15:01, 05 - قاراشا 2018 | GMT +5
پوليتسيا اسىلىپ قالعان ادامدى بەينەلەمەك بولعان كاسكادەردىڭ ولىمىنە قاتىستى ءىستى تەرگەپ جاتىر
الماتى. قازاقپارات - الماتى پوليتسياسى كاسكادەر قاسىم جۇماعوجيننىڭ ولىمىنە قاتىستى تەرگەۋ جۇمىستارىن باستادى، دەپ حابارلايدى قازاقپارات ءتىلشىسى.
قالالىق پوليتسيا دەپارتامەنتىنىڭ حابارلاۋىنشا، قايعىلى وقيعا 3 - قاراشا كۇنى، حەللوۋين تۇنىندە «ت س ب» تۇنگى كلۋبىندا بولعان.
34 جاستاعى جىگىت اسىلىپ قالعان ادامدى بەينەلەمەك بولعان. قويىلىم بىتكەن سوڭ اكتەردى تۇسىرگەن كەزدە جاعدايى ناشارلاپ كەتكەن. وقيعا ورنىنا جەدەل جاردەم جەتكەنشە كاسكادەر قايتىس بولدى.
«اتالعان وقيعاعا بايلانىستى مەدەۋ اۋداندىق پوليتسيا باسقارماسى تەرگەۋ جۇمىستارىن باستادى. سوتقا دەيىنگى تەرگەۋ اياسىندا سوت- مەديتسينالىق ساراپتاما تاعايىندالدى. اتالعان ساراپتاما ناتيجەسىندە اكتەردىڭ ءولىمى نەدەن بولعانى انىقتالماق. سونىمەن قاتار، پوليتسيا كەشەندى تەرگەۋ جانە جەدەل جۇمىستارىن جۇرگىزىپ جاتىر»، - دەدى قالالىق پوليتسيا دەپارتامەنتىنىڭ باسپا ءسوز قىزمەتىنەن.
اۆتور: گۇلميرا عوسمانالي