يليا يلين سپورتپەن قوشتاسا ما: باس باپكەردىڭ جاۋابى

استانا. قازاقپارات - جاراقاتىنا بايلانىستى اشحابادتاعى الەم چەمپيوناتىنا قاتىسا الماعان قازاقستاندىق اۋىر اتلەت، الەمنىڭ ءتورت دۇركىن چەمپيونى يليا يلين ۇلكەن سپورتپەن قوشتاسا ما؟

قازاقپارات ءتىلشىسىنىڭ وسى سۇراعىنا اۋىر اتلەتيكادان قازاقستان ۇلتتىق قۇراماسىنىڭ باس باپكەرى يۋري مەلنيكوۆ جاۋاپ بەردى.

«ءيا، راسىمەن دە، يليا يلين بۇل ستارتقا - 2018-جىلعى الەم چەمپيوناتىنا قاتىسپايدى. ونىڭ ەسكى جاراقاتى سىر بەردى، سوندىقتان وعان قانداي دا ءبىر اۋىر جۇكتەمەلەرگە تىيىم سالىنعان. سوعان قاراماستان، سپورتشى كوماندامىزدى قولداۋ ءۇشىن اشحابادقا كەلدى»، - دەدى يۋري مەلنيكوۆ.

باس باپكەردىڭ ايتۋىنشا، يليا يلين وليمپيادالىق ليتسەنزيا ءۇشىن الداعى ۋاقىتتا دا سىنعا تۇسە الادى. ماسەلەن، كەلەسى جىلدىڭ ءساۋىر ايىندا ازيا چەمپيوناتى وتەدى. «ول جارىسقا يليا دا قاتىسا الادى»، - دەيدى يۋري مەلنيكوۆ.

ايتا كەتسەك، بۇقارالىق اقپارات قۇرالدارى اۋىر اتلەت يليا يليننىڭ تۇرىكمەنستان استاناسىندا وتەتىن 2018-جىلعى الەم چەمپيوناتىنا قاتىسپايتىنىن جازعان ەدى. Sport.kz سايتىنا سۇحبات بەرگەن سپورتشىنىڭ ءوزى ومىرتقاسىنداعى جاراقاتىنا بايلانىستى بۇل چەمپيوناتقا بارمايتىنىن ايتتى.

«شىنىن ايتسام، ارى قارايعى سپورتتىق مانسابىمنىڭ ءوزى ۇلكەن سۇراققا اينالىپ تۇر»، - دەگەن ەدى يليا يلين.

ەسكە سالايىق، ءبىر اي بۇرىن بيىلعى الەم چەمپيوناتىنا قاتىساتىن ق ر قۇراماسىنىڭ قۇرامى جاريالانعان ەدى. تىزىمدە دوپينگپەن بايلانىستى جاعدايدان سوڭ جارىستاردان شەتتەتىلگەن يليا يلين مەن ءزۇلفيا چينشانلو دا بار بولاتىن.