الەمدىك قوعامداستىق ءوزارا سەنىمسىزدىك شەڭبەرىنەن شىعا الماي وتىر - نۇرسۇلتان نازاربايەۆ

استانا. قازاقپارات - بەيبىتشىلىك، ءال- اۋقات پەن مولشىلىق ادامزات دامۋىنىڭ نەگىزگى تەندەنسياسىن اينالا المادى.

بۇل تۋرالى بۇگىن ەلوردادا ءوتىپ جاتقان الەمدىك جانە ءداستۇرلى دىندەر كوشباسشىلارىنىڭ VI سەزىندە ق ر پرەزيدەنتى نۇرسۇلتان نازاربايەۆ ايتتى، دەپ حابارلايدى قازاقپارات ءتىلشىسى.

«وتكەن سەزدەن بەرگى 3 جىلدىڭ ىشىندە قازاقستان ەلورداسىندا جاھاندىق دەڭگەيدەگى ماڭىزدى شارالار ۇيىمداستىرىلدى. استانادا قابىلدانعان شەشىمدەر حالىقارالىق كەڭ رەزونانسقا يە بولدى. ويتكەنى، ول بىتىمگەرشىلىك، سەرىكتەستىك، تولەرانتتىلىق جانە جاسامپازدىق يدەيالارىن سىڭىرگەن. بۇل بارىنشا ماڭىزدى. سەبەبى الەم، وكىنىشكە وراي، تۋربۋلەنتتىك جاعدايعا ەنىپ وتىر. ءبىزدىڭ بارلىعىمىزدى، ساياساتكەرلەر مەن ءدىني قايراتكەرلەردى سانكتسيالىق تەكەتىرەستەر، ءدىنارالىق جانە دىنىشىلىك قايشىلىقتار، ساۋدا سوعىستارى، قورشاعان ورتانىڭ لاستانۋى الاڭداتپاي قويمايدى»، - دەدى نۇرسۇلتان نازاربايەۆ.

ەلباسىنىڭ پايىمىنشا، عىلىمي- تەحنولوگيالىق پروگرەسس اياسىندا وركەنيەتارالىق جانجالدار ماعىناسىز كورىنەدى. ورتاق عالامشارىمىزدى كەلەسى ۇرپاققا قانداي جاي-كۇيدە بەرە الاتىندىعىمىز باستى پروبلەماعا اينالىپ وتىر.

«ءبىز ءۇشىنشى مىڭجىلدىقتا 18 جىل ءومىر سۇرۋدەمىز. ءبىراق، بەيبىتشىلىك، ءال-اۋقات پەن مولشىلىق ادامزات دامۋىنىڭ نەگىزگى تەندەنتسياسىن اينالا المادى. الەمدىك قوعامداستىق ءوزارا سەنىمسىزدىك، جەك كورۋشىلىك جانە جانجالداردىڭ زۇلىمدىق شەڭبەرىنەن شىعا المادى. ءبىز جاعداي تۇزەلمەك تۇرماق ناشارلاي تۇسكەنىن كورىپ وتىرمىز. ەلدەر مەن ساياسي بلوكتار اراسىندا جاڭا قابىرعالار، جاڭا تەمىر شىمىلدىقتار تۇرعىزىلۋدا. ءبىراق ەڭ قاۋىپتىسى - ادامداردىڭ اقىل- ويلارى مەن جۇرەكتەرىندە ءوزارا جاتسىنۋشىلىق كۇشەيە تۇسۋدە»، - دەدى ق ر پرەزيدەنتى.