىبى مينيسترلىگىنە قازاقستان رەسپۋبليكاسى پرەمەر-ءمينيسترىنىڭ ورىنباسارى اسقار جۇماعاليەۆ باسشىلىق ەتەتىن بولدى.