كوپ بالالى وتباسى قاتەرلى ىسىكتەن قورعالادى

 استانا. قازاقپارات - كوپ بالا تاربيەلەنەتىن وتباسىدا قاتەرلى ىسىكپەن سيرەك اۋىرادى. تەك اناسى عانا ەمەس، سونىمەن قاتار كوپ بالالى وتباسىنىڭ بارلىق مۇشەلەرى ونكولوگيالىق اۋرۋلاردان قورعالادى.

سيۋريح ۋنيۆەرسيتەتىنىڭ جانە ادەلايدا مەديتسينالىق مەكتەبىنىڭ ماماندارى وسىنداي شەشىمگە كەلدى. ولار 178 ەل بويىنشا اۋقىمدى ستاتيستيكا جۇرگىزىپ، مىناداي زاڭدىلىق بايقاعان: وتباسى قانشالىقتى كىشكەنتاي بولسا، قاتەرلى ىسىكپەن اۋىرۋ قاۋپى سونشالىقتى جوعارى. اۋقاتتىلىق، ءبىلىم دەڭگەيى، ءومىر سۇرەتىن جەرى سىندى فاكتورلار بۇل جاعدايدا قاۋىپ دەڭگەيىنە اسەر ەتپەيدى. زەرتتەۋ بارىسىندا تاعى دا قىزىقتى زاڭدىلىق پايدا بولدى: ەگەر كوپ بالالى وتباسىمەن بىرگە تۋىستارى (ءجيى كەزدەسەتىن جاعداي -  اتا- اجەسىمەن بىرگە تۇرۋ) بىرگە تۇرسا، پايدالى اسەر ولارعا دا تارالادى. سونىڭ ىشىندە، بۇل «قورعانىش» ايەلدەرگە قاراعاندا ەركەكتەرگە كوبىرەك اسەر ەتەدى. عالىمداردىڭ ايتۋىنشا، كوپ بالالى ۇيدە تۇرۋ مي، قۋىق، وكپە، اسقازان، ومىراۋ، انالىق بەز ىسىگى قاۋىپتەرىن ازايتادى. وتباسى -  پوزيتيۆ كوزى ۇلكەن وتباسىنىڭ قۇپياسى نەدە؟ ونىڭ قۇپياسى ءتىپتى، ونكولوگيالىق اۋرۋلارمەن دە كۇرەسە الاتىن پوزيتيۆتى سەزىمدەردە جاتىر.

 ادام وتباسىنىڭ ورتاسىندا ءجۇرىپ، مىڭداعان جىلدار بويى قورشاعان ورتانىڭ كەدەرگىلەرىنە قارسى تۇرىپ، بەيىمدەلىپ كەلە جاتىر. مۇنداي قۇرىلىم ءبىزدى اۋرۋلاردان قورعايتىن ەموتسيالىق قالقان رەتىندە قىزمەت ەتىپ كەلەدى. ارينە، وتباسىلىق ومىردە دە ۋايىم- قايعى بولىپ تۇرادى. كوپ بالالى وتباسى بولعاندىقتان، كۇيزەلىس، ءتىپتى، ءجيى بولۋى دا مۇمكىن. ءبىراق جالپى ەموتسيالىق تۇرعىدا قاراساق، پوزيتيۆتى ءارى يگىلىكتى ساتتەر كوبىرەك بولادى. نەگىزگى ۋاقىتىن وتباسىعا ارنايتىن ايەلدەرگە كوپ بالالى بولۋ ءتۇرلى ىسىك تۇرلەرىنەن قورعايدى:

 - 10 نەمەسە ودان دا كوپ بالالى بولعان ايەلدەردە ءسۇت بەزى ىسىگىنىڭ جانە رەپرودۋكتيۆتى ورگانداردىڭ قاۋپى %25 عا تومەندەيدى؛

- ەگەر ايەل كوپ بالالى بولۋىمەن قاتار تۇڭعىشىن 20 جاسقا دەيىن بوسانسا، ونىڭ ومىراۋ ىسىگىنىڭ قاۋپى 30 جاستان كەيىن بوسانعاندارعا قاراعاندا ەكى ەسە تومەن بولادى؛

 - كوپ بالالى ايەلدەردە تەرى، قۋىق جانە قالقانشا بەزى اۋرۋلارى سيرەك كەزدەسەدى.

Massaget.kz