ولجاس سۇلەيمەنوۆتىڭ نەمەرەسىن قاققان ايەل سوتتا كەشىرىم سۇرادى

استانا. قازاقپارات - اقىن ولجاس سۇلەيمەنوۆتىڭ جيەن نەمەرەسى ەسكەندىر قازا تاپقان جول اپاتى بويىنشا سوتتالۋشى ماليكا مۇحيتوۆا مارقۇمنىڭ اتا-اناسىنان كەشىرىم سۇرادى، دەپ حابارلايدى قازاقپارات.

«كەشىرىڭىزدەر مەنى، وتىنەم. كۇن سايىن اللادان ەسكەندىر جانە سىزدەر كەشىرسە ەكەن دەپ تىلەيمىن. مۇنداي جاعداي بولارىن بىلمەدىم جانە قالامادىم. وتىنەم، مەنى كەشىرىڭىزدەرشى. سىزدەرگە قانشالىقتى اۋىر ەكەنىن تۇسىنەم»، - دەدى م. مۇحيتوۆا استانا قالاسىنىڭ ەسىل اۋداندىق №2 -سوتىندا.

سونىمەن بىرگە، سوتتالۋشى جول-كولىك اپاتىنىڭ ءمان-جايىن ايتىپ بەردى.

«سول كۇنى جۇمىستان ەرتەرەك جىبەردى. جولاي كەرەي مەن جانىبەك حاندار- ماڭگىلىك ەل داڭعىلى قيىلىسىنداعى ازىق- تۇلىك دۇكەنىنە كىردىم. دۇكەننەن شىعىپ، كولىگىمە وتىردىم جانە كەرەي مەن جانىبەك حاندار كوشەسىنە شىعۋ ءۇشىن سولعا قاراي بۇرىلا باستادىم. تەجەگىشتى باسىپ، اينالاما قارادىم. سولعا بۇرىلا بەرگەنىمدە وڭ جاعىمنان قاپ- قارا ءبىر نارسە كەلىپ، كولىگىمە سوعىلدى. العاشىندا نە بولعانىن تۇسىنبەدىم. كولىكتەن ءتۇسىپ قاراسام، اسفالتتا جاس جىگىت جاتىر. ادامدار جۇگىرىپ كەلە باستادى. جەدەل جاردەم شاقىرۋعا ارەكەتتەندىم، ءبىراق ماعان دەيىن شاقىرىپ قويىپتى»، - دەدى ول.

ەسكە سالا كەتسەك، 22 -ماۋسىم كۇنى استاناداعى جان تۇرشىگەرلىك جول اپاتىندا ولجاس سۇلەيمەنوۆتىڭ 26 جاستاعى نەمەرەسى ەسكەندىر سۇلەيمەنوۆ مەرت بولعان ەدى. اپات ەلورداداعى ماڭگىلىك ەل داڭعىلى مەن كەرەي مەن جانىبەك حاندار كوشەسىنىڭ قيىلىسىندا بولعان.

استانا قالالىق ىشكى ىستەر دەپارتامەنتى اپاتقا سەبەپكەر بولۋى مۇمكىن «Hyundai» اۆتوكولىگىنىڭ يەسى، 29 جاستاعى استانالىق ايەلگە قاتىستى تەرگەۋ امالدارى ءجۇرىپ جاتقانىن حابارلاعان ەدى.

سونداي-اق استانا قالاسىنىڭ ىشكى ىستەر دەپارتامەنتى ولجاس سۇلەيمەنوۆتىڭ نەمەرەسى - ەسكەندىر سۇلەيمەنوۆتى كولىگىمەن قاعىپ ولتىرگەن جۇرگىزۋشى قىزىلوردا وبلىستىق ىشكى ىستەر دەپارتامەنتى باستىعىنىڭ قىزى ەكەنىن راستاعان.

اتىشۋلى ءىس بويىنشا 12 -قازان كۇنى باستالعان سوت پروتسەسى جابىرلەنۋشى تاراپتىڭ وتىنىشىمەن 17 -قازانعا شەگەرىلدى.