پاۆلودار كوشەلەرىنىڭ قانشا پايىزى قازاقشالاندى
بۇل تۋرالى وڭىرلىك كوممۋنيكاتسيالار قىزمەتىندە وتكەن «تىلدەردى قولدانۋ مەن دامىتۋدىڭ مەملەكەتتىك باعدارلاماسىن پاۆلودار وبلىسىندا جۇزەگە اسىرۋ تۋرالى» باسپا ءسوز ءماسليحاتىندا بەلگىلى بولدى، دەپ حابارلايدى pavlodarnews.kz.
وبلىستىق تىلدەردى دامىتۋ باسقارماسىنىڭ باسشىسى ساۋلە وسمانوۆا ايتقانداي، جوعارىدا اتالعان مەملەكەتتىك باعدارلامانىڭ ۇلكەن ءبىر بولىگى ونوماستيكا ماسەلەسىنە قاتىستى.
«بۇل ماسەلە ەلىمىزدىڭ باسقا وڭىرلەرىنە قاراعاندا ءبىزدىڭ ايماقتا كۇردەلى. وڭتۇستىك وڭىرلەردە، ماڭعىستاۋدا ەلدى مەكەندەر مەن كوشەلەردىڭ 90 پايىزى قازاق تىلىندە. تەك قانا پاۆلودار قالاسىن الساق، 333 كوشەنىڭ 22 پايىزى قازاقشا، قالعان 78 پايىزى ورىس تىلىندە بولىپ تۇر»، - دەپ اتاپ ءوتتى ساۋلە وسمانوۆا.
ساۋلە وسمانوۆانىڭ ايتۋىنشا، بۇل باعىتتاعى جۇمىس جۇرگىزىلىپ جاتىر. بىلتىر وبلىس بويىنشا 189 كوشە قايتا اتالدى. بيىل 70 كوشە مەن ەكى اۋداننىڭ اتاۋى قازاقشاعا وزگەرتىلگەن. لەبياجى اۋدانى - اققۋلى، كاچير اۋدانى تەرەڭكول دەپ اتالدى.
«ونىمەن بىرگە، قالامىزدا 99 جىل بويى «لەنين» بولىپ اتالىپ كەلگەن كوشەنى استانا دەپ قايتا اتادىق. ونىڭ ءوزى ۇلكەن جەتىستىك دەپ ويلايمىن. جۋىردا تاعى ەكى كوشەنىڭ اتىن وزگەرتۋ تۋرالى ماسەلەنى وبلىستىق ءماسليحات دەپۋتاتتارىنىڭ قاراۋىنا ۇسىنامىز».
