جەدەل جاردەم جۇرگىزۋشىسى تۇركيا ازاماتىن كەشىردى

None
None
الماتى. قازاقپارات - الماتىدا سوققىعا جىعىلعان جەدەل جاردەم كولىگى جۇرگىزۋشىسىنىڭ وقيعاسى تاراپتاردىڭ تاتۋلاسۋىمەن اياقتالدى.

بۇل تۋرالى الەۋمەتتىك جەلىدەگى پاراقشاسىندا جابىرلەنۋشىنىڭ ادۆوكاتى جازدى، دەپ حابارلايدى قازاقپارات.

ءمالىم بولعانداي، جۇرگىزۋشى نيكولاي كۋچما مەن تۇركيا ازاماتى دەمير ەبۋزەر جۇزبە-ءجۇز بەتتەستىرۋ پروتسەدۋراسىنان ءوتتى.

«نيكولاي گريگوريەۆيچ پەن دەمير ەيۋۋزەر سويلەستى. بۇل جولى دا ايىپتالۋشى شىنايى تۇردە كەشىرىم سۇرادى. سونداي-اق ونىڭ اقىلعا قونىمسىز، اگرەسسيالىق جانە زاڭعا قايشى ارەكەتتەرىنە اكەلىپ سوقتىرعان جەكە باسىنىڭ جاعدايى ءتۇسىندىرىلدى. سوتتالۋشى جاساعان ىسىنە قاتتى وكىنەتىنىن، قىزمەتتىك مىندەتىن ورىنداپ جاتقان ەگدە جاستاعى كىسىگە قاتىستى جاساعان ارەكەتىن كەشىرىلمەيتىن جانە لايىقسىز دەپ سانايتىنىن سان رەت قايتالادى. ول سونداي- اق بارلىق جەدەل جاردەم قىزمەتكەرلەرىنەن جانە وقيعاعا نەمقۇرايلى قاراماعان بارلىق قازاقستاندىقتاردان كەشىرىم سۇرادى. نيكولاي گريگوريەۆيچ ونىڭ كەشىرىمىن قابىلدادى»، - دەلىنگەن قۇقىق قورعاۋشى اندرەي ديدەنكونىڭ تاراتقان حابارلاماسىندا.

نيكولاي كۋچما سونداي-اق سوتتالۋشىنىڭ اسىراۋىندا نارەستە بالاسى مەن زايىبى بارىن ەسكەرگەن.

«سوتتالۋشى كەلتىرگەن مورالدىق جانە ماتەريالدىق زالالدى ءتيىستى اقشالاي وتەماقىمەن وتەدى. تاراپتار ونىڭ سوماسىن جاريا ەتپەۋدى سۇرادى. ەكى جاق تاتۋلاسىپ، وسىعان وراي نيكولاي كۋچما المالى اۋداندىق سوتىنا، سونداي- اق المالى اۋدانى پروكۋرورىنىڭ اتىنا ءوتىنىش جازدى. وندا سوتتالۋشىنى قىلمىستىق جاۋاپكەرشىلىكتەن بوساتۋىن سۇرادى. سەنىمحات بەرۋشىنىڭ مۇددەسى سوت الدىنداعى تەرگەۋ اياسىندا ءتيىستى تۇردە ۇسىنىلعان، ال ونىڭ العىس سوزدەرى - ەڭ باعالى سىيلىق»، - دەپ اتاپ ءوتتى ا. ديدەنكو.

بۇدان بولەك، ول بۇل وقيعاداعى سوڭعى شەشىمدى المالى اۋداندىق سوتىنىڭ سۋدياسى قابىلدايتىنىن اتاپ ءوتتى.

ەسكە سالايىق، الماتىدا جولدى بولىسە الماعان تۇركيا ازاماتى جەدەل جاردەم جۇرگىزۋشىسى نيكولاي كۋچمانى سوققىعا جىققان بولاتىن. كوپ ۇزاماي پوليتسەيلەر 1990 -جىلى تۋعان تۇركيالىق ازاماتتى انىقتاپ، ۋاقىتشا ۇستاۋ وقشاۋلاعىشىنا جەتكىزدى. كەيىن ءالي دەمير كەپىلمەن بوساتىلدى.

سوڭعى جاڭالىقتار