سينوپتيكتەر ەل ايماقتارىندا ۇسكىرىك اياز بولاتىنىن ەسكەرتتى

استانا. قازاقپارات - سينوپتيكتەر ەلىمىزدە سوڭعى كۇندەرى ساقتالعان جىلى تەمپەراتۋرا ەندى سۋىق كۇندەرگە ۇلاساتىنىن ەسكەرتىپ وتىر.

رەسپۋبليكانىڭ باسىم بولىگىندە قار ارالاس جاڭبىر جاۋىپ، سالدارىنان كوكتايعاق بولۋى دا مۇمكىن دەپ حابارلايدى Sputnik قازاقستان.

«قازگيدرومەت» ورتالىعىنىڭ ينجەنەر-سينوپتيگى اينۇر قايىڭبايەۆانىڭ سوزىنە سۇيەنسەك، رەسەيدىڭ ورتالىعىنان قازاقستاننىڭ سولتۇستىك ايماعىنا قاراي جىلجىعان سيكلون اسەرىنەن جاۋىن-شاشىندى كۇندەر باستالادى.

مامان وڭتۇستىك ءوڭىر مەن وڭتۇستىك-شىعىستا سوڭى قارعا ۇلاساتىن جاڭبىر جاۋاتىنىن ايتىپ وتىر. «ال تاۋلى ايماقتار مەن تاۋ بوكتەرىندەگى اۋدانداردا 31- قازان، 1- قاراشا كۇندەرى جاۋىن-شاشىن قاتتى جاۋادى»، - دەيدى ول.

باس قالادا جاڭبىر سوڭى قارعا ۇلاسىپ، 15-20 م/س جىلدامدىقپەن جەل تۇرۋى مۇمكىن. كەلەر ايدىڭ باسىندا كۇندىز 1-3، تۇنگى ۋاقىتتا مينۋس 7-9 گرادۋسقا دەيىن اياز بولادى دەپ كۇتىلۋدە.