عالامتور ارقىلى ءبىلىم الۋدىڭ كەمشىلىكتەرى

 استانا. قازاقپارات - قاشىقتان ءبىلىم الۋدىڭ بولاشاعى ونىڭ قولجەتىمدىلىگى مەن ىڭعايلىلىعى سەبەپتى ءبىزدى قاتتى قىزىقتىرادى.

سوعان قاراماستان ءبىلىم الۋدىڭ ءداستۇرلى ەمەس ۇلگىسىنە ءبىراز ساقتىقپەن قارايتىنىمىز راس. قاشىقتان ءبىلىم الۋشى ستۋدەنتتىڭ قانداي قيىندىقتارمەن كەزدەسەتىنىن جانە ونى قالاي شەشۋگە بولاتىنىن تالقىلاپ كورەلىك.

1 -كەمشىلىك. موتيۆاتسيا

(موتيۆاتسيا (اعىلش. motіvation) - قولدانىلۋ ىڭعايىنا قاراي قازاقشا «نيەت»، «تۇرتكى»، «كىرىسۋ»، «جىگەرلەنۋ»، «ىنتالانۋ» سوزدەرىنىڭ ماعىناسىنا جاقىن كەلەتىن، قازىرگى زامان مادەنيەتى مەن گۋمانيتارلىق عىلىمدارىندا كەڭ قولدانىلاتىن ۇعىم.)

بۇل ارىدەن كەلە جاتقان ماسەلە.

جاڭا ءبىلىم الۋدى ۇناتاتىن ادامدار جانە وقۋ ورىندارىنا تەك بوي سەرگىتۋ ءۇشىن عانا باراتىن ادامدار قاشان دا بولعان. زاماناۋي تەحنولوگيالاردى پايدالانۋدىڭ ءوزى بۇل ماسەلەنى شەشە المايدى. عالامتور ارقىلى ءبىلىم الۋ ۇلكەن جاۋاپكەرشىلىكتى جانە ءوزىن-ءوزى باقىلاۋدى تالاپ ەتەدى. ايتپەسە وقۋىڭىزدى مەزگىلىنەن بۇرىن ءۇزۋىڭىز نەمەسە «ونى ءبىراز تەجەپ قويۋىڭىز» ابدەن مۇمكىن.

كوپ ادامنىڭ بويىنداعى ءبارىن ەرتەڭگە قالدىرۋ دەگەن جامان ادەت ەركىن ساباق كەستەسىمەن بىرگە قوسىلىپ، ناتيجەسىندە وقىلماعان اقپاراتتار كولەمى جينالا بەرەدى دە، وقۋ ءۇردىسى ۇزاققا سوزىلىپ كەتەدى.

ەگەر ادەتتەگى ءبىلىم الۋ كەزىندە ۇقىپسىز وقۋشىلار ءۇشىن «قاتال باقىلاۋشى» ءرولىن مۇعالىمدەر مەن كوپشىلىكتىڭ سوگىسى اتقارسا، قاشىقتان ءبىلىم الۋ كەزىندە ءبارىن ءوز بەتىڭشە وقۋدى ۇيرەنۋگە تۋرا كەلەدى.

كەز كەلگەن ادامنىڭ وقۋعا دەگەن ىنتاسى جوعالىپ كەتۋى مۇمكىن. مۇنىڭ الدىن الۋ ءۇشىن پسيحولوگتاردىڭ پايدالى كەڭەستەرىن پايدالانۋدى ۇسىنامىز. بالكىم، بويىڭىزداعى موتيۆاتسيانى ساقتاۋعا سول كومەكتەسەر.

2 -كەمشىلىك. كۇماندى ءبىلىم بەرۋ باعدارلامالارى

كوپ اقشا بولماسا دا، ادال ەڭبەكپەن تاپقان از اقشانى دا بەيمالىم جەرگە سالۋ راسىمەن دە قورقىنىشتى ەمەس پە. كۋرستى ۇيىمداستىرۋشىلار اياق استىنان جوعالىپ كەتسە نەمەسە وقىتۋشىلار بىرەگەي اۆتورلىق باعدارلاما دەپ، قارابايىر دۇنيەلەرىن ۇسىنىپ جاتسا قايتەسىز؟ ءبىلىم بەرۋدىڭ قانشالىقتى سالماقتى بولاتىنىن بىرنەشە بەلگىلەرىنە قاراپ انىقتاۋعا بولادى:

ساپالى عالامتورلىق ءبىلىم بەرۋ ارزان بولمايدى. قاشىقتان وقىتۋ ادەتتەگى ءبىلىم بەرۋدەن الدەقايدا ارزان. ءبىراق بۇل ونى تەگىن الۋعا بولادى دەگەن ءسوز ەمەس. باعاسى تىم ارزان بولسا، دەمەك ءسىزدىڭ الدىڭىزدا ءبىر كۇندىك قانا كۋرستار.

ءبىلىم بەرۋ مەكەمەسىنىڭ بارلىق قۇجاتنامالارىن - ليتسەنزيالارىن، سەرتيفيكاتتارىن، جارعىلىق قۇجاتتارىن سۇراڭىز.

وقىتۋشىلار، ولاردىڭ بىلىمدەرى، ەڭبەك وتىلدەرى تۋرالى سۇراقتار قويىڭىز. نيەتى ءتۇزۋ ۇيىمدار بولاشاق وقۋشىلارىنىڭ قالاعاندارىن ورىنداپ، ولارعا بارلىق قاجەتتى اقپاراتتاردى بەرەدى. اقپاراتتاردى بەرۋدەن باس تارتۋ، جوعالتىپ الدىق دەۋ، «ءبىر اپتادان كەيىن سالىپ جىبەرەمىز» دەپ ۋادە بەرۋ - ساقتانۋدىڭ سالماقتى سەبەبى.

