نۇرسۇلتان نازاربايەۆ «ەلباسى» كينوەپوپەياسىنىڭ «استانا» اتتى فيلمىن تاماشالادى

 استانا. قازاقپارات - ق ر پرەزيدەنتى نۇرسۇلتان نازاربايەۆ ەلوردا جۇرتشىلىعىمەن بىرگە «ەلباسى» كينوەپوپەياسىنىڭ «استانا» اتتى فيلمىن تاماشالادى.

حالىق كوپشىلىكتىڭ نازارىنا بۇگىن عانا ۇسىنىلعان تۋىندى ەلباسىنىڭ شىعارمالارى جەلىسىندە تۇسىرىلگەن، دەپ حابارلايدى قازاقپارات ءتىلشىسى.

فيلم استانانىڭ 20  جىلدىق مەرەيتويىن وتكىزۋ قارساڭىندا اقوردادا ەلباسىنىڭ توراعالىعىمەن وتكەن كەڭەس وتىرىسىمەن باستالىپ، ودان ارى قازاقتىڭ ەلورداسىن الاتاۋ بوكتەرىنەن ارقا تورىنە كوشىرۋ شەشىمى قابىلداعان سىندارلى جىلدارعا ويىسادى. ءيا، قازاقستان پرەزيدەنتىنىڭ استانانى اۋىستىرۋ باستاماسىن سول ۋاقىتتا كوپشىلىك قولداي قويعان جوق. ءتىپتى سول كەزدەگى ەلىمىزدىڭ جوعارى زاڭ شىعارۋشى ورگانى ق ر جوعارعى كەڭەسىنىڭ دەپۋتاتتارى دا ەكىگە جارىلىپ، قولداۋشىلار دا، قارسىلىق تانىتۋشىلار دا تابىلعان ەدى. دەگەنمەن، 1994 -جىلدىڭ 6 - شىلدەسىندە نۇرسۇلتان نازاربايەۆ جوعارعى كەڭەستىڭ جالپى وتىرىسىندا نەلىكتەن قازاق ەلورداسىن كوشىرۋ قاجەتتىگىن دەپۋتاتتارعا بۇلتارتپاس دالەلدەرمەن دايەكتەپ، كەلىسىمىن العانى فيلمدە شىنايى كورسەتىلگەن.

دەپۋتاتتاردىڭ كەلىسىمىن العاننان كەيىن دە اقمولانى ەلىمىزدىڭ باس قالاسىنا اينالدىرۋ جولىنداعى نۇرسۇلتان نازاربايەۆتىڭ جانقيارلىق ەرلىگى اشىپ كورسەتىلگەن. ارقا توسىندە جاڭا شاھار سالۋعا بەلسەنە كىرىسكەن مەملەكەت باسشىسى ۇكىمەت قۇرىلىمدارىنا قاجەتتى عيماراتتار، قىزمەتكەرلەرگە ارنالعان تۇرعىن ۇيلەر سالۋ ىسىندە دە كوپ قيىنشىلىقتاردى باستان كەشەدى. وسى تۇستا جارىنىڭ قينالىپ جۇرگەنىن سەزگەن سارا الپىس قىزىنىڭ ەلوردانى اۋىستىرۋدى كەيىنگە قالدىرا تۇرۋدى وتىنگەنى، وعان نۇرسۇلتان ءابىش ۇلىنىڭ العان بەتتەن قايتپايتىندىعىن ايتا كەلە: «ەندىگى تاعدىرىم جاڭا استانامەن عانا بايلانىستى» دەگەنى وتە ۇتىمدى شىققان.

 

جالپى تاۋەلسىز قازاقستاننىڭ جاڭا تاريحىن قالىپتاستىرۋ، ونىڭ ىشىندە ەلوردامىز استانانى سالۋ جولىنداعى تۇڭعىش پرەزيدەنتىمىزدىڭ ءومىر جولى بەينەلەنگەن فيلمدى استانالىقتار ريزاشىلىقپەن قابىلدادى. وعان فيلم بارىسىندا ەلباسىنىڭ ايتقان ۇتىمدى ويلارىنا كورەرمەننىڭ زور قوشەمەت كورسەتىپ وتىرۋىنان- اق بايقالدى.

 

 باستى رولدەردە مۇرات احمانوۆ، جان بايجانبايەۆ، ولەگ لي، ازات سەيىتمەتوۆ، اسقار ءىلياسوۆ، گۇلنار جاقىپوۆا وينايدى. ق ر مادەنيەت جانە سپورت مينيسترلىگىنىڭ تاپسىرىسىمەن تۋىندىنى قازاقفيلم مەن ساتايفيلم كينوستۋديالارى تۇسىرگەن.