شىمكەنتتىك بەلگىلى بولجاۋشى بيىلعى قىستىڭ قانداي بولاتىنىن ايتتى

استانا. قازاقپارات - شىمكەنتتىك اۋا رايىن بولجاۋشى نۇرعابىل قوزىباي بيىلعى قىستىڭ قانداي بولاتىنى تۋرالى ايتتى.

ونىڭ سوزىنشە، الداعى قىس ءبىرشاما ۇزاق ءارى قاتاڭداۋ بولادى.

بۇل تۋرالى «زامانا» گازەتى حابارلايدى.

«حالقىمىزدىڭ ومىردەن الىنعان ماقال-ماتەلدەرى بار. ءولى-ارا، توعىس كەزىندە كۇن سۋىتاتىنىن ايتادى. بولجامدارىمدى وسى تابيعات قۇبىلىستارىنا جانە «ەسكى ايدىڭ 20 سى قۇر كەتپەيدى» دەگەن بولجامدارعا سۇيەنىپ جاسادىم. ال قىستىڭ قالاي بولاتىنىن جازداعى وتكەن اپتاپ ىستىقتاردىڭ 6 اي 6 كۇننەن كەيىن سۋىق بولىپ ورالاتىنىمەن ەسەپتەپ الىپ وتىرمىن. جازدىڭ ۇزاق بولعانىن، جىلى كۇندەردىڭ قازان ايىنا دەيىن سوزىلعانىن ەسكەرسەك، قىستىڭ ۇزاقتاۋ بولاتىنى سودان ءبىلىنىپ تۇر»، - دەيدى نۇرعابىل قوزىباي.

سونىمەن قاتار ول الداعى 3 جىلدا ەلىمىزدە قۇرعاقشىلىق بولمايتىنىن ايتتى.

«قازاقتىڭ بۇرىنعى اۋا رايىن بولجاۋشىلارى ىستىق پەن سۋىقتىڭ 6 ايدا اينالىپ كەلەتىنىن بىلگەنى سياقتى قۇرعاقشىلىق جىلداردىڭ دا 4 جىلدا ءبىر اينالىپ سوعاتىنىن اڭعارعان. تابيعات زاڭىنا قۇرىلعان وسى بولجامعا سۇيەنسەك، الداعى 3 جىلدا قۇرعاقشىلىق بولماۋى ءتيىس. ياعني بيىل، 2018-جىلى تۇركىستان وبلىسىنىڭ تاۋلى اۋماقتارىنان باسقا اۋداندارىندا قۇرعاقشىلىق بولدى. ەندى ول 2022-جىلى اينالىپ كەلەدى. دەمەك، الداعى جىلى قۇرعاقشىلىق بولمايدى. ءوڭىرىمىزدىڭ شارۋالارى كۇزدىك ءبيدايدى الاڭسىز ەگە بەرسە بولادى»، - دەيدى اۋا رايىن بولجاۋشى.