بويجەتكەن اش اكۋلالار تولى اكۆاريۋمگە قۇلاپ كەتىپ، جەم بولا جازدادى

 استانا. قازاقپارات - قىتايدا دۇكەن قىزمەتشىسى ءسۇرىنىپ كەتىپ، ليموندى اكۋلالار تولى اكۆاريۋمنىڭ ىشىنە قۇلادى.

بۇل تۋرالى Metro باسىلىمى حابارلايدى.

وقيعا جىجياڭ پروۆينسياسىنىڭ جياشين قالاسىنداعى ساۋدا ورتالىقتارىنىڭ بىرىندە ورىن العان. قىزمەتشىلەردىڭ جينالىسىنا كەشىككەن بويجەتكەن اكۋلا تولى اكۆاريۋمنىڭ ۇستىندەگى شىنى كوپىردىڭ بويىمەن جۇگىرىپ بارا جاتىپ، اكۆاريۋمنىڭ قاقپاعى اشىق ەكەنىن بايقاماعان. وسى كەزدە ول ءسۇرىنىپ كەتىپ، جىرتقىش بالىقتاردى قورەكتەندىرۋ كەزىندە اكۆاريۋمعا ءتۇسىپ كەتتى.

بۇل جاعدايدى بايقاعان ارىپتەستەرى ونى قۇتقارۋعا اسىقتى. ەكى كۇزەتشى سۋعا سۇڭگي جونەلىپ، بويجەتكەندى الىپ شىقتى. ابىروي بولعاندا، بويجەتكەن وقيعا سالدارىنان زارداپ شەككەن جوق.

ساۋدا ورتالىعى وكىلىنىڭ مالىمەتىنشە، وقيعا تاڭەرتەڭگى ۋاقىتتا ساۋدا ورتالىعىنىڭ كەلۋشىلەر ءۇشىن اشىلۋىنا دەيىن ورىن العان. اكۋلالاردى قورەكتەندىرۋ كەزىندە كوپىردى ۇنەمى جاباتىن بولعان. الايدا بويجەتكەن جينالىسقا اسىققاندىقتان، جولدى قىسقارتپاق بولىپ، كوپىردەگى قورشاۋدان ءوتىپ كەتىپتى.

ليموندى اكۋلالاردىڭ ۇزىندىعى 3,5 مەترگە دەيىن جەتەدى. ادەتتە ولار بالىقتار، ۇلۋ جانە قۇستارمەن قورەكتەنەدى. الايدا ادامدارعا دا قاۋىپ ءتوندىرۋى مۇمكىن.

 Stan.kz