اۆتوباندار قىستا نەگە قاۋىپتى

الماتى. قازاقپارات - الماتىدا وتكەن باسپا ءسوز ءماسليحاتى بارىسىندا «قازجول ع ز ي» ا ق پرەزيدەنتى باعدات تەلتايەۆ قازاقستانداعى اۆتوجولداردىڭ احۋالى تۋرالى بايانداپ بەردى، دەپ حابارلايدى قازاقپارات ءتىلشىسى.

«ءبىزدىڭ ينستيتۋت 3 جىل بويى استانا- بۋراباي تاسجولى قۇرىلىسىنىڭ عىلىمي- تەحنيكالىق بازاسىن قامتاماسىز ەتىپ كەلەدى. جاڭا جولداردى توسەۋدە جاڭا تەحنولوگيالار پايدالانىلدى. جوبا 2006 -جىلى قولعا الىنىپ، قۇرىلىس 2008 -جىلى باستالعان ەدى. بۇل تاس جولدىڭ ساپاسى وتە جوعارى. ءبىراق، كوپتەگەن جۇرگىزۋشىلەر جولدىڭ تايعاناقتىعىنا شاعىمدانادى»، - دەدى باعدات تەلتايەۆ.

ونىڭ ايتۋىنشا، بۇل ماسەلەنى وڭتايلى شەشۋ ءۇشىن جولدى تازالاپ تۇراتىن مامانداردىڭ سانىن ارتتىرۋ كەرەك.

«جولدى تەك سالىپ قانا قويماي، ونىڭ جاعدايىن باقىلاۋ كەرەك. ارنايى تازالاۋ تەحنولوگيالارى بار. جول تازالاۋشى ماماندار اۋا رايى بولجامىن الدىن الا قاراپ وتىرۋى قاجەت. جول قىزمەتكەرلەرى جول ۋچاسكەلەرىن ىلعي تازالاپ وتىرۋى ءتيىس. وكىنىشكە وراي، اۆتوجولداردى پايدالانۋ ءۇشىن بەرىلگەن قارجى جەتكىلىكسىز. جول تازالانادى. ءبىراق جەتكىلىكتى ەمەس. ول ءۇشىن قىرۋار قارجى، ماماندار، تەحنيكا كەرەك»، - دەدى ول.

«قازجول ع ز ي» ا ق ماماندارى ايتقانداي، بۇگىندە قازاقستاندا اسفالت-بەتون جابىندىسىمەن 50-گە جۋىق جول ۋچاسكەسى سالىنعان. بۇل جۇمىستاردى جۇرگىزۋ كەزىندە كليماتتىق ەرەكشەلىكتەر ەسكەرىلە وتىرىپ، جاڭا ماتەريالدار مەن تەحنولوگيالار پايدالانىلعان.