قازاقستاندىقتار قانشا جاستا وتباسىن قۇرۋ كەرەكتىگىن اتادى

 استانا. قازاقپارات - قىز بالا مەن ەر جىگىت قانشا جاستارىندا شاڭىراق كوتەرۋ كەرەك؟ اقپاراتتىق اگەنتتىگىنىڭ ءتىلشىسى وسى سۇراقتىڭ جاۋابىن وڭتۇسىكتىك استانانىڭ تۇرعىندارى مەن قالا قوناقتارىنان ىزدەستىرىپ كوردى.

«قىز بالا ءۇشىن كۇيەۋگە تيۋگە ارنالعان جاس ماڭىزدى ەمەس دەپ سانايمىن. 25, 30 نەمەسە 40 جاس بولسىن، وندا تۇرعان ەشنارسە جوق. ءار بويجەتكەن بۇل قادامعا قاشان باراتىنىن ءوزى بىلەدى. جەكە باسىم ءبىرىنشى كەزەكتە اياعىما نىق تۇرىپ العىم كەلەدى. سوسىن مەنىمەن دەڭگەيى بىردەي بولاتىن ءوز جارتىمدى كەزدەستىرسەم دەيمىن»، - دەيدى ايلين بالتابەكوۆا.

ەرتە تۇرمىس قۇرعاننىڭ پايداسى تۋرالى وسىعان دەيىن دە بىرنەشە ماقالالاردا جازىلعان. الايدا قازىرگى ۋاقىتتا مەكتەپ بىتىرە سالا جانۇيا قۇرۋعا ۇمتىلعان جاستاردىڭ نەكەلەرى كەي جاعدايلاردا اجىراسۋمەن اياقتالاتىنىن ەسكەرگەن ءجون.

«قىز بالا كۇيەۋگە جيىرما جاسىندا تيسە، جىگىت 28-30 جاسىندا ۇيلەنسە جاقسى. ءوزىم نەكەگە تۇرعاندا 22-دە ەدىم. ەرتە شاڭىراق كوتەردىم دەپ سانايمىن. ءبىرىنشى ايەلىممەن اجىراسىپ، ەكىنشى رەت 30 عا تولعاندا ۇيلەندىم. ەركەكتەر ءدال وسى جاسقا كەلگەندە جانۇياعا ۇلكەن جاۋاپكەرشىلىكپەن قاراي باستايدى »، - دەيدى دميتريي جۋراۆليەۆ.

وتىزدان اسقان سوڭ كۇيەۋگە شىعۋ اقىلعا قونىمسىز دەپ سانايتىن جاندار دا جوق ەمەس.

«كەيبىر ادامدار وتىزعا دەيىن دە جەتىلمەيدى. ءبىراق بيولوگيالىق ساعات دەگەن ۇعىم بار. سوندىقتان قىز دا، جىگىت تە 30 جاسقا تولعانعا دەيىن وتباسىن قۇرۋ كەرەك »، - دەيدى اۋدارماشى ارداق قاناتوۆا.

قازاقتا «بولار بالا ون بەسىندە باسپىن دەر، بولماس بالا وتىزىندا جاسپىن دەر» دەپ بەكەردەن- بەكەرگە ايتىلماعان. ەرتە ۇيلەنگەن شىڭعىس اسقاروۆ ەسىمدى ازامات العاشقى كەزدە جانۇيا قۇرعاندا بىرنەشە قيىندىقتاردىڭ بولعانىن جاسىرمايدى. ءبىراق ول مويىماي، ايەلىمەن بىرگە بارلىعىن جەڭىپ شىققانىن ايتتى.

«مەن جيىرما ۇشتەمىن. وزىمنەن ءۇش جاس كىشى ايەلىم بار. ارينە، باسىندا جانۇيا قۇرۋعا ءالى جاسپىز، نەكەگە وتىراتىنداي جاسقا جەتكەن جوقپىز دەگەن ويلار بولعان. ءبىراق ءبىز ءبارىن جەڭىپ شىقتىق. قازىر جۇبايىم ەكەۋمىز بارلىعىن ءوزىمىز جاساۋعا تىرىسامىز. اتا- انامىزدان كوبىنەسە قارجىلىق ەمەس، مورالدى تۇرعىدان كومەك الۋعا ۇمتىلامىز»، - دەيدى الماتى قالاسىنىڭ تۇرعىنى.

قازاق مەنتاليتەتىندە قىز بالا وتىزعا دەيىن ءوز باقىتىن تاۋىپ ۇلگەرۋ كەرەك بولسا، يسپانيادا وتىزدان اسىپ بارىپ نەكە قۇرعان قالىپتى جاعداي سانالادى ەكەن.

 «ءار ادامنىڭ جەكە شەشىمى عوي. يسپانيادا جىگىت تە، قىز دا 32 نەمەسە 33 كە كەلگەندە ۇيلەنۋلەرى ءتيىس دەپ سانالادى. ال وعان دەيىن جاستار بار ۋاقىتىن ءبىلىم الۋعا، جۇمىس ىستەۋگە ارنايدى »، - دەيدى يسپانيادان الماتىداعى KIMEP ۋنيۆەرسيتەتىنە ءبىلىم الۋعا كەلگەن ماريا ادان.

XXI عاسىردا ايەلدەر تەك ۇيدە وتىرىپ، بالا باعۋمەن اينالىسۋلارى كەرەك دەگەن پىكىر ارتتا قالىپ بارادى. بۇگىنگى كۇنى تابىستى كاسىپتى باسقارىپ جۇرگەن ەرلەردىڭ قاتارىندا نازىك جاندىلار دا جوق ەمەس. ايتسە دە، الماتىدا 30 جىلعا جۋىق ءومىر سۇرەتىن لەونيد ۆاسيليەۆ قىز بالا ەرتەرەك ۇيلەنىپ، انا اتانۋى ءتيىس دەپ سانايدى.

«ايەلدەر ەرتەرەك ۇيلەنۋلەرى كەرەك. شامامەن، 23 پەن 27 جاس ارالىعىندا. سەبەبى، ولار ءبىرىنشى كەزەكتە انا باقىتىن تانىپ، دۇنيەگە كەم دەگەندە ءبىر پەرزەنتتى الىپ كەلۋلەرى كەرەك. قازىرگى ۋاقىتتا ايەلدەر مانساپ قۋىپ ۋاقىتتىڭ قالاي زىمىراپ وتكەنىن تۇسىنبەي قالادى. بالا بوسانۋعا شاماسى جەتپەيدى. ال ەر ادامدارعا وتىزدا، وتىزدان اسا ۇيلەنگەن جاراسادى»، - دەيدى لەونيد ۆاسيليەۆ.

«ۇيلەنۋ وڭاي، ءۇي بولۋ قيىن» دەمەكشى ساۋالناماعا قاتىسقان قالا تۇرعىندارى جانۇيا قۇرماي تۇرىپ، سان مارتە ويلانۋعا، اسىقپاي دۇرىس شەشىم قابىلداۋعا ءبىراۋىزدان كەڭەس بەرەدى.

Stan.kz