استانا وقۋشىلارىنا اعىلشىن ءتىلىن تەگىن ۇيرەتەتىن جاڭا جوبا ىسكە قوسىلدى
Open English - ەرىكتىلەردى دايىنداۋ بويىنشا كەمبريدجدىڭ ك ە ت جانە ر ە ت ەمتيحاندارىنىڭ نەگىزىندە وقۋشىلارعا اعىلشىن ءتىلىن ۇيرەتۋگە ارنالعان جوبا. جاڭا جوبا ەلوردانىڭ 12 مەكتەبىندە پيلوتتىق رەجىمدە ىسكە قوسىلدى.
جوبادا جۇزەگە اسىرىپ، مەكتەپ وقۋشىلارىنا اعىلشىن ءتىلىن ۇيرەتۋ ماقساتىندا ارنايى 30 وقىتۋشى-ەرىكتى دايارلاندى، ولار مەكتەپتەردىڭ 9-10 -سىنىپ وقۋشىلارىنان قۇرالعان 15 توپتى وقىتادى، ءار توپتا 12 ادامنان بار. العاش قولعا الىنعان پيلوتتىق جوبا بويىنشا اعىلشىن ءتىلى كۋرسىنان بارلىعى 180 وقۋشى وتەدى.
شەت ءتىلىن ۇيرەتەتىن وقىتۋشى- ەرىكتىلەر نازاربايەۆ ۋنيۆەرسيتەتى مەن نازاربايەۆ زياتكەرلىك مەكتەبىنىڭ ستۋدەنتتەرى مەن تۇلەكتەرى.
«جوبانى ىسكە اسىرۋدا جاستار بىلىكتى ساراپشىلاردىڭ قولداۋىمەن العا قويىلعان مىندەت تاپسىرمالاردى شەشۋدە كۇش بىرىكتىرەدى. Open English - بۇل مەكتەپ وقۋشىلارىنا اعىلشىن ءتىلىن جاپپاي ۇيرەتۋگە ارنالعان جوبا. الدىمەن ۇيرەتۋشىلەردەن قۇرالعان ساراپشى توپتار شەت ءتىلىن ۇيرەتۋ مەن وقىتۋدىڭ ءتيىمدى ءادىس- ءتاسىلىن ازىرلەپ شىقتى. وسىلايشا از ۋاقىت ىشىندە ءتيىمدى ادىسپەن وقۋشىلارعا جاپپاي اعىلشىن ءتىلىن ۇيرەتەدى»، - دەدى اتالعان جوبانىڭ اۆتورى، «زەراينا» قوعامدىق قورىنىڭ ديرەكتورى ليۋدميلا بۋرلاچەنكو.
اتالعان جوبا Astana Hub-تىڭ «100 ستارتاپ» اتتى باعدارلاماسىنىڭ قاتارىنا كىرەدى سونىمەن قاتار ءتىل ۇيرەنۋ كۋرسىنان وتكەن بارلىق قاتىسۋشىلاردىڭ ءبىلىم دەڭگەيلەرى LIFT ەمتيحانى ارقىلى باعالانىپ، ولارعا بال بەرىلەدى.
ايتا كەتەيىك، Open English - الەۋمەتتىك يننوۆاتسيالىق جوباسى «بولاشاق» كورپوراتيۆتىك قورىنىڭ قولداۋىمەن جۇزەگە اسىرىلۋدا.
