رينات زايىتوۆ: قازىر قامشى ءوز ۇلتىنا دەگەن ەشقانداي ماحابباتى جوق بيشارالاردىڭ قولىندا
اقىننىڭ ايتۋىنا قاراعاندا، ايماقتارداعى جاعداي باز-بۇرىنعىشا. ياعني، زايىتوۆتىڭ اتىن ەستىگەن ايتىس ۇيىمداستىرۋشىلارى ودان ات تونىن الا قاشادى.
بۇل تۋرالى ايتىسكەر 31- ارناعا بەرگەن سۇحباتىندا ايتتى.
«وبلىستاعى جاعداي بۇرىنعىداي. اتىمدى ەستىسە، نەعۇرلىم جولاتپاۋعا تىرىسادى. مەن قازىرگى جۇيەنىڭ دۇشپانىمىن دەپ ەسەپتەيمىن ءوزىمدى. سولاي بولۋعا مىندەتتىمىن دەپ ويلايمىن ءوزىم.
بيلىك دەگەن بىرتەكتى ەمەس دەگەن جاڭساق پىكىر، بيلىك دەگەن - جۇيە. ءبىر وزەننىڭ ارناسى سىندى اعىسى بىرەۋ. دەمەك ونىڭ سول اعىستا كەلە جاتقان كەز كەلگەن لاۋازىمدى ادام ول سول جۇيەمەن كەلىسەتىن، سول جۇيەگە جۇمىس ىستەيتىن ادام»، - دەيدى زايىتوۆ.
بۇدان وزگە، ازۋلى اقىن «قازاق حالقى باقىتتى ما؟» دەگەن ساۋالعا جاۋاپ بەردى.
«ءوزىنىڭ مەملەكەتىندە، جەرىندە ءوزىنىڭ قۇقىعى ەكىنشى، ال ءتىلى ءۇشىنشى ورىنعا قويىلاتىن، ءوزىنىڭ ۇلتتىق بولمىسى ونىنشى ورىنعا قويىلاتىن ۇلت باقىتتى ما، باقىتتى ەمەس پە؟ ءسىز قالاي ويلايسىز؟ مەنىڭ تۇسىنىگىمدە، وعان باقىتقا دەيىن ءالى كوپ نارسە كەرەك»، - دەيدى ول.
سۇحبات بارىسىندا رينات قازىرگى ءبىلىم بەرۋ باعدارلاماسى تۋرالى ءسوز قوزعادى. ول بالالارىنا ساباقپەن كومەكتەسە المايتىنىن، سەبەبى قازىرگى باعدارلامانى تۇسىنبەيتىنىن اتاپ ءوتتى.
«وتىرىك ايتپاي-اق قويايىن، بالالارىمنىڭ ساباعىن وقىتا المايمىن، سەبەبى قازىرگى مەكتەپ باعدارلاماسىن تۇسىنبەيمىن. قازىر بالالار 5-سىنىپتا دەنە شىنىقتىرۋدان 5 بەت رەفەرات جازادى. تۇسىنەسىز بە؟ قازىر 2-سىنىپ بالالارى شاكارىم تۋرالى شىعارما جازۋعا ءماجبۇر. ءبىزدىڭ اقىلدى، كەمەڭگەر ءمينيستردىڭ باعدارلاماسى بويىنشا... سوندىقتان قازىرگى بالالارعا ساباق وقىتىپ، كومەكتەسۋ ءۇشىن ءوزىڭ قايتا وقۋىڭ كەرەك شىعار. مۇمكىن سول كەزدە بىردەڭە تۇسىنەتىن شىعارمىن، ءبىراق قايدام»، - دەيدى زايىتوۆ.
وسىدان ءبىراز ۋاقىت بۇرىن قۇلاعىنا سىرعا تاعىپ، شاشىن بويايتىن انشىلەردى سىنعا العان رينات قوعامدا قىزۋ تالقىعا تۇسكەن ەدى. ايتىسكەر ءالى دە وسى ماسەلەگە كەلگەندە جاستاردىڭ بولاشاعىنا الاڭدايتىنىن جاسىرمادى.
«جۇرەگىندە جىگەرى بار قازاقتىڭ جاس جىگىتتەرى بار، قۇدايعا شۇكىر. سولاردى كورگەندە قاتتى قۋانامىن. ەگەر قوعامدى ولارمەن ولشەيتىن بولسام، وندا قازاقتىڭ كورەتىن جارىعى بار ءالى. ال جاڭاعى ءسىز ايتقان ەستراداداعى ءوزىنىڭ ءتىلىن، مادەنيەتىن مەنسىنبەيتىن، ءوزىنىڭ نە بولىپ جاتقانىن، بالاسىنىڭ تاعدىرىنا الاڭداماي، ءبىراق ار جاقتا حابيب پەن ماكگرەگوردىڭ توبەلەسىنە الاڭدايتىنىن كورگەن كەزدە، مەن قاتتى قىنجىلامىن. قازاقتىڭ بولاشاعى ءۇشىن الاڭدايمىن. سولار وركەندەپ، قولىنا بيلىك الىپ كەتكەننەن قاتتى قورقامىن. ويتكەنى سوفى سماتايەۆتىڭ جاقسى ءسوزى بار: «اقىلدىنى باسقارعىڭ كەلسە، اقىماق ادامعا قامشى بەرىپ قوي»، - دەيدى. بولدى باسقا ەشتەڭە ەمەس. ءبىزدىڭ قازىرگى قوعامداعى تىنىستا ونەردە، مادەنيەتتە بولسىن، سپورتتا بولسىن، باسقاسىندا بولسىن، قامشى وڭشەڭ قورقاق، جاعىمپاز، ءوز ۇلتىنا دەگەن ەشقانداي ماحابباتى جوق، ءبىر اۋىز سوزبەن ايتقاندا بيشارالاردىڭ قولىندا»، - دەيدى رينات زايىتوۆ.
سونداي-اق، زايىتوۆ ءوز پىكىرىنشە، ايتىسكەردىڭ ەڭ ۇلكەن تراگەدياسى قانداي بولاتىنىن ايتتى.
«ايتىسكەر اقىننىڭ ەڭ ۇلكەن تراگەدياسى - ەلەنبەي قالۋدا. سەبەبى ول شوۋ-بيزنەستىڭ وكىلى ەمەس، ول ءان ايتپايدى. ءبىر ايتىسكەر اقىننىڭ ويىن ءدال سونداي ەتىپ ەكىنشى ءبىر ايتىسكەر جەتكىزە الادى. ءبىراق جەتكىزۋگە قاقىسى بولماي قالادى، ءبىر اقىن ايتىپ قويعاننان كەيىن. سول ايتىلعان ءبىر اۋىز ءسوزى ەرتەڭ حالىقتىڭ جادىندا قالماسا، ەرتەڭ وسىنداي اقىن بولىپ ەدى دەپ ءبىر ادام ايتپايتىن بولسا، ەڭ ۇلكەن تراگەديا سول»، - دەپ تۇيىندەدى ءسوزىن ول.