مەكتەپتە اقشا جيناۋ فاكتىلەرىندە ديرەكتور جازاعا تارتىلادى

 استانا. قازاقپارات - ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس- قيمىل اگەنتتىگىنىڭ استانا قالاسى بويىنشا دەپارتامەنت باسشىسى جازيرا جىلقىشيەۆا ەلوردادا جازالانعان مەكتەپ ديرەكتورلارى تۋرالى ايتتى، دەپ حابارلايدى قازاقپارات ءتىلشىسى.

«ءبىزدىڭ مەملەكەت پروتسەستەردى تولىق سيفرلاندىرۋ جولىندا. بۇل شارالار اكىمشىلىك كەدەرگىلەردى جويۋعا ىقپال ەتەدى. دەگەنمەن، بۇگىنگى كۇنى بارلىق راسىمدەر سيفرلانباعان. ناتيجەسىندە، لاۋازىمدى تۇلعالاردىڭ ءوز وكىلەتتىلىكتەرىن اسىرا پايدالاناتىن ساتتەرى كەزدەسەدى. شامادان تىس قۇجاتتار مەن رەگلامەنتتەلمەگەن اقپارات تالاپ ەتىلەدى. وقۋ جىلىنىڭ قارساڭىندا ءبىز حالىققا قىزمەت كورسەتۋ ورتالىعىنىڭ ۇسىناتىن قىزمەتىنە تالداۋ جۇرگىزدىك. مەكتەپتەردىڭ قاجەتسىز قۇجاتتاردى تالاپ ەتۋىنىڭ سالدارىنان ح ق ك و- دا كەزەكتە تۇرعان اتا- انالاردىڭ سانى جەتىپ ارتىلدى. ءتيىستى اقپارات ءبىلىم باسقارماسىنا جىبەرىلدى. 5 مەكتەپ ديرەكتورىنا قاتىستى تارتىپتىك شارالار قابىلداندى. 10 ديرەكتورعا قاتاڭ ەسكەرتۋ جاسالدى» ، - دەدى جىلقىشيەۆا استانادا وتكەن بريفينگتە.

بۇدان بولەك، جاتاقحانالارعا زاڭسىز ورنالاستىرۋ فاكتىلەر انىقتالىپ، زاڭسىز تۇرىپ جاتقاندار جاتاقحاناداعى ورىندارىن بوساتتى.

«بۇل فاكتىلەر ءبىلىم بەرۋ مەكەمەلەرىنىڭ اكىمشىلىكتەرى بەلگىلى ءبىر زاڭنامالاردى ساقتامايتىندىعىن كورسەتەدى. مەملەكەت بۇگىندە ءبىلىم بەرۋ مەكەمەلەرى ءۇشىن جەتكىلىكتى قارجىلاندىرۋدى قامتاماسىز ەتەدى. قاراجات بارلىق قاجەتتىلىكتەرگە بولىنەدى. «اقپاراتقا قول جەتكىزۋ تۋرالى» زاڭدا ءبىلىم بەرۋ مەكەمەلەرىنىڭ بيۋدجەت قاراجاتىن ينتەرنەت- رەسۋرستاردا جانە باسقا دا قولجەتىمدى سايتتاردا جاريالاۋ قاجەتتىلىگى جونىندە مىندەتتەمەلەرى ناقتى انىقتايدى. اشىقتىق پەن ەسەپبەرۋشىلىك - سىبايلاس جەمقورلىققا قارسى ساياساتتىڭ نەگىزدەرىنىڭ ءبىرى. ازاماتتار بيۋدجەت قاراجاتىنىڭ قايدا جۇمسالاتىنى تۋرالى ءبىلۋى قاجەت. ءبىلىم بەرۋ مەكەمەلەرىنىڭ ونلاين- رەسۋرستارىن تالداي وتىرىپ، اتالعان تالاپتاردىڭ ساقتالمايتىنى تۋرالى قورىتىندى جاسادىق» ، - دەدى دەپارتامەنت باسشىسى.

ونىڭ اتاپ وتۋىنشە، بارلىق ۇيىمداستىرۋشىلىق جانە شارۋاشىلىق پروتسەستەر ءبىرىنشى باسشىنىڭ ۇنەمى قاداعالاۋىندا بولۋ كەرەك. وسى ۋاقىتقا دەيىن بەلگىلى ءبىر پروتسەدۋرالاردى بۇزعانى ءۇشىن ورىنداۋشىلار نەمەسە ورىنباسارلارى عانا جاۋاپكەرشىلىككە تارتىلۋ تاجىريبەسى بولدى. بۇل تاجىريبەنى جويۋ قاجەت.

«27 - تامىزدا اگەنتتىك ءتوراعاسى، ەلوردا اكىمى جانە ءبىلىم جانە عىلىم ءمينيسترىنىڭ كەزدەسۋىندە ءبىلىم باسقارماسىنىڭ ۆەدومستۆولىق باعىنىستى ۇيىمدارىنىڭ باسشىلارى جەكە جاۋاپكەرشىلىك پيلوتتىق قۇجاتىنا قول قويدى. ەندى اقشا جيناۋ، زاڭدى بۇزۋ، قىزمەتتىڭ اشىقتىعىن ساقتاماۋ فاكتىلەرى انىقتالعان جاعدايدا، ديرەكتورلارعا قاتىستى ءتيىستى شارالار قابىلداناتىن بولادى. ءبىرىنشى باسشىلار كەڭ وكىلەتتىكتەرمەن عانا ەمەس، سونداي- اق جوعارى جاۋاپكەرشىلىكپەن ەرەكشەلەنۋى كەرەك» ، - دەدى جازيرا جىلقىشيەۆا.