تۇركىستان وبلىسىنداعى كيەلى كەسەنەنىڭ تىلسىم كۇشتەرى تۋرالى نە بىلەمىز؟
شىراقشىنىڭ ايتۋىنشا، حاسان حان اتانعان اۋليە قوجا احمەت ياسساۋيدىڭ زامانداسى بولىپ، ونىڭ جانازاسىن دا شىعارعان ەكەن.
بۇگىندە قاسيەتتى ورىنعا اينالعان قارابۋرا كەسەنەسىنە كەلۋشىلەر كوپ. شەتەلدىكتەردىڭ قىزىعۋشىلىعىن تۋدىرعان كيەلى ورىن تىلسىم كۇشتەرىمەن تانىمال. بۇل تۋرالى zynqala.kz سايتى جازادى.
شىراقشىنىڭ ايتۋىنشا، قارابۋرا اۋليەنىڭ كەسەنەسىنە قازاقستاننان بولەك قىرعىزستاننان، وزبەكستاننان، رەسەيدەن، ءتىپتى، گەرمانيا مەن ۆەنگريادان كەلۋشىلەر كوپ ەكەن. 1997-جىلى جاڭارتىلعان قاسيەتتى ورىندا جۇرت دەرتىنەن ايىعۋعا، ءسابي سۇيۋگە نيەت ەتەدى.
سەيفوللا ومىربەكوۆ جۇرتتى سىرقاتىنان ەمدەيتىن كەسەنەدە ادام تاڭ قالارلىق وقيعالار كوپ بولاتىنىن ايتادى. شىراقشى وسى ۋاقىتقا دەيىن بولعان ءبىر-ەكى جاعدايدى دا بايانداپ بەردى.
سولاردىڭ ءبىرى قازىرگى زيارات بۇرىنعى كۇزەتشسىنىڭ باسىنان وتكەن. كيەلى ورىنعا نيەت ەتىپ كەلگەن ادامداردىڭ ءبىرى قابىر باسىنا اق ماتا جاۋىپ كەتىپتى. پەندەشىلىككە سالىنعان كۇزەتشى بۇل سىيلىقتى ۇيىنە الىپ كەتكەن كورىنەدى.
الايدا ۇيىنە بارىپ، شىرق ۇيقىعا كەتكەن ازامات «باستىرىلىپ»، ەسىكتەن تۇيە كىرىپ كەلگەنىن بايقاپتى. وسى كەزدە ەكى وركەشتى جانۋار ازاماتتى قىلقىندىرىپ، «وسى ارەكەتىڭ ءۇشىن اللا الدىندا جاۋاپ بەرەتىن بولاسىڭ»، - دەپ ايتقان ەكەن.
كەلەسى كۇنى شوشىنعان كۇزەتشى اق ماتاعا تاعى بىرەۋىن قوسىپ اكەلىپ، ەندى ەشتەڭە المايتىنىن ايتىپتى. ءتىپتى، ول بۇل وقيعادان كەيىن قۇران وقىتىپ، قۇربان شالعان كورىنەدى.
ومىربەكوۆ كەسەنەگە كەلگەن ءبىر زاتتى دا ۇيگە الىپ كەتپەيتىنىن جەتكىزدى.
«زيارات ەتۋشىلەر جاشىككە نە كەسەنە ىشىندەگى تالدىڭ استىنا اقشا تاستاپ كەتەدى. ءتىپتى كەيدە ءبىز قۇران وقىساق، قولىمىزعا اقشا ۇستاتادى. ءبىراق ونى ءوز قالتامىزعا سالمايمىز. نەگە دەيسىز عوي؟ ەگەر الاتىن بولساق، ءوزىم نە بالالارىم اۋىرىپ شىعادى»، - دەيدى ول.
حالىقتىڭ دەرتى مەن ونىڭ ەمىنە بايلانىستى تىلسىم وقيعا جەزقازعان تۇرعىندارى كەلگەندە ورىن العان. ول ۋاقىتتا ءبىر توپ ادام اراسىندا بەس-التى جىل بۇرىن بۇكىر بولىپ قالعان ازامات پەن قوستانايلىق ەمشى بولعان ەكەن.
الىستان ات تەرلەتىپ كەلگەن نيەت ەتۋشىلەر كەسەنە ماڭىنداعى ۇيگە جايعاسىپتى. ءبىر كەزدە ەمشى ايەل جاعىلىپ تۇرعان پەشتەگى وتتى كوسەۋمەن الىپ، ءتىلىن تيگىزىپ، بۇكىر ازاماتقا ءۇش رەت تۇكىرىپ جىبەرگەن ەكەن. سودان كەيىن ۇيدە ءۇش كۇن تۇنەگەن ازامات ورنىنان تۇرىپ كەتكەن كورىنەدى.
شىراقشى مۇنداي عاجايىپ وقيعالاردىڭ وتە كوپ ەكەنىن جەتكىزدى. ول كەسەنەدە بارلىعىن تەگىن ەمدەيتىنىن، كيەلى ورىندا جىل سايىن اس بەرىلەتىنىن تىلگە تيەك ەتتى.