استانالىقتارعا ءبىر اي بويى ارزان ەت، كوكونىس ساتىلادى

استانا. قازاقپارات - ەلوردادا ءبىر اي بويى «التىن كۇز» الەۋمەتتىك ازىق-تۇلىك جارمەڭكەسى وتەدى، دەپ حابارلايدى قازاقپارات اكىمدىكتىڭ سايتىنا سىلتەمە جاساپ.

«الاي» بولشەك-تاراتۋشى ورتالىعىنىڭ عيماراتىندا ءبىر اي بويى تۇرعىندار ونىمدەردى تىكەلەي تاۋار وندىرۋشىلەردىڭ وزىنەن ساتىپ الا الادى.

پاۆلودار جانە اقمولا وبلىسىنىڭ شارۋا قوجالىقتارى جارمەڭكەگە ەت پەن ءسۇت ونىمدەرىن، سونداي-اق جەمىس-جيدەك، كوكونىس پەن ءداندى-داقىل ونىمدەرىن ۇسىنادى.

جارمەڭكەدە قوي ەتىنىڭ كەلىسى - 1230 تەڭگەدەن، جىلقى ەتىنىڭ كەلىسى - 1400 تەڭگەدەن ساتىلادى دەپ كۇتىلۋدە. الەۋمەتتىك جارمەڭكەدە كارتوپتىڭ ءبىر كەلىسىنىڭ قۇنى 55 تەڭگە بولادى.

قازىرگى تاڭدا پاۆلودار وبلىسىنان ساتۋ ءۇشىن 150 توننا كارتوپ، اقمولا وبلىسىنان 30 توننا سيىر ەتى، 7 توننا قوي ەتى جەتكىزىلدى.

اقمولالىق وندىرۋشىلەر سيىر ەتىنىڭ كەلىسىن 1300 تەڭگەدەن، قوي ەتىنىڭ كەلىسىن 1250 تەڭگەدەن ساتپاق.

بۇدان باسقا، جارمەڭكە قوناقتارى كونديتەرلىك، ماكارون ونىمدەرى مەن بال ساتىپ الا الادى.

ۇيىمداستىرۋشىلار، ونىمدەر باعاسىنىڭ نارىقتاعى باعالاردان %5-10  تومەن بولاتىنىن ايتادى.