قازاقستاندا «باسپانا حيت» باعدارلاماسى بويىنشا قالاي ءۇي الۋعا بولادى

استانا. قازاقپارات - «باسپانا حيت» راسىمەن دە حيتكە اينالدى. «باسپانا» يپوتەكالىق ۇيىمىنىڭ كولل- ورتالىعى كۇن سايىن جۇزدەگەن قوڭىراۋ قابىلدايدى، الەۋمەتتىك جەلىلەر جانە سايتتاعى كەرى بايلانىس ءتۇرى ارقىلى كەلىپ جاتقان سۇراقتار لەگى تولاستار ەمەس.

  «باسپانا حيت» باعدارلاماسى بويىنشا قازاقستاندىقتاردى بارىنشا قىزىقتىرعان سۇراقتاردى ءبىر شولىپ ءوتىپ، يپوتەكالىق ۇيىم باسشىسى قايرات التىنبەكوۆ بار ويىن ءۇش تەزيسكە سيعىزدى.

 جاڭا دا، ەسكى ءۇي دە جارايدى

ءيا، ءدال وسىلاي. «باسپانا حيت» جاڭادان سالىنعان ءۇيدى دە، قولدانىستا بولعان، بۇرىن سالىنعان ءۇيدى دە يەلەنۋگە مۇمكىندىك بەرەدى. بۇل رەتتە ەگەر ءسىز پاتەردى جاڭا سالىنعان ۇيلەر نارىعىنان ساتىپ العىڭىز كەلسە جانە باسىڭىزدا تىركەلگەن ءۇي بولماسا، «7-20-25» باعدارلاماسىنا نازار اۋدارۋعا كەڭەس بەرەر ەدىم. ال اتىڭىزدا ءۇي بولسا، وندا ءسىز «7-20-25-كە» قاتىسا المايسىز.

«باسپانا حيت» باعدارلاماسىندا مۇنداي شارت جوق، مەنشىگىڭىزدە پاتەر بولا تۇرا جاڭا ۇيگە دە، بۇرىن سالىنعان تۇرعىن ۇيگە دە يپوتەكا الۋعا بولادى. «باسپانا حيتتىڭ» جالعىز عانا شەكتەۋى - وتەلمەگەن باسقا يپوتەكالىق كرەديتىڭىز بولماۋى ءتيىس.

كليەنت ءۇشىن پايىز ۇستەمەسى وزگەرمەيدى

قازىر «باسپانا حيت» باعدارلاماسىنىڭ نومينالدى ۇستەمەسى جىلىنا 11 پايىزدى قۇرايدى. ۇستەمە ۇلتتىق بانكىنىڭ بازالىق ستاۆكاسىنا تىكەلەي بايلانىستى، تەك وعان 1,75 پايىز قوسىلادى. بۇگىنگى كۇنى ۇلتتىق بانكىنىڭ بازالىق ستاۆكاسى % 9,25- دى قۇرايدى. دەمەك سوعان % 1,75- دى قوسامىز دا، 11% مولشەرىندەگى قورىتىندى ۇستەمەنى الامىز. مىسالى، ەگەر ەرتەڭ ۇلتتىق بانكتىڭ بازالىق ستاۆكاسى 6 پايىزعا تۇسسە، «باسپانا حيتتىڭ» جىلدىق پايىزى % 7,25- دى قۇرار ەدى.

 مۇنداي جاعدايدا بىزگە مىناداي سۇراقتار كوپ تۇسۋدە، ازاماتتار «باسپانا حيت» بويىنشا كرەديت الىپ قويعاننان كەيىن ونى وتەۋ بارىسىندا جىلدىق ستاۆكا وزگەرىپ كەتپەي مە دەپ الاڭداپ جاتادى. جوق، شارت جاسالعان كەزدە كورسەتىلگەن ستاۆكا سول يپوتەكا تولەنىپ بىتكەنشە وزگەرمەيدى.

«باسپانا حيت» بويىنشا يپوتەكالىق كرەديتتى قايدان الۋعا بولادى

 بۇگىنگى كۇنى ءبىز «باسپانا حيت» باعدارلاماسى بويىنشا ەكىنشى دەڭگەيلى بەس بانكپەن قوسىمشا كەلىسىمگە وتىردىق. ولار «سەسنابانك»، «حالىق بانك»، «بانك سەنتركرەديت»، BankRBK جانە «ەۋرازيالىق بانك». جۋىردا تاعى ەكى بانك قوسىلادى دەپ وتىرمىز. وسىلايشا قازاقستاننىڭ 7 ءىرى بانكى سىزدەرگە «باسپانا حيت» باعدارلاماسى بويىنشا يپوتەكا بەرۋگە دايىن.

www.24.kz