قازاقستاندا قاي ۋنيۆەرسيتەتتى بىتىرگەن تۇلەك جوعارى جالاقى الادى

None
None
استانا. قازاقپارات - باتىس قازاقستان يننوۆاتسيالىق- تەحنولوگيالىق ۋنيۆەرسيتەتىن بىتىرگەن مامان ەڭ جوعارى جالاقى الادى. بۇل تۋرالى بۇگىن ورتالىق كوممۋنيكاتسيالار قىزمەتىندەگى بريفينگتە ءبىلىم جانە عىلىم سالاسىنداعى باقىلاۋ كوميتەتىنىڭ ءتوراعاسى تالعات ەشەنقۇلوۆ ايتتى، دەپ حابارلايدى قازاقپارات ءتىلشىسى.

وتاندىق جوعارى وقۋ ورىندارىنىڭ ءبىلىم بەرۋ باعدارلامالارىنا جۇرگىزىلگەن رەيتينگتىڭ ەكىنشى كەزەڭىنىڭ ناتيجەسىن جاريا ەتكەن ونىڭ ايتۋىنشا، رەيتينگ 4 كريتەريگە سۇيەنىپ جاسالعان. ولار - تۇلەكتەردىڭ جۇمىسقا ورنالاسۋ پايىزى جانە ولاردىڭ ورتاشا ەڭبەكاقىسى، باعدارلاما وزەكتىلىگى باعاسى، سونىمەن قاتار تۇلەكتەرگە جۇرگىزىلگەن ساۋالناما ناتيجەسى مەن جۇمىسقا تۇرۋ تۋرالى دەرەكتەر.

 «وزدەرىڭىزگە بەلگىلى، ءبىرىنشى كەزەڭدە 33 ماماندىق بويىنشا 784 ءبىلىم بەرۋ باعدارلاماسىنا باعالاۋ جۇرگىزگەن ەدىك. قازىر سونىڭ ەكىنشىسى جۇرگىزىلدى. بۇگىنگى تاڭدا 31 ماماندىق بويىنشا 681 باعدارلامانى باعالاپ شىقتىق. ەكى كەزەڭ ىشىندە ج و و- نى بىتىرگەن 6 مىڭعا جۋىق ازاماتتان ساۋالناما الدىق» ، - دەدى تالعات ەشەنقۇلوۆ.

ونىڭ دەرەگىنشە، ۋنيۆەرسيتەتتى اياقتاعان جىلى جۇمىسقا ورنالاسۋدىڭ ەڭ جوعارى دەڭگەيىن «مەتاللۋرگيا» ماماندىعى كورسەتكەن. ولاردىڭ قاتارىندا رۋدنىي يندۋستريالىق ينستيتۋتى مەن و. بايقوڭىروۆ اتىنداعى جەزقازعان ۋنيۆەرسيتەتىنىڭ تۇلەكتەرى بار. جۇمىسقا ورنالاسۋدىڭ %58 ىن «سۋ رەسۋرستارى مەن سۋدى پايدالانۋ» ماماندىعىنىڭ تۇلەكتەرى كورسەتىپ وتىر.

«رەيتينگتىڭ ەكىنشى كەزەڭىندە سالالىق ساراپشىلاردى قاتىستىرا وتىرىپ، ءبىلىم بەرۋ باعدارلامالارىنىڭ مازمۇنىنداعى الشاقتىقتى باعالاۋ جانە تالداۋ جۇمىستارى جۇرگىزىلدى» ، - دەدى ول.

كوميتەت باسشىسىنىڭ پايىمىنشا، ج و و - لاردىڭ نەگىزگى قاتەلىگى - وقۋ باعدارلاماسىندا تەورياعا باسىمدىق بەرىلەدى. وسى رەتتە تۇلەكتىڭ دايىندىق دەڭگەيىنە تىكەلەي بايلانىستى ەڭبەكاقى كريتەريى ماڭىزدى. وقىتۋشىلىق- پروفەسسورلىق قۇرامى مىقتى جانە ساۋاتتى باعدارلاماسى بار جوعارى وقۋ ورنىن بىتىرگەن تۇلەكتەر اناعۇرلىم باسەكە قابىلەتتى ەكەنىن تالداۋ كورسەتكەن.

جوعارى ەڭبەكاقى باتىس قازاقستان يننوۆاتسيالىق- تەحنولوگيالىق ۋنيۆەرسيتەتىنىڭ «كولىكتى پايدالانۋ جانە جۇك قوزعالىسى مەن تاسىمالداۋدى ۇيىمداستىرۋ» ماماندىعى بويىنشا تىركەلگەن. ال قازاق تەحنولوگيا جانە بيزنەس ۋنيۆەرسيتەتىنىڭ «جەڭىل ونەركاسىپ بۇيىمدارىنىڭ تەحنولوگياسى جانە قۇراستىرىلۋى» ماماندىعى ەڭ تومەن باعالانادى ەكەن.

 2018 -جىلدىڭ سوڭىنا دەيىن ۇلتتىق كاسىپكەرلەر پالاتاسى 29 ماماندىق بويىنشا رەيتينگ دايىنداۋدى جوسپارلاپ وتىر.

سوڭعى جاڭالىقتار