قىتايلىق وليمپيادا چەمپيونىنا جول بەرگەن ابزال اجىعاليەۆ «كۇمىس» ەنشىلەدى

استانا. قازاقپارات - كانادانىڭ كالگاري قالاسىندا شورت-ترەكتەن الەم كۋبوگىنىڭ ءبىرىنشى كەزەڭى اياقتالدى.

بۇل سايىستا قازاقستاندىق ابزال اجىعاليەۆ كۇمىس مەدالعا يە بولدى، دەپ حابارلايدى قازاقپارات Olympic.kz سايتىنا سىلتەمە جاساپ.

جاڭا ماۋسىمداعى العاشقى ءىرى حالىقارالىق جارىس قازاقستان كومانداسى ءۇشىن ءساتتى ءوتتى. قازاقستاندىق سپورتشىلار الەمدىك دەڭگەيدە جوعارى ورىندارعا شىعۋعا دايىن ەكەندىكتەرىن كورسەتتى.

وسى تۇستا ابزال اجىعاليەۆتىڭ 500 مەتر قاشىقتىقتا ونەر كورسەتۋىن ەرەكشە اتاۋعا بولادى. ول وليمپيادا چەمپيونى - قىتايلىق داتسزينگە عانا (39.915) جول بەرىپ، كۇمىس مەدالدى جەڭىپ الدى.

ايتا كەتەيىك، ابزال كورسەتكەن 40.136 سەۋندتىق ناتيجە قازاقستاننىڭ جاڭا رەكوردى بولىپ تابىلادى. ال سايىستا ءۇشىنشى ورىندى ۆەنگريادان كەلگەن شاندور ليۋ يەلەندى.

«ماۋسىمنىڭ باستالۋى ءساتتى بولدى. ءبىرىنشى كۇنى جارتىلاي فينالعا دەيىن جەتتىم، ءبىراق وكىنىشكە وراي، مەدال الا المادىم. ءبىرىنشى كەزەڭنىڭ سوڭعى كۇنىندە فينالعا شىعىپ، ەكىنشى ورىن الدىم. اقتىق سىندا وليمپيادانىڭ ءۇش چەمپيونىمەن جۇگىردىم. ماۋسىم ەندى باستالدى، جەڭىستەرىممەن ءالى قۋانتامىن دەپ ۇمىتتەنەمىن»، - دەدى اجىعاليەۆ.

1000 مەتر قاشىقتىقتا باستى فينالعا ەركەبۇلان شامۇحانوۆ شىقتى. ونىڭ قورىتىندى ناتيجەسى - بەسىنشى ورىن. ال فينالعا ەكى ەستافەتالىق كوماندا قاتىستى: ايەلدەر جانە ارالاس كوماندالار. ەكەۋى دە بارلىق قاتىسۋشى قۇرامدار اراسىندا بەسىنشى ورىنعا يە بولدى. ايەلدەر كومانداسىنا اناستاسيا كرەستوۆا، اسەل تايشمانوۆا، ولگا تيحونوۆا جانە يونگ ا كيم ەنگەن. ارالاس قۇرامدا ابزال اجىعاليەۆ، دەنيس نيكيشا، اناستاسيا كرەستوۆا، يونگ ا كيم ونەر كورسەتتى.

الداعى كۇندەرى ا ق ش- تا وتەتىن ەكىنشى كەزەڭگە اجىعاليەۆ قاتىسپايدى. وندا كوماندانىڭ تەك ءبىر بولىگى عانا جول تارتادى. الەم كۋبوگىنىڭ ەكىنشى كەزەڭى 9-11- قاراشادا سولت-لەيك-سيتيدە وتەدى. ال اتالعان الەم كۋبوگىنىڭ ءۇشىنشى كەزەڭى 7-9- جەلتوقساندا الماتىدا ۇيىمداستىرىلادى.