داۋرەن ابايەۆ: قازاقستان وتە ماڭىزدى كەزەڭگە قادام باسىپ كەلەدى
ق ر اقپارات جانە كوممۋنيكاتسيالار ءمينيسترى داۋرەن ابايەۆ حابار ارناسىنداعى «اشىق ديالوگ» باعدارلاماسىندا ەلباسىنىڭ ماقالاسى تۋرالى وسىلاي پىكىر ءبىلدىردى، دەپ حابارلايدى قازاقپارات.
«قازاقستان تاۋەلسىزدىك العانىنا وتىز جىلداي ۋاقىتقا تاقاپ قالعانىن ۇمىتپاۋ كەرەك. ءبىز وتە جاس مەملەكەتپىز. ءيا، ءبىز نارىقتىق ەكونوميكانىڭ ىرگەسىن كوتەرىپ، الەۋمەتتىك جاۋاپكەرشىلىگى مول مەملەكەتتى قالادىق. ءبىز حالىقارالىق قۇقىقتىڭ مويىندالعان سۋبەكتىسى بولىپ تابىلامىز. سونىمەن قاتار، ءبىزدىڭ حالىق وزىندىك جولىن تابۋدا وتە ماڭىزدى كەزەڭگە قادام باسىپ كەلەدى. ادامنىڭ تاريحي تانىمى - قايداعى ءبىر ستاتيستيكالىق سۋبستانتسيا ەمەس. ول - ءبىزدىڭ وزىندىك تانىمىمىزدى وزگەرتىپ كەلە جاتقان ورگانيكالىق جانە مەنتالدى پروتسەس. ادام ءۇشىن «ءبىز كىمبىز، ءتۇپ تامىرىمىز قايدا؟» دەگەن سۇراق ءاردايىم ماڭىزعا يە بولىپ قالا بەرەدى»، - دەيدى داۋرەن ابايەۆ.
مينيستر تاۋەلسىزدىك العان جىلدان بەرى 28 جىلدىڭ ىشىندە بۇل باعىتتا كوپتەگەن ىلكىمدى ىستەر اتقارىلعانىن تىلگە تيەك ەتتى.
داۋرەن ابايەۆ اتاپ وتكەندەي، وسى ۋاقىتتا قازاقستان جاڭا تاريحتىڭ نەگىزىن قالاپ، تاريحي مۇرالاردىڭ اۋقىمدى بولشەگىن ارشىپ العان. قازاق حاندىعىنىڭ 550 جىلدىعىن تويلاۋ - ءبىزدىڭ مەملەكەتتىلىگىمىزدىڭ ۋاقىت جاعىنان شەكاراسىن كەڭەيتە تۇسكەن.
«وسىنىڭ ءبارى دە ءبىزدىڭ جۇيەدە ءبىلىم مەن تاريحتا، مادەنيەتتە ءوز ورنىن تاۋىپ جاتتى. وسى رەتتە مەملەكەت باسشىسىنىڭ «ۇلى دالانىڭ جەتى قىرى» ماقالاسى - وسىناۋ ۇلكەن پروتسەستىڭ جاڭا مەجەسى بولىپ وتىر. تاريح جايلى ويلانا كەلە نۇرسۇلتان ءابىش ۇلى اۋقىمدى تۇردە ءوزىمىزدىڭ تاريحىمىزعا، جاھاندىق تاريحتىڭ قالىپتاسۋ جولىندا ۇلى دالانىڭ ماڭىزى مەن رولىنە ۇڭىلۋگە شاقىرادى»، - دەيدى مينيستر.
داۋرەن ابايەۆ ءوز سوزىندە اتاپ وتكەندەي، وزىندىك تاريحتى تانىپ ءبىلۋ - ادامنىڭ ەرىك- جىگەرىنىڭ، رۋحىنىڭ مايەگى بولىپ تابىلادى.
«تاريحتى تانىپ ءبىلۋ - ءاربىر ادامنىڭ ەتنوس، ۇلت، ءتىپتى ادامزات تاريحىنداعى ءوز ورنىن ايقىنداپ الۋعا مۇمكىندىك بەرەدى. مەنىڭ ويىمشا، ونى ايقىنداپ الماي ءبىزدىڭ مەملەكەتتىڭ ءىرى جەتىستىكتەرىنە قول جەتكىزۋى مۇمكىن ەمەس. ءبىز ءوزىمىزدىڭ الدىمىزعا الەمنىڭ دامىعان 30 ەلىنىڭ قاتارىنا ەنۋ بويىنشا اسقاق ماقسات قويدىق. ويلانىپ قاراڭىز، قازىرگى تاڭدا قازاقستان ءۇشىن بۇل - تاريحي ميسسيا. ول - ءبىزدىڭ بالالارىمىز، نەمەرەلەرىمىز بەن شوبەرەلەرىمىز قانداي ەلدە تۇراتىنىن انىقتاپ بەرەدى. بۇگىنگى كۇنمەن ءومىر سۇرەتىن ۇلت وسىناۋ اسقاق ماقساتتارعا جەتە الا ما؟ مىنە، سوندىقتان پرەزيدەنت جۇيەلى تۇردە ءبىزدىڭ ەلىمىزدىڭ الەۋمەتتىك- ەكونوميكالىق جانە رۋحاني دامۋىمىزدىڭ بالانسىن رەتتەۋدى جالعاستىرىپ كەلەدى. بۇل رەتتە «ۇلى دالانىڭ جەتى قىرى» ماقالاسى - قوعامدىق سانانى جاڭعىرتۋ تۇرعىسىنان «رۋحاني جاڭعىرۋ» باعدارلاماسىمەن ۇيلەسىم تابادى»، - دەدى داۋرەن ابايەۆ.