عالامتور ارقىلى ءبىلىم بەرۋ باعدارلاماسىمەن الدىن الا تانىسىڭىز، ساقتىقتا قورلىق جوق. ءوزىڭىزدىڭ نە ساتىپ الاتىنىڭىزدى بىلۋگە قۇقىڭىز بار. ەگەر سىزگە باعدارلاما مەن ساباق جوسپارىن اقىسىن تولەگەننەن كەيىن جىبەرەمىز دەسە - ويلانىڭىز: دەمەك، ۇيىمداستىرۋشىلار ساباقتىڭ كەمشىلىگىن الدىن- الا كورسەتكىسى كەلمەيدى نەمەسە جوسپار ءتىپتى ءالى دە دايىن ەمەس. سىزگە بۇل كەرەك ەمەس شىعار؟

ءبىلىم الماي تۇرىپ بارلىق اقپاراتتاردى جيناڭىز. پىكىرلەردى وقىڭىز، بۇرىنعى وقۋشىلارعا حات جازىڭىز، وقىتۋشىمەن جەكە سويلەسىڭىز، بايقاۋ ساباقتارىنا قاتىسىڭىز - ءسىز ءوزىڭىزدى ەشكىمنىڭ الداپ كەتپەيتىنىنە سەنىمدى بولۋىڭىز كەرەك.

3 -كەمشىلىك. الىنعان ءبىلىمنىڭ تومەن ساپاسى

كوپشىلىك قاشىقتان ساپالى ءبىلىم الۋ مۇمكىن ەمەس - ول تەك قانا جالاڭ تەوريا، ەشقانداي تاجىريبە جوق، ءبىلىمدى كۇماندى ادىستەرمەن تەكسەرەدى...

شىن مانىندە تاجىريبەلىك كۇندىزگى وقۋ ەلدىڭ بارىنە كەرەك ەمەس. ارينە قاشىقتان ءبىلىم الىپ دارىگەر بولۋ مۇمكىن ەمەس. ءبىراق ءتىلدى، تاريحتى، پسيحولوگيانى، ديزايندى، باعدارلامالاۋدى، بۋحالتەرلىك ەسەپتى جانە ت. ب. قاشىقتان وقۋعا بولادى.

تاجىريبەلىك ساباقتاردىڭ بارلىعىن ۆيرتۋالدى ورتاعا اۋىستىرۋ وڭاي. ءپاندى تەرەڭىرەك مەڭگەرىپ، ماتەريالداردى ۇعىنۋ جانە كاسىبي داعدىنى ۇشتاۋ ءۇشىن ونلاين كەڭەستەر، سەمينارلار، زەرتحانالىق جۇمىستار وتىلەدى.

 عالامتور ارقىلى ءبىلىم الۋدى تەكسەرۋدە جانە باعالاۋدا بەلگىلى ءبىر قيىندىقتار بار. شىنىمەن دە، ءۇي تاپسىرماسىن ءوزىڭىز ورىندادىڭىز با، الدە كورشىڭىز - عىلىم كانديداتى ورىندادى ما، انىقتاۋ قيىن. ءبىلىم بەرۋ ساپاسىن مەملەكەتتىك ديپلوممەن راستايتىن ۇلكەن ۋنيۆەرسيتەتتەر ستۋدەنتتەرىنەن ونلاين رەجيمىندە، وقىتاۋشىلاردىڭ باقىلاۋىمەن سىناق الادى.

اقىل توقتاتقان ەرەسەك ادامدار كوبىنەسە عالامتورداعى بىلىكتىلىكتى ارتتىراتىن نەمەسە جاڭا ماماندىقتى ۇيرەتەتىن قىسقا مەرزىمدى كۋرستاردى تاڭدايدى. ادەتتە قىسقا مەرزىمدى ءبىلىم بەرۋدىڭ بىرنەشە نۇسقاسىن ۇسىنادى - كەرى بايلانىستى جانە كەرى بايلانىسسىز. ەكىنشى ءادىس ۇنەمدىلەۋ - سىزگە وقۋ ماتەريالدارىن جىبەرەدى. ال ونى تۇگەل وقىپ شىعۋ ءوزىڭىزدىڭ ار- ۇياتىڭىزعا بايلانىستى.

ەگەر عالامتورداعى كۋرستار ءسىز ءۇشىن، ەڭ اۋەلى، ءبىلىم الۋدىڭ قاينار كوزى بولسا، وندا تاجىريبەنىڭ بولماۋى دا، وقىتۋشىنىڭ باقىلاۋىنىڭ ازدىعى دا سىزگە كەدەرگى بولمايدى.

ەگەر سىزگە تالىمگەردىڭ سىزعىشىن ۇستاپ توبەڭىزدەن ءتونىپ تۇرعانى جانە ەكىلىك قويعانى كەرەك بولسا، وندا ءبىلىم الۋدىڭ باسقا جولىن تاڭداڭىز.

ءوزىڭىز بايقاعانداي، ءبىراز ماسەلەلەر بار ەكەن. ءبىراق، شەشىمدەرى دە بار. ءسىز عالامتور ارقىلى ءبىلىم الۋدىڭ قانشالىقتى تاۋەكەلدى ەكەنىن ويلانىپ وتىرعانىڭىزدا، ميلليونداعان ادامدار جاڭا تەحنولوگيالار مەن جاڭا ءبىلىمنىڭ ارقاسىندا ومىرلەرىن جاقسى جاققا قاراي وزگەرتىپ جاتىر. ءبارى ءوز قولىڭىزدا!