ءاپسانا: سۇتكە سۋ قوسقان ايەلدىڭ باسىنا كەلگەن بالەكەت

 استانا. قازاقپارات - ەرتەرەكتە ءبىر ايەلدىڭ جالعىز عانا سيىرى بولىپتى.

جالعىز سيىرىنىڭ ءسۇتىن ساۋىپ ءىشىپ، ارتىلعانىن ساتىپ كۇندەلىكتى قاجەت نارسەلەرىن الىپتى.

ءسۇت از شىعاتىندىقتان سۇتكە سۋ قوسىپ كوبەيتىپ كوزبوياۋشىلىق جاسايدى ەكەن. ءسويتىپ ازعا قاناعات ەتپەي، اقشاعا قۇنىعىپ، ارامدىقتى كاسىپكە اينالدىرىپ جۇرە بەرەدى.

كۇندەردىڭ كۇنى قاتتى جەل تۇرىپ، جەر-جەردىڭ ءبارىن سۋ باسادى. وزەن اڭعارلارىنىڭ ءبارى تولىپ جاتقاندا، ءسۇتشى ايەلدىڭ سيىرى تولاسسىز اققان سۋمەن بىرگە اعىپ كەتە بارىپتى.

ءسۇتشى ايەل جالعىز سيىرىنان ايرىلعانىنا قاتتى وكىنىپ، جىلاي-جىلاي ەكى كوزى ءىسىپ كەتەدى. اناسىنىڭ زارلاپ جىلاعانىنا شىداي الماعان كەنجە بالاسى:

- اپا، نەگە سونشا جىلايسىز؟ ءسىزدىڭ قانشاما جىلدان بەرى سۇتكە قوسقان سۋىڭىز سەل بولىپ، اقىرى سيىردى اعىزىپ كەتتى، - دەپتى.

 

دەرەككوزى: حيكمەتتەر قازىناسى كىتابىنان