مۇعالىمدى مىندەتىنەن تىس جۇمىسقا تارتقانداردى اكىمشىلىك جاۋاپكەرشىلىككە تارتۋ ۇسىنىلدى

استانا. قازاقپارات - «پەداگوگتار مارتەبەسى تۋرالى» زاڭ جوباسىن دايارلاۋشى جۇمىس توبىنىڭ مۇشەسى، استانا قالاسىنىڭ گۋمانيتارلىق كوللەدجىنىڭ ديرەكتورى ەلدوس نۇرلانوۆ مۇعالىمدەردىڭ مارتەبەسىن قورعايتىن زاڭ جوباسىمەن تانىستىردى، دەپ حابارلايدى قازاقپارات ءتىلشىسى.

«قىرعىز رەسپۋبليكاسى، وزبەكستان، قىتاي جانە وڭتۇستىك كورەيا ەلدەرىندەگى زاڭداردى، ت م د- نىڭ «پەداگوگتار مارتەبەسى تۋرالى» 2004 -جىلعى ۇلگىلىك زاڭ جوباسىن، يۋنەسكو- نىڭ مۇعالىمدەردىڭ جاعدايى تۋرالى ۇسىنىمدارى مەن وزگە دە قۇجاتتاردى زەردەلەي كەلە جۇمىس توبى الدارىڭىزداعى زاڭ جوباسىنىڭ قۇرىلىمىنا توقتالدى. بۇل قۇرىلىم مەملەكەتتىك ورگانداردىڭ قاراۋىنداعى تۇجىرىمدامادا كورسەتىلگەن. زاڭ جوباسى التى ءبولىم مەن 21 باپتان تۇرادى. ءبىرىنشى جانە سوڭعى تاراۋلار ادەتتەگى كىرىسپە جانە قورىتىندى تاراۋلار. ول بارلىق ءنورماتيۆتى- قۇقىقتىق اكتىلەردە بولادى. مارتەبەنى تىكەلەي رەتتەيتىن ءۇش تاراۋ - ەكىنشى، ءۇشىنشى جانە ءتورتىنشىسى»، - دەدى جۇمىس توبىنىڭ مۇشەسى ب ع م- دا وتكەن باسقوسۋدا.

ونىڭ ايتۋىنشا، پەداگوگتار مارتەبەسى جانە ونىڭ پەداگوگتىق قىزمەتى تۋرالى ەكىنشى تاراۋدا ەڭ كوپ باپتار كوزدەلگەن. ولاردىڭ سانى - 8.

«مۇندا مارتەبەنىڭ مازمۇنى، پەداگوگيكالىق قىزمەتپەن شۇعىلدانۋ قۇقىعى، قىزمەت ەتۋ شارتتارى تۋرالى ماسەلەلەر رەگلامەنتتەلەدى. ودان كەيىنگى ەڭ قوماقتى بەس باپتان تۇراتىن ءۇشىنشى تاراۋ - پەداگوگتىڭ قۇقىقتارى. وعان مۇعالىمنىڭ ماتەريالدىق تۇرعىدا قامتاماسىز ەتىلۋى، الەۋمەتتىك كەپىلدىكتەر، اتتەستاتتاۋدىڭ جانە كوتەرمەلەۋدىڭ وزگە دە تۇرلەرىن قامتيدى. قۇقىق مىندەت پەن جاۋاپكەرشىلىكسىز بولمايتىنى تۇسىنىكتى. سوندىقتان، وعان كەلەسى ءتورتىنشى تاراۋ ارنالعان. بۇل جانە باسقا تاراۋلاردىڭ بارلىعىندا ەكى باپتان كوزدەلگەن»، - دەيدى ەلدوس نۇرلانوۆ.

زاڭ جوباسىن ازىرلەۋشى جۇمىس توبىنىڭ مۇشەسى اتاپ وتكەندەي، قولدانىستاعى ء«بىلىم تۋرالى» زاڭدا پەداگوگتىق قىزمەتكە ءتان ەمەس جۇمىس تۇرلەرىنە تىيىم سالىنعان.

«الايدا بۇگىنگى تاڭدا بۇل نورما جۇمىس ىستەمەيدى. نەلىكتەن؟ سەبەبى، جاۋاپكەرشىلىك كوزدەلمەگەن. مىنە، سوندىقتان، تالقىعا ۇسىنىلعان زاڭ جوباسىندا پەداگوگتاردى وسىنداي جۇمىس تۇرلەرىنە تارتقاندار ءۇشىن جاۋاپكەرشىلىك كوزدەلەدى. بۇل نورمانىڭ نەگىزىندە اكىمشىلىك قۇقىقبۇزۋشىلىقتار تۋرالى كودەكسىنە ءبىرقاتار جاۋاپكەرشىلىك تۇرلەرىن ەنگىزۋ جوسپارلانۋدا. ونى بۇزعان لاۋازىم يەلەرى بۇدان بىلايعى ۋاقىتتا كودەكستە كورسەتىلگەن جاۋاپكەرشىلىككە تارتىلاتىن بولادى. جۇمىس توبىنىڭ پىكىرىنشە، مۇنداي جاڭالىق مۇعالىمدەردى پەداگوگتىق ەمەس قىزمەتتەرگە تارتۋ پراكتيكاسىن ازايتۋى ءتيىس»، - دەيدى ەلدوس نۇرلانوۆ.

ەسكە سالا كەتسەك، مەملەكەت باسشىسى نۇرسۇلتان نازاربايەۆ قازاقستان حالقىنا جولداۋىندا 2019 -جىلى قازاقستاندا «پەداگوگتاردىڭ مارتەبەسى» تۋرالى زاڭ قابىلداۋ كەرەكتىگىن ايتقان ەدى.