ايكەزبە دەرت پە؟

ايكەزبە دەرتىن ايدىڭ تولۋىمەن، ونىڭ جەرگە اسەرىنىڭ ارتۋىمەن بايلانىستىرادى. دەگەنمەن، مەديتسينادا بۇنى جاي عانا اڭىز رەتىندە قابىلدايدى. سومنامبۋليزم دەرتى الەمدەگى ەڭ ءجيى تارالعان دەرتتەردىڭ قاتارىنا جاتادى. الەم حالقىنىڭ %2,5 ايكەزبەگە شالدىققان. ايكەزبە بەلگىلەرى ءجيى قايتالاناتىن بولسا، دارىگەردىڭ كومەگىنە سۇيەنگەن دۇرىس. ويتكەنى، ەپيلەپسيا دەرتىنىڭ دە بەلگىسى ايكەزبەلىككە ۇقسايدى. ال، سيرەك كەزدەسسە ۋايىمداۋدىڭ قاجەتى جوق. بەلگىلەرى:

 • ايكەزبەلەر ۇيىقتاپ جاتىپ ورنىنان تۇرادى جانە سويلەيدى. ولار قيمىلداپ، اڭگىمە ايتا باستاۋى مۇمكىن. سىرتتاي ول وياۋ سەكىلدى كورىنگەنىمەن، ونىڭ قيمىلدارى باياۋ ءارى ءبىرقالىپتى بولادى. كوزدەرى اشىق بولعانىنا قاراماستان، ولار ەشنارسەنى قابىلدامايدى، ەستىمەيدى.

 • ايكەزبەنى ۇيقىسىنان وياتۋ مۇمكىن ەمەس. مۇنداي جاعدايلار اپتاسىنا ءبىر- ەكى رەت قايتالانىپ تۇرادى.

 • بارلىق ايكەزبەلەر جۇرە بەرمەيدى. كەرۋەتىنەن كوتەرىلىپ، ءبىر ورىندا وتىراتىندار دا بار. ال، كەيبىرى، كەرىسىنشە، ەسىكتى اشىپ سىرتقا شىعادى. ءتىپتى، كولىكتى وتالدىرعان جاعدايلار دا كەزدەسكەن. ايكەزبە ۇستاماسى ۇزاققا سوزىلمايدى: نەبارى ءبىر عانا ساعاتتى الادى. ايكەزبەلەر ءجيى ورنىنا ورالىپ، قايتا ۇيىقتاپ قالا الادى. تەك تاڭەرتەڭگىسىن ەشنارسە ەسىندە بولمايدى. ونىڭ نەگىزگى سەبەپتەرى قانداي؟ كوپ ادام ايكەزبەلىك پسيحيكانىڭ بۇزىلۋىنان تۋىندايدى دەگەن قاتە پىكىردە. شىندىعىندا، ول جۇيكە جۇيەسىنىڭ بۇزىلۋىمەن بايلانىستى. ايكەزبە ءجيى بالالار مەن جاسوسپىرىمدەردە كەزدەسەدى. ال، ەرەسەكتەردە كەزدەسۋ مۇمكىندىگى 1000 ادامنىڭ ىشىندە 1 گە تەڭ.

بۇل ماسەلە تەك سەزىمتال ادامداردا كەزدەسەدى. ولاردىڭ ميىندا قوزدىرعىش تۇيىندەر ءجيى كەزدەسەدى. ايكەزبەگە شالدىققان ادام تولىق تەكسەرىستەن ءوتۋ ءۇشىن دارىگەردىڭ كومەگىنە سۇيەنگەن ءجون. كەيدە ونداي ادامداردىڭ دياگنوزى -  ساماي بولىگىندە قالىپتاساتىن ەپيلەپتيكالىق ءتۇيىننىڭ قالىپتاسۋىمەن بايلانىستىرادى. ياعني، ەپيلەپسيا دەرتىنىڭ باستاپقى دەڭگەيى بولۋى مۇمكىن. مۇنداي ادام سىرتقى ورتاعا تۇيىق ءارى سالماقتى ادامنىڭ اسەرىن قالدىرادى. ال، شىندىعىندا ولار وتە سەزىمتال كەلەدى.

 • ودان بولەك، ادام تەمپەراتۋراسىنىڭ كوتەرىلۋى دە ايكەزبەنىڭ تۋىنداۋىنا الىپ كەلەدى. ءبىراق، ول ءبىر رەتتىك جاعداي.

 • الەمدە ايكەزبەگە شالدىققان %15 عا جۋىق بالا بار. ولار پسيحيكيلىق تۇرعىدان ساۋ. ۋاقىت وتە ايكەزبە وزدىگىنەن جوعالادى.

 • سونىمەن قاتار، ايكەزبەلىكتىڭ تۇقىم قۋالايتىنى دالەلدەنگەن. ەگەر، سومنامبۋليزممەن اتا- انانىڭ ەكەۋى اۋىرعان بولسا، بالانىڭ دا ايكەزبەگە شالدىعۋ مۇمكىندىگى جوعارى. قانشالىقتى قاۋىپتى؟

ايكەزبەنىڭ دەنساۋلىققا توندىرەتىن قاۋىپ جوق. دەگەنمەن، ايكەزبە ءوز ىسىنە جاۋاپ بەرمەيتىندىكتەن ءتۇرلى جاراقاتتار الۋى ابدەن مۇمكىن. بىرەۋلەر دالاعا شىعىپ كەتەدى، ەندى ءبىرى تەرەزەدەن شىعامىن دەپ قۇلاۋى دا مۇمكىن. كەيبىرەۋى شاتىرعا دا شىعادى. باستىسى، ايكەزبەنى ۇيقىسىنان وياتۋعا بولمايدى. ول ونى قاتتى قورقىتىپ الۋى مۇمكىن. ودان بولەك، پسيحولوگيلىق قاۋىپ توندىرەدى.

Massaget.kz