الماتى زووباعىندا امۋر جولبارىسى كۇنى اتالىپ ءوتتى

الماتى. قازاقپارات - الماتىنىڭ حايۋاناتتار باعىندا امۋر جولبارىسى كۇنى اتالىپ ءوتتى، دەپ حابارلايدى قازاقپارات ءتىلشىسى.

الماتى زووباعىندا ارتيستەر امۋر بارىسىنىڭ كەيپىنە ەنىپ، سيرەپ بارا جاتقان اڭ زارى ايتىلدى. كىشكەنتاي قوناقتار نازارىنا تەاترلىق قويىلىم ۇسىنىلىپ، بەينەلەۋ ونەرىنەن بايقاۋ ۇيىمداستىرىلدى. بۇل كۇننىڭ تاقىرىبى تەك جولبارىستار توڭىرەگىندە ءوربىدى. بالالار زووباقتى ارالاپ، اڭ پاتشالىعىنىڭ قىزىعىنا كۋا بولدى.

الماتىنىڭ زووباعىندا 5 امۋر جولبارىسى ءومىر سۇرەدى. ءبىراق سولاردىڭ تەك بىرەۋى عانا اڭنىڭ اتالمىش ءتۇرىن قورعاۋ جانە كوبەيتۋ باعدارلاماسىنا ەنگەن. ول - ۋرمان ەسىمدى جولبارىس. قالعان تورتەۋى گەنەتيكالىق اۋىتقۋشىلىعى نەمەسە كارىلىگىنە بايلانىستى باعدارلاماعا كىرمەگەن.

وسىدان ءبىر جىل بۇرىن امۋر جولبارىستارىنا جاڭا ۆولەر سالىنىپ، «قونىس تويىن» تويلاعان بولاتىن. الەمدىك ستاندارتقا ساي قاۋمالدا كوگال، اعاشتار، باسسەين، سارقىراما جانە ويىنشىقتار بار. ەرەكشە جانۋارلاردى اسا بەرىك اينەك پەن بيىك دۋال كەلۋشىلەردەن قالقالاپ تۇر.

حالىقارالىق جولبارىس كۇنى 29 -شىلدە كۇنىنە بەكىتىلگەن. دەگەنمەن، قىركۇيەكتىڭ سوڭعى جەكسەنبىسىندە ءداستۇر بويىنشا امۋر جولبارىسى كۇنى اتاپ وتىلەدى. ازايىپ بارا جاتقان اڭ ءتۇرى قيىر شىعىستى مەكەندەيدى. قىزىل كىتاپقا ەنگەن جانۋاردىڭ سانى الەم بويىنشا 500-گە جۋىقتايدى.

اۆتور: ارايلىم جولداسباي