بالاباقشا تاربيەشىلەرىن جۇمىسقا قابىلداۋ ءتارتىبى وزگەردى

استانا. قازاقپارات - بالاباقشا تاربيەشىلەرى اتتەستاتسيالاۋدان وتۋگە مۇمكىندىك الادى.

بۇل تۋرالى بۇگىن ق ر پارلامەنتى سەناتىنىڭ دەپۋتاتتارىمەن كەزدەسكەن ءبىلىم جانە عىلىم ءمينيسترى ەرلان ساعاديەۆ ايتتى، دەپ حابارلايدى قازاقپارات ءتىلشىسى.

«مينيسترلىك بالاباقشاعا ماماندار تارتۋ ءۇشىن بىرنەشە شارا قابىلداۋدا. بىرىنشىدەن اۋىلداعى بالاباقشا مەڭگەرۋشىلەرىن جۇمىسقا قابىلداۋدا ەڭبەك ءوتىلى 6 دان 3 جىلعا دەيىن قىسقاردى. بۇل دا ۇلكەن ماسەلەنىڭ ءبىرى بولعان. ەكىنشىدەن، پەداگوگتەردى قولداۋ ءۇشىن «ءبىلىم تۋرالى» زاڭنىڭ 51-بابىنا وزگەرىستەر ەنگىزىلۋدە. ەندىگى ۋاقىتتا بالاباقشاعا جۇمىسقا مەكتەپكە دەيىنگى ماماندىق بويىنشا ەمەس پەداگوگيكالىق ءبىلىمى بار ماماندار قابىلداناتىن بولادى.

ونىڭ ايتۋىنشا، ۇشىنشىدەن، وسى ۋاقىتقا دەيىن مەكتەپكە دەيىنگى ماماندىعى جوق تاربيەشىلەر كاتەگوريا الۋ ءۇشىن اتتەستاتسيادان وتە المايتىن. ەندى اتتەستاتسيالاۋ ەرەجەسىنە وزگەرىستەر ەنگىزىلىپ، پەداگوگيكالىق ءبىلىمى بار بارلىق تاربيەشىلەر اتتەستاتسيالاۋدان وتەدى.

«ول ءۇشىن قىسقا مەرزىمدى كۋرستار ەنگىزىپ وتىرمىز. كۋرستار جەتكىلىكتى»، - دەدى ەرلان ساعاديەۆ.