سۇيگەن جىگىتىن قاراتۋ ءۇشىن بالگەرگە باراتىن ارۋلار قالاي دۋا جاسايدى؟

 استانا. قازاقپارات - جالعىزدىقتان قۇتىلىپ، سۇيگەن جىگىتتەرىن قاراتۋ ماقساتىندا بالگەرگە باراتىن ارۋلارعا دۋا جاساۋ ءۇشىن قانداي زاتتار قاجەت؟

وزگە ادامدى قارا ماگيانىڭ كومەگىمەن ىرقىنا باعىندىرۋ بويجەتكەندەردىڭ پسيحولوگياسىنا كەرى اسەر ەتپەي مە؟ بۇل سۇراقتارعا ەۋرازيا ءبىرىنشى ارناسى جاۋاپ ىزدەپ كوردى.

تۇرمىسقا شىعۋدى ارمانداپ جۇرگەن اسىلجان مارات ەسىمدى ارۋدىڭ وسى ۋاقىتقا دەيىن بارماعان جەرى قالماپتى. ول باقسى-بالگەرلەردىڭ دە، نۋمەرولوگتار مەن ەمشىلەردىڭ دە ەسىگىن قاققان.

اقىرىندا ءوز ارەكەتتەرىنەن ەش ناتيجە كورمەگەن ارۋ قارا ماگيانىڭ كومەگىنە جۇگىنەمىن دەپ شەشكەن ەكەن.

الايدا ايدىڭ تۇتىلۋىن كۇتۋ، تۇزعا دەم سالۋ سىندى قۇلاققا كىرمەيتىن نارسەلەردى ەستىگەن ول بۇل ىستەن باسىن اۋلاق ۇستاعان كورىنەدى.

ءتىپتى ولاردىڭ ءبىرى كوشەدە كۇرىش سالىنعان اق ورامالدى «ءبىسسىمىللا» دەپ لاقتىرىپ، ارتىنا قاراماي كەتىپ قالۋ قاجەتتىگىن دە ايتىپتى.

جالپى قىزعا جىگىتتىڭ كوڭىلىن اۋدارىپ، ونى سيقىرمەن قاراتۋ ءۇشىن، جالعىزدىقپەن قوشتاسىپ، ومىرلىك جار كەزدەستىرۋ ءۇشىن ەر ازاماتتىڭ ۇيدە كيەتىن تاپىشكەسى، كوكنار، ءتۇرلى ءتۇستى لەنتالار قاجەت ەكەن.

سونداي-اق، قارا ماگيامەن اينالىساتىن دۋاگەرلەر سىزدەن سۇيىكتىڭىزدى تاۋىپ بەرۋ ءۇشىن شەگە، قايىڭ سۋسىنىن، تاراق پەن كىشكەنتاي اينا الىپ كەلۋدى سۇرايدى ەكەن. ودان بولەك، 13 تيىن مەن مايشامدار دا ارتىق ەتپەيتىن كورىنەدى.

ال ەمشى ايسارا مۇزدىبايەۆا بۇل ارەكەتكە كوبىنە 25-30 جاس ارالىعىنداعى ايەلدەر باراتىنىن ايتادى. ولار تۇرمىسقا شىعىپ، بالا كوتەرۋ ءۇشىن كەلىنشەكتىڭ ايتقانىن ەكى ەتپەيتىن كورىنەدى.

«ءبىر قوراپ تۇزدىڭ جارتىسىنا شومىلۋ كەرەك. شومىلعاندا زياندىسى كەتەدى، وعان مەن سۇرەنى وقىدىم عوي. جارتىسىنا جانۇياسىمەن تاماق ىشەدى. ول ىرىس-بەرەكە الىپ كەلەدى. 100 گرم تۇزدى اقشام نامازى ۋاقىتىندا پليتاعا قويىپ اللادان سۇرايدى»، - دەيدى مۇزدىبايەۆا.

ال پسيحولوگتار بۇل ارەكەتتەردىڭ قىز پسيحولوگياسىنا كەرى اسەر ەتەتىنىن ايتادى. ولار بويجەتكەن ەش ارەكەت ىستەمەي، سول دۋاعا سەنىپ قالاتىنىن دا جەتكىزىپ وتىر.

«ادام ميىنا قۇيىپ پروگراممامەن ءومىر سۇرەتىن بولادى. مۇمكىندىكتەرىن قولدانا الماي قالادى. ءيا، «ءسويتىپ ايتقان ەكەن عوي» دەپ پروگراممامەن جۇرەدى. جاۋاپكەرشىلىكتى وزىنەن الىپ تاستايدى. كەرىسىنشە، جاۋاپكەرشىلىكتى وزىنە الۋ كەرەك. سول كەزدە ءومىرى تۇزەلەدى»، - دەدى نۋمەرولوگ جانار راحيموۆا.