استانادا وتكەن ونەر فەستيۆالىنىڭ باس جۇلدەسىن قىتايدان كەلگەن قانداسىمىز ولجالادى

استانا. قازاقپارات - شەتەلدىك قانداستارىمىزدىڭ قاتىسۋىمەن وتكەن «قاسيەتتى قازاق ەلى» حالىقارالىق ونەر فەستيۆالى ءوز مارەسىنە جەتتى، دەپ حابارلايدى قازاقپارات ءتىلشىسى.

 ايتۋلى باسەكەگە 10 ەلدەن 50-گە جۋىق ونەرپاز قاتىستى، ونىڭ ىشىندە ءوز ەلىمىزدەن باسقا قىرعىزستان، رەسەي، تۇركيا، وزبەكستان، يران جانە تاعى باسقا مەملەكەتتەردىڭ وكىلدەرى بار.

فەستيۆال ءۇش باعىت بويىنشا ءوتتى جانە ءادىلقازىلار گران- پريدەن بولەك ءار نوميناتسيا بويىنشا 3 جۇلدەلى ورىن مەن ىنتالاندىرۋ سىياقىسىن تاعايىندادى.

«اتالعان فەستيۆال «رۋحاني جاڭعىرۋ» باعدارلاماسى اياسىندا «وتانداستار» قورىنىڭ ەڭ ءبىرىنشى وتكىزىپ جاتقان شاراسى. قور ۇجىمىنا العىس بىلدىرە وتىرىپ، بۇدان ءارى بىرلەسە جۇمىس جاساپ، سىرتتا جۇرگەن اعايىندارعا وسىنداي شارالار ۇيىمداستىرىپ، ورتاق ماقساتتاردى ورىنداۋعا ءبىز ءارقاشاندا دايىنبىز»، - دەدى ق ر قوعامدىق دامۋ ءمينيسترى دارحان كالەتايەۆ.

«قاسيەتتى قازاق ەلى» حالىقارالىق ونەر فەستيۆالىنىڭ جەڭىمپازدارى:

فەستيۆالدىڭ گران- پريى جۇلدەسىن قىتايدان كەلگەن قانداسىمىز جۇماتاي كوكسۋباي ولجالادى. تەرمەشىگە باس جۇلدەنى مينيستر د. كالەتايەۆتىڭ ءوزى تابىستادى.

«تەرمە ونەرى» نوميناتسياسى:

1 - ورىن نۇرجىگىت ەسحات (قىتاي) ؛

2 - ورىن جانعار مامبەتنازاروۆ (وزبەكستان)؛

3 - ورىن ارمان قالەلبەك ۇلى (قازاقستان، استانا)؛

«جىر ءمۇشايراسى» نوميناتسياسى:

1 - ورىن شىناربەك جومارت ۇلى (قازاقستان، تۇركىستان وبلىسى)؛

2 - ورىن نارقۇلان رايحان ۇلى (مونعوليا)؛

3 - ورىن الاش ءتۇرسىنالى ۇلى (قىتاي).

«قولونەر» نوميناتسياسى:

1 - ورىن حابىل قايىپ (مونعوليا)؛

2 - ورىن نارعىز تىنەي (تۇركيا)؛

3 - ورىن ارتىقباي سماعۇلوۆ (رەسەي).

 جەڭىمپازدارعا باس جۇلدەگە 400 مىڭ تەڭگە، 1 - ورىن يەگەرلەرىنە 250 مىڭ تەڭگە، 2 - ورىنعا 150 مىڭ تەڭگە جانە 3 - ورىن جەڭىمپازدارىنا 100 مىڭ تەڭگەدەن تابىستالدى، ودان بولەك، 11 قاتىسۋشىعا ىنتالاندىرۋ سىياقىسى تاعايىندالسا، ولارعا 50 مىڭ تەڭگەدەن بەرىلدى.

استاناداعى ايتۋلى فەستيۆالدىڭ باستالعانى تۋرالى بۇعان دەيىن حابارلاعان بولاتىنبىز. شەتەلدىك وتانداستارىمىزدىڭ ەلوردا تورىنە جينالۋىنا ۇيىتقى بولعان دۇنيەءجۇزى قازاقتارىنىڭ قۇرىلتايى مەن «وتانداستار» قورى. شارا ق ر قوعامدىق دامۋ مينيسترلىگىنىڭ قولداۋىمەن ءوتتى.

اۆتور: داۋلەت ىزتىلەۋ