ەلباسى تۋرالى «الەمگە، عارىشقا، بولاشاققا جول اشقان تۇڭعىش» اتتى كىتاپ جارىق كوردى

كوكشەتاۋ. قازاقپارات - ق ر تۇڭعىش پرەزيدەنتى كۇنى قارساڭىندا كوكشەتاۋدا «الەمگە! عارىشقا! بولاشاققا جول اشقان تۇڭعىش!» اتتى كىتابىنىڭ تۇساۋكەسەرى ءوتتى، دەپ حابارلايدى قازاقپارات ءتىلشىسى وڭىرلىك كوممۋنيكاتسيالار قىزمەتىنە سىلتەمە جاساپ.

كىتاپتىڭ اۆتورى - تانىمال جۋرناليست، دراماتۋرگ، قوعام جانە ساياسات قايراتكەرى، 5-شاقىرىلعان قازاقستان رەسپۋبليكاسى پارلامەنتى سەناتىنىڭ دەپۋتاتى جابال ەرعاليەۆ.

اقمولا وبلىسى اكىمدىگىنىڭ قولداۋىمەن «رۋحاني جاڭعىرۋ» باعدارلاماسىنىڭ اياسىندا جارىق كورگەن كىتاپ قازاقستان رەسپۋبليكاسىنىڭ تۇڭعىش پرەزيدەنتى ن. ءا. نازاربايەۆقا ارنالدى.

بۇل ماڭىزدى وقيعانى جازۋشىمەن بولىسۋگە ونىڭ ارىپتەستەرى، ءوڭىردىڭ شىعارماشىلىق جانە عىلىمي ينتەلليگەنتسيا وكىلدەرى كەلدى.

كىتاپتىڭ اۆتورىن اقمولا وبلىسىنىڭ اكىمى مالىك مىرزاليننىڭ اتىنان ورىنباسارى اينا مىسىرالىموۆا قۇتتىقتاپ، تاۋەلسىز قازاقستاننىڭ تاريحى مەن مەملەكەت باسشىسىنىڭ تاعدىرى - بارلىق حالىقتىڭ تاعدىرى ەكەنىن اتاپ ءوتتى.

«الەمدىك ارەنادا ەلدىڭ بەدەلىنىڭ ءوسۋى، قازاق حالقىنىڭ تاۋەلسىزدىگىنە قول جەتكىزۋ قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان نازاربايەۆتىڭ ەسىمىمەن بايلانىستى»، - دەدى اينا مىسىرالىموۆا.

بارلىعى 488 بەتتىك باسىلىم ءۇش بولىكتەن تۇرادى. ءبىرىنشىسى ج. ەرعاليەۆتىڭ ماقالالارى. ەكىنشى تاراۋدا - مەملەكەت باسشىسى ن. نازاربايەۆتىڭ قاتىسۋىمەن قازىرگى زامانعى قازاقستاننىڭ تاريحىنداعى جارقىن كەزەڭدەردىڭ ءبىرى بەينەلەنگەن. ولاردىڭ ىشىندە ب ۇ ۇ باس اسسامبلەياسىنىڭ سەسسياسىندا، الەمدىك دىندەر سەزدەرىن ۇيىمداستىرۋدا، استاناداعى ە ق ى ۇ سامميتىندە سويلەگەن سوزدەرى بار.

اۆتور ءوز كىتابىندا ەلباسىنىڭ قازاقستان حالقىنا جولداۋىنىڭ ماڭىزدىلىعىن، بيلىكتىڭ الدىندا تۇرعان مىندەتتەردى جانە وسى باعدارلامالىق قۇجاتتى جۇزەگە اسىرۋدىڭ قوعامعا جانە ەكونوميكاعا اكەلەتىن ارتىقشىلىقتارىن كورسەتتى. كىتاپتىڭ ءۇشىنشى ءبولىمى - حالىق پەن ەلباسى تۋرالى ويلار مەن پىكىرلەر.

جابال ەرعاليەۆتىڭ كىتابىنىڭ العاشقى يەگەرى م. جۇمابايەۆ اتىنداعى وبلىستىق امبەباپ عىلىمي كىتاپحانا اتاندى. كىتاپحانانىڭ قورىن اۆتوردىڭ ءوز قولىنان تابىستالعان 20 كىتابى تولىقتىردى.