اتىراۋدا قۇدىققا ءتۇسىپ كەتكەن ءيت پەن سيىر قۇتقارىلدى

اتىراۋ. قازاقپارات - اتىراۋدا باتىس وڭىرلىك اەروموبيلدىك جەدەل قۇتقارۋ جاساعىنىڭ قىزمەتكەرلەرى قۇدىققا ءتۇسىپ كەتكەن ءيت پەن سيىردى قۇتقاردى، دەپ حابارلايدى قازاقپارات ءتىلشىسى.

«قالا ماڭىنداعى كۋريلكينو كەنتىنىڭ تۇرعىنى حابارلاسىپ، سيىرى اۋزى جابىق تۇرعان قۇدىققا ءتۇسىپ كەتكەنىن جەتكىزدى. قۇدىقتىڭ تەرەڭدىگى - 3 مەتر، كەڭدىگى - 1,5 مەتر بولعان. قۇتقارۋشىلار سيىردى ارقانمەن تارتىپ شىعاردى. جانۋارعا ەشقانداي زاقىم كەلگەن جوق»، - دەپ مالىمدەدى «باتىس وڭىرلىك اەروموبيلدىك جەدەل قۇتقارۋ جاساعى» م م باسپا ءسوز قىزمەتى.

قۇتقارۋشىلار بۇل اپتادا تەك سيىرمەن شەكتەلگەن جوق. اۆانگارد شاعىن اۋدانىندا تاعى ءبىر جانۋار، بۇل جولى ءيت قۇدىققا ءتۇسىپ كەتكەن.

«ءيت قاڭعىپ ءجۇرىپ، اۋزى اشىق تۇرعان 2 مەترلىك كارىزگە ءتۇسىپ كەتكەن. قۇدىقتىڭ ىشىندە سۋى بولعان. ال ءيت ودان شىعا الماي، ۇرە بەرگەن. ونى شىعارىپ الۋ ءۇشىن قۇتقارۋشىلارعا 5 مينۋت جەتكىلىكتى بولدى. يتكە ەشقانداي زاقىم كەلمەگەن»، - دەپ حابارلايدى باسپا ءسوز قىزمەتى.

جالپى، جىل باسىنان بەرى وڭىرلىك قۇتقارۋشىلار جاساعى ءۇي جانۋارلارىن قۇتقارۋ ءۇشىن 14 رەت شاقىرىلعان.