نۇرلان نىعماتۋلين ەڭبەك سالاسىنداعى جەتىستىكتەردى اتادى

استانا. قازاقپارات - بۇگىن ماجىلىستە وتكەن جۇمىسپەن قامتۋ ماسەلەلەرىنە ارنالعان پارلامەنتتىك تىڭداۋ بارىسىندا پالاتا ءتوراعاسى نۇرلان نىعماتۋلين سالادا ورىن العان وزگەرىستەردى اتادى، دەپ حابارلايدى قازاقپارات ءتىلشىسى.

«وزدەرىڭىزگە بەلگىلى، ەگەمەندىك العان العاشقى جىلدار وڭاي بولعان جوق. شارۋاشىلىق بويىنشا بارلىق سالا توقتادى، فابريكالار مەن زاۋىتتار جابىلىپ، كوپتەگەن ازاماتتارىمىز جۇمىسسىز قالدى. زەينەتاقى، جالاقى جانە باسقا دا الەۋمەتتىك جاردەماقىلار بەرىلمەدى. ءبىراق تا ەلباسى ساياساتىنىڭ ارقاسىندا از ۋاقىتتىڭ ىشىندە وسى قيىن كەزەڭدەردەن امان-ەسەن وتتىك. