دارىگەرلەر بەدەۋلىك پروبلەماسىن كەشەندى شەشۋدى قولعا الدى

الماتى. قازاقپارات - الماتىدا اۆستريا، ليتۆا، پولشا جانە رەسەيدەن كەلگەن ماماندار بەدەۋلىك ماسەلەسىن شەشۋ ءۇشىن باس قوستى، دەپ حابارلايدى قازاقپارات ءتىلشىسى.

ادامنىڭ رەپرودۋكتيۆتىك دەنساۋلىعى جايىنداعى بۇل فورۋم عىلىمي ۋرولوگيا ورتالىعىنىڭ اكادەميك ب. و. جاربوسىنوۆتى ەسكە الۋعا وراي ۇيىمداستىرىلىپ وتىر.

ءبىر ايتا كەتەرلىگى، اتالعان جيىنعا بالا سۇيە الماي جۇرگەن وتباسىلاردىڭ ماسەلەسىن شەشۋ ءۇشىن تەك قانا ۋرولوگ پەن گينەكولوگتار عانا ەمەس، ەندوكرينولوگ، گەنەتيك، پسيحولوگ سياقتى ماماندار جينالدى.

 «ءبىرىنشى رەت بۇل پروبلەمانى كەشەندى تۇردە شەشۋدى قولعا الىپ وتىرمىز. بۇعان دەيىن رەپرودۋكتيۆتى دەنساۋلىق تەك گينەكولوگ پەن ۋرولوگتاردىڭ ماسەلەسى بولىپ كەلسە، ەندىگى كەزەكتە ونى گەنەتيك، ەندوكرينولوگ، پسيحولوگ سياقتى ماماندار مۋلتيديستسيپلينارلى تۇردە شەشەدى. نەگىزىنەن بەدەۋلىكتىڭ فاكتورلارى از ەمەس. ونىڭ ءبىرى ەكولوگيا، ادامنىڭ قوزعالىسسىز ءومىر ءسۇرۋ سالتى، كەش ۇيلەنۋ، ءوزىن- ءوزى شەكتەۋ دەگەن سياقتى سەبەپتەرى كوپ. وسىلاردىڭ باسىن بىرىكتىرىپ، دارىگەرلەر ورتاق نۇسقاۋلىق جاساماقشى. بۇل قۇجات كەيىن ازاماتتارىمىزدىڭ رەپرودۋكتيۆتى دەنساۋلىعىن ساقتاۋعا سەپتىگىن تيگىزەتىن باعىت بولماق» ، - دەدى «ب. و. جاربوسىنوۆ اتىنداعى ۋرولوگيا عىلىمي ورتالىعى» ا ق باسقارما ءتوراعاسى، مەديتسينا عىلىمدارىنىڭ دوكتورى ءانۋار امانوۆ.

ونىڭ ايتۋىنشا، بۇگىن ورتالىق شەڭبەرىندە ليتۆالىق دارىگەرلەر توبى 2 شەبەرلىك سىنىبىن وتكىزدى.

سونىمەن قاتار، كونفەرەنتسيا كەزىندە 3 لاپوروسكوپيالىق وتانىڭ تىكەلەي ترنانسلياتسياسى جۇرگىزىلدى.

ونىڭ بىرىندە رەسەيلىك بەلگىلى دارىگەر ەدۋارد گاللياموۆ ەر ادامنىڭ قۋىقاستى بەزىنىڭ ادەنوماسىن الۋ بويىنشا وتا جاسادى. وسىلايشا وتاندىق دارىگەرلەر راديكالدى پروستاتەكتوميا ءادىسىن ونلاين رەجىمدە ۇيرەندى.

ودان بولەك داعىستان استاناسى ماحاچكالا قالاسىمەن تىكەلەي تەلەموست ۇيىمداستىرىلىپ، رەسەيدىڭ جەتەكشى ۋرولوگى الەكسەي مارتوۆتىڭ وتاسى دا تىكەلەي ەفيردەن كورسەتىلدى.

ايتا كەتۋ كەرەك، جاربوسىنوۆ اتىنداعى ۋرولوگيا ورتالىعىندا جىل سايىن 5 مىڭعا جۋىق وتا جاسالادى.

مامانداردىڭ ايتۋىنشا، قازاقستاندا جاس وتباسىلاردىڭ 15 پايىزى بالا سۇيە المايدى. ستاتيستيكا بويىنشا، ءاربىر التىنشى ەرلى- زايىپتى بالا كوتەرۋدە قيىندىقتاردى باستان وتكەرەدى.

