كوپ بالالى انا «سۋپەر اجە» اتاندى
سايىسقا 65 جانە ودان جوعارى زەينەتكەرلىك جاستاعى ون اجە قاتىستى. بايقاۋدىڭ ماقساتى - اعا ۇرپاققا قۇرمەت سەزىمىن تاربيەلەۋ، قارت ادامداردى قالا مەن وبلىستىڭ مادەني جانە قوعامدىق ومىرىنە بەلسەندى قاتىسۋعا تارتۋ.
شارانى ۇيىمداستىرۋشى بۇگىندە قارتتار ۇيىندە تۇرىپ جاتقان ءبىرىنشى توپتاعى مۇمىندىگى شەكتەۋلى ۆالەنتينا تولماچيەۆا مۇنداي وي بيىل جازدا الماتىدا امەريكا ەلشىلىگىنىڭ دەمەۋشىلىگىمەن وتكەن حالىقارالىق فەستيۆالگە قاتىسقاندا پايدا بولعانىن ايتادى.
«سول جيىندا ۇلكەندەرگە، اجەلەرگە قالاي قۇرمەت كورسەتىلەتىنى تۋرالى ايتىلدى. بۇدان كەيىن نەلىكتەن بىزدە دە وسىنداي شارالار ۇيىمداستىرماسقا دەگەن وي كەلدى. مىسالى، بىزگە اجەلەر وزدەرى توقىعان زاتتاردى اكەلىپ، ۇنەمى كوڭىل ءبولىپ جاتادى. ال، ولارعا قارتتار كۇنى عانا نازار اۋدارىلادى. سوندىقتان بۇل ويىمدى دوستارىم، ينتەرنات بىردەن قولداپ، دەمەۋشىلەر تابىلدى. ەرىكتىلەر مەن بارلىق كومەك كورسەتكەن جاندارعا ريزاشىلىعىم زور. بۇگىنگى قاتىسۋشىلاردىڭ بارلىعى «سۋپەر اجە» دەگەن اتاۋعا لايىق»، - دەيدى ۆالەنتينا تولماچيەۆا.
بايقاۋ ءتورت كەزەڭ بويىنشا ءوتتى. ءبىرىنشى كەزەڭدە ۇمىتكەرلەردىڭ بالالارى، نەمەرەلەرى ءوزىنىڭ وتباسى مەن وتباسىلىق داستۇرلەرىن، اجەلەرى تۋرالى ايتىپ، بەينەماتەريال ارقىلى تانىستىردى. «بارماقتان بال تامعان» كەزەڭىندە ءاربىر قاتىسۋشىعا نەمەرەلەرى ءۇشىن دايىندالعان اسپازدىق شەبەرلىگىن كورسەتۋ مۇمكىندىگى ۇسىنىلدى. قازىلار القاسى استىڭ ءدامىن، ءتۇرىن جانە وزگەشە ۇسىنىلۋىن باعالادى.
«سەگىز قىرلى، ءبىر سىرلى» كەزەڭىندە قاتىسۋشىلار وزدەرىنىڭ شىعارماشىلىق قابىلەتتەرىن كەز كەلگەن ونەر جانرىندا - ۆوكال، كوركەم ءسوز، اسپاپتا ويناۋ ارقىلى كورسەتتى. «ءسان سالتاناتى» بولىمىندە كەشكى كويلەك ۇلگىسىن كورسەتتى.
«بەس بالانى ءوسىرىپ، جەتكىزىپ، نەمەرە-شوبەرە ءسۇيىپ وتىرمىن. سولاردىڭ تاماعىن جاساپ، مەكتەپكە الىپ بارامىن. بۇگىن ءوز قولىمىزبەن جاساعان جۇمىستاردى كورسەتتىك. ونىڭ ىشىندە توقىما بۇيىمدارى، سۋرەتتەر مەن ءتۇرلى تاعامدار بار. ءوز باسىم قازاقتىڭ ۇلتتىق اسى - بەسبارماق ءپىسىرىپ اكەلدىم. جاسىم 69 دا. انالارعا ارنالعان ءان ورىندادىم. بۇرىن زاۋىتتا اسپازشى بولىپ جۇمىس ىستەگەنمىن. بۇل بايقاۋ تۋرالى ۇلىم ايتىپ، قاتىسۋىمدى ءوتىندى»، - دەيدى باقىت جاراقبايەۆا.
قازىلار القاسىنىڭ شەشىمى بويىنشا باس جۇلدەنى بۇگىندە بەس بالادان سەگىز نەمەرە مەن بەس شوبەرە سۇيگەن شولپان يمانوۆا جەڭىپ الدى.
شاڭىراق قۇرعانىنا 50 جىل تولعان وتباسى التىن تويىن اتاپ وتكەن. وتاناسى 20 جىل زاۋىتتا، كەيىن مادەنيەت بولىمىندە جۇمىس ىستەگەن. زەينەتكەرلىككە شىققاننان كەيىن «زامانداس» حورىنىڭ قاتارىنا قوسىلعان. بۇل وتباسى ءار مەرەكە سايىن داستارحان باسىندا جانە تابيعات اياسىندا باس قوسۋدى داستۇرگە اينالدىرعان.