قازاقستاننىڭ ۇزدىك فوتوبايقاۋىنىڭ جەڭىمپازدارى انىقتالدى
بايقاۋ قازاقستاننىڭ جاڭا كوركەم بەينەلەرىن قالىپتاستىرۋدى، پاتريوتيزمدى نىعايتۋعا ىقپال ەتۋ مەن حالقىمىزدىڭ داستۇرلەرىن ناسيحاتتاۋدى كوزدەيدى.
جارىس ءتۇرلى كاسىپ يەلەرىنىڭ اراسىندا قىزىعۋشىلىق تۋعىزىپ، وعان 18-35 جاس ارالىعىنداعى مەملەكەتتىك قىزمەتشىلەر، كاسىبي جانە اۋەسقوي فوتوگرافتار، ب ا ق وكىلدەرى جانە ستۋدەنتتەر قاتىستى.
فوتوجۇمىستاردىڭ كوبى استانا، الماتى، اتىراۋ، قاراعاندى، تاراز، كوكشەتاۋ، پاۆلودار، ماڭعىستاۋ، ورال، شىمكەنت، ارقالىق، قىزىلوردا، اقتاۋ سياقتى قالالارىنان، سونداي-اق اقمولا وبلىسىنان دا كەلىپ ءتۇستى.
«بايقاۋدى وتكىزۋ بارىسىندا شىعارماشىل جاستاردىڭ تاراپىنان ۇلكەن قىزىعۋشىلىقتى بايقادىق. ءادىلقازىلار القاسىنىڭ قاراۋىنا 200-گە جۋىق جۇمىس كەلىپ ءتۇستى. ءبىز ءتورت نوميناتسيانىڭ اتاۋىن جايدان جاي تاڭداپ العان جوقپىز. ولار ادام مەن قوعام ءۇشىن ماڭىزدى ماسەلەلەردى قامتيدى. سولاردىڭ ىشىندە اسىرەسە قازاقستاندىقتاردىڭ كۇندەلىكتى تىنىس- تىرشىلىگىمەن بايلانىستى نوميناتسيا قاتىسۋشىلارى ءوز جۇمىستارىن ەرەكشە كورسەتە ءبىلدى، ياعني ولار قاراپايىم ءارى ومىرشەڭ. الداعى ۋاقىتتا اتالعان بايقاۋدىڭ اۋقىمىن كەڭەيتىپ، فوتوگرافتاردىڭ كوپتەپ قاتىسۋ جاعىن قاراستىرامىز»، - دەدى ق ر تۇڭعىش پرەزيدەنتى - ەلباسى قورىنىڭ اتقارۋشى ديرەكتورى قانات جۇمابايەۆ.
ءتورت نوميناتسيا بويىنشا وتكىزىلگەن فوتوبايقاۋعا ەلىمىزدىڭ ءار وڭىرىنەن بارلىعى 180-نەن استام جۇمىس كەلىپ تۇسكەن كاسىبي فوتوگرافتاردان قۇرالعان ءادىلقازىلار القاسى سونىڭ ىشىنەن ءار نوميناتسيا بويىنشا ەڭ ۇزدىك دەگەن فوتونى تاڭدادى.
سونىمەن رەسپۋبليكالىق «اسىل مۇرا» فوتوبايقاۋىنىڭ جەڭىمپازدارى:
ەرلان وماروۆ - «استانانىڭ 20 جىلدىعى» نوميناتسياسى؛
الەكسەي پوپسوۆ، سايفۋللين فاريد - «كۇندەلىكتى ومىردەگى وقيعا»؛
باقىت ساتبەك - «تۇلعالار»؛
ماكسيم ستادنيچەنكو - «قازاقستان حالقىنىڭ مادەنيەتى مەن سالت- داستۇرلەرى» نوميناتسياسى بويىنشا تاڭدالدى.
«بايقاۋعا ەكى نوميناتسيا بويىنشا جۇمىستارىمدى جىبەردىم. ءوزىم استانادا تۇرىپ، ءار وقيعانىڭ كۋاگەرى بولىپ جۇرگەندىكتەن قالانىڭ ءومىرىن، تۇرمىسىن جاقسى بىلەمىن. ۇسىنعان جۇمىستارىمنىڭ بىرەۋى استانانىڭ 20 جىلدىعىنا ارنالعان اتىراۋ وبلىسىنىڭ سىيعا تارتقان كوپىرىنىڭ توبەدەن تۇسىرىلگەن سۋرەتى. ەكىنشىسى اق وردانىڭ كورىنىسىندە تۇسىرىلگەن ەگىز بالانىڭ فوتوسى جانە قالا كۇنگى مەرەكەلىك وتشاشۋدىڭ فوتوسى. بايقاۋ ءۇشىن فوتولاردى تاڭداۋ وڭايعا تۇسپەدى، دەگەنمەن وزىمە جاقىن دەگەن سۋرەتتەردى تاڭداۋعا تىرىستىم. ونىڭ ناتيجەسىن مىنە بۇگىن كورىپ وتىرمىز»، - دەدى بايقاۋ جەڭىمپازى، «ەگەمەن قازاقستان» رەسپۋبليكالىق گازەتىنىڭ فوتو ءتىلشىسى.
جەڭىمپازدار «اسىل مۇرا» كونكۋرسىنىڭ لاۋرەاتتارى دەپ تانىلىپ، ءارقايسىسى 350 مىڭ تەڭگە اقشالاي سىيلىقتارعا يە بولدى.
ەسكە سالساق، بۇعان دەيىن ەلباسى قورىنىڭ «اسىل مۇرا» رەسپۋبليكالىق فوتوبايقاۋىن جاريالاعانى تۋرالى حاباردار ەتكەنبىز.