كۇردەلى دەموگرافيالىق جاعدايدى رەتتەۋ - قازاقستاننىڭ زاماناۋي مەملەكەتتىك الەۋمەتتىك ساياساتىنىڭ باستى مىندەتتەرىنىڭ ءبىرى. «قازاقستان-2030» ستراتەگياسىندا قر پرەزيدەنتى نۇرسۇلتان نازاربايەۆ ۇلتتىق قاۋىپسىزدىكتىڭ باسىم باعىتتارىنىڭ قاتارىنا كۇشتى دەموگرافيالىق ساياساتتى ەنگىزۋ قاجەتتىگىن باسا ايتتى.

 ەۋروپالىق ۋرولوگتار قاۋىمداستىعى دەرەكتەرىنە ساي، قازاقستاندا وتباسىلىق جۇپتاردىڭ 25 پايىزى ەرلى- زايىپتىلىق ءومىردىڭ ءبىرىنشى جىلىندا بالا كوتەرمەيدى. ولاردىڭ 15 پايىزى بەدەۋلىككە قارسى ەمدەلسە، ال 5 پايىزى بالاسىز قالادى. ءاربىر التىنشى جۇپ بالا كوتەرۋدە قيىندىقتارعا تاپ بولادى. «بەدەۋلىككە جۇپتاردىڭ بىرەۋىنىڭ نەمەسە ەرلى- زايىپتىلاردىڭ ەكەۋىنىڭ دە رەپرودۋكتيۆتىك قىزمەتىنىڭ بۇزىلۋى سەبەپ بولۋى مۇمكىن. بۇرىن بالاسىزدىق ماسەلەسىنە ايەلدەردىڭ بەدەۋلىگى سەبەپ دەپ ەسەپتەلىپ كەلسە، بۇگىندە مامانداردىڭ پىكىرىنشە، وسىنداي جاعدايلاردىڭ 45 پايىزىن ەركەكتەردىڭ فاكتورى قۇراپ وتىر. سوڭعى جىلدارى الەمدە ەر ادامداردىڭ رەپرودۋكتيۆتىك دەنساۋلىعى ايتارلىقتاي تومەندەپ بارادى. وعان ەكولوگيانىڭ ناشارلىعى، قوزعالىسسىز ۇزاق ۋاقىت وتىرۋ، ۇنەمى شارشاعاندىق سەزىمى، كەش نەكە قۇرۋ، رەتسىز جىنىستىق قاتىناس، ءوز بەتىنشە ەمدەلۋ ىقپال ەتىپ وتىر. ال، ەرلەردىڭ بەلسىزدىگىنىڭ سەبەپتەرى كوپ. ايەلدەردىڭ رەپرودۋكتيۆتىك دەنساۋلىعى الاڭداۋشىلىق تۋدىرىپ وتىر.

 اتالعان فورۋمدا ەرلەر مەن ايەلدەردىڭ رەپرودۋكتيۆتىك دەنساۋلىعىن قورعاۋ بويىنشا ماماندار مەن ماماندىقتاردىڭ ءپانارالىق سيمبيوزىنا، سونىمەن بىرگە مەديتسينالىق قىزمەت كورسەتۋدىڭ ساپاسىن ارتتىرۋعا جول اشىلدى. حالىقارالىق ماماندار: ۆەنا ۋرولوگيالىق قورىنىڭ پروفەسسورى بوب دجاۆان، پولشادان كەلگەن پروفەسسور مارەك زاۆادسكي ەر ادامدارعا كومەكشى رەپرودۋكتيۆتىك تەحنولوگيالاردى قولدانۋ، ەرلەردىڭ بەلسىزدىگىنە زەرتحانالىق دياگنوستيكا جۇرگىزۋدىڭ گەنەتيكالىق اسپەكتىلەرى مەن جاڭاشىلدىعى، ۋرولوگيادا ءدارى- دارمەكتىك تەراپياعا قول جەتكىزۋ، قۋىقاستى بەزى ادەنوماسىن ەمدەۋ يننوۆاتسياسى، زاماناۋي شاعىن ينۆازيالىق ۋرولوگيا، پلاستيكالىق ۋرولوگيا تاقىرىبىنداعى تاجىريبەلەرىمەن ءبولىستى.