وسكەمەن جۇرتىنىڭ ۇرەيىن ۇشىرعان تىلسىم ورىنداردى بىلەسىز بە؟
جانتۇرشىگەرلىك وقيعالاردى قۇلاقتارى شالعان جۇرتشىلىق قازىر تىلسىمعا تولى مەكەندەرگە اياق باسۋعا دا جۇرەكسىنەدى ەكەن. وڭىردەگى قورقىنىشتى جەرلەر تۋرالى التاينيۋس باسىلىمى جازادى.
1. ەرتىس كوپىرى
جالپى ەرتىس وزەنىنىڭ ماڭايىندا ءولىم-ءجىتىم كوپ بولادى ەكەن. بۇل ايماقتا كۇندىز قايناعان تىرشىلىك ورناعانىمەن، تۇندە ادامدار اياق باسپاۋعا تىرىساتىن كورىنەدى. سەبەبى، مۇندا ءوز-وزىنە قول جۇمساپ، ومىرىمەن قوش ايتىساتىنداردىڭ سانى كوپ دەسەدى.
ءتىپتى، كەيبىر جۇرتتار بۇل ورىن وزىنە جامان ەنەرگيا تارتىپ، كۇيزەلىسكە ۇشىراعان ادامداردى شاقىرادى دەگەن سەنىم دە قالىپتاستىرعان.
ولار سۋ تەرەڭ بولماسا دا، وزەن تۇبىندە ۇشكىر تاستاردىڭ كوپ ەكەندىگىن، بيىك كوپىردەن قۇلاعان ادام امان قالمايتىنىن ايتادى.
كوپىر ماڭى تۋرالى وربىگەن اڭگىمەلەردىڭ شىن-وتىرىگى بەلگىسىز. سولاردىڭ ءبىرى 2015-جىلى بولعان وقيعاعا قاتىستى ايتىلعان.
سول جىلى وزەن قاسىنان ءوتىپ بارا جاتقان قالا تۇرعىنى 40 گرادۋس سۋىقتا جەڭىل كيىممەن تەرىس قاراپ تۇرعان جاس جىگىتتى كورگەنىن ايتادى.
ونىڭ سوزىنشە، بەلگىسىز ازاماتتىڭ جالت ەتىپ قاراعان كوزقاراسى دەنەنى مۇزداتىپ جىبەرگەن ەكەن.
ەڭ قورقىنىشتىسى، ارتىمدا ادام تۇر ما دەپ ويلاپ، ءبىر رەت كەرى بۇرىلعان تۇرعىن قايتا اينالعاندا ورىمدەي جىگىتتى تاپپاي قالىپتى.
ءبىر سەكۋندتا عايىپ بولعان ازامات وزەنگە دە قۇلاماعان كورىنەدى. سەبەبى، تۇرعىن سول ۋاقىتتا سۋدىڭ بەتىنە مۇز قاتىپ، قۇلاعان ادامنىڭ ءىزى دە كورىنبەگەنىن جەتكىزگەن.
2. وسكەمەن-زىريان تاس جولى
بۇل تاس جولدا جىلدىڭ قاي مەزگىلىندە بولسا دا جول اپاتى كوپ ورىن الادى. تۇرعىندار ءتىپتى تۇندە دە جول ماڭايىنان ءوتۋ مۇمكىن ەمەس ەكەندىگىن ايتادى.
ۇرەيلەنگەن جۇرگىزۋشىلەر بۇل ايماقتان ەش جولاۋشىنى مىنگىزبەيتىنىن، تاس جولدا قىزدىڭ ەلەسىن كورەتىندەرىن دە جەتكىزگەن.
ال حالىق اۋزىنداعى حيكاياعا سەنسەك، بۇرىندارى وسكەمەن مەن زىرياننىڭ اراسىن قوسقان بۇل جولدا جاس جىگىت ءوز سۇيىكتىسىن ءولتىرىپ، تاستاپ كەتىپتى.
سودان بەرى ارۋدىڭ دەنەسى تىنىش تاپپاي، اجال قۇشتىرعان ازاماتتى ىزدەيتىن كورىنەدى.
3. «يۋبيلەينىي» كينوتەاترىنىڭ ماڭىنداعى ءۇي
وسكەمەن تۇرعىندارى «يۋبيلەينىي» كينوتەاترىنىڭ ماڭىندا ورنالاسقان پاتەردەن قاتتى قورقاتىندارىن ايتادى. ول ۇيگە سۇرگى سالىنعانىمەن، جۇرتشىلىق ءالى كۇنگە دەيىن پاتەردەن ءتۇرلى دىبىستار شىعاتىنىن جەتكىزىپتى.
بۇل تىلسىم ورىننىڭ ۇرەيلى ەكەنىن بىرنەشە جىل بۇرىن تۇرعان جالعىزباستى ايەل دە راستاعان ەكەن.
«رۋدنىي التاي» گازەتىندە جاريالانعان ماقالادا كەلىنشەكتىڭ پاتەردە جالعىز تۇرعانى ايتىلعان. قازىر ول ۇيدەن كوشىپ كەتكەن كەلىنشەك ۇيقىعا جاتار تۇستا بولمەدەن كۇلگەن بالانىڭ داۋسىن ەستىگەنىن جەتكىزىپتى.
ونىڭ سوزىنشە، ءبۇلدىرشىنىڭ سىلدىرلاعان كۇلكىسى ساعاتتان شىعىپ تۇرعان. ءوزىن شارشادى دەپ ويلاپ، بۇل وقيعاعا ءمان بەرمەگەن كەلىنشەك قايتادان ۇيىقتاۋعا تىرىسقان.
الايدا سول مەزەتتە توسەك جاسىندا اجەسى مەن كىشكەنتاي بالا اڭگىمەلەسە باستاعان كورىنەدى. بالاقاي مەن اجەسى توسەكتە جاتقان كىم ەكەنىن سۇراپ، ءبىرازدان سوڭ كەلىنشەكتى ۇيدەن قۋا باستاپتى.
ارتىنشا قالا تۇرعىندارى بۇل پاتەردە 20-30 جىل بۇرىن اجەسى، قىزى مەن نەمەرەسى گازدان ۋلانىپ قايتىس بولعانىن ايتقان ەكەن.
ءۇي تۇرعىندارىنىڭ سوزىنشە، ولاردىڭ رۋحى بۇگىنگى كۇنگە دەيىن تىنىش تاپپاي، پاتەرگە ادام جاقىنداتپايتىن كورىنەدى.
4. جامبىل اتىنداعى ساياباق
جامبىل ساياباعىن حالىق كوپ باراتىن ورىن عانا ەمەس، ۇرەيگە تولى تىلسىم مەكەن دەپ ايتۋعا بولادى. سەبەبى، كوپتى كورگەن اقساقالدار بۇل الاڭدا ادامداردىڭ سۇيەگى جاتقانىن جەتكىزگەن ەكەن.
راسىمەن، قازىر تۇرعىندار كوڭىل كوتەرىپ جۇرگەن ورىندا وتكەن عاسىردىڭ 50-60-جىلدارى ادامداردىڭ سۇيەكتەرى تابىلىپتى. ءتىپتى، 90-جىلدارى وسى جەردە كوپ توبەلەس بولىپ، كوپتەگەن ازاماتتىڭ قانى توگىلگەن دەسەدى.
ساياباق ماڭىنداعى ۇيلەردە تۇراتىن تۇرعىندار دا تىلسىم دۇنيەلەردىڭ كوپ ورىن الاتىنىن ايتادى.
مىسالى بىرنەشە جىل بۇرىن ءبىر تۇرعىن ءوز تەرەزەسىنەن سەكىرىپ ءولىپتى. الايدا ىشىمدىك ىشپەگەن، كۇيزەلىستە جۇرمەگەن جاننىڭ بۇل ارەكەتكە نە ءۇشىن بارعانى تۇسىنىكسىز دەيدى حالىق.
ءدال وسىنداي جاعداي ەكى جىل بۇرىن تاعى دا قايتالانعان. بۇل جولى قارت ايەل ءۇي پودەزىندە اسىلىپ قالعان ەكەن. جۇرتتىڭ ۇرەيىن ۇشىرعان بۇل ەكى ءولىمنىڭ سەبەپتەرى ءالى كۇنگە دەيىن جۇمباق بولىپ قالا بەرمەك.
ودان بولەك، تۇرعىندار ساياباق ماڭىنداعى ۇيلەردە جارىق پەن سۋ كوپ وشەتىنىن ايتىپ، شاعىمدانعان ەكەن.
بۇل قورقىنىشتى ورىندار ءبىزدىڭ الەمنەن باسقا دا تىلسىم ءومىردىڭ بار ەكەندىگىن بايقاتاتىن سىڭايلى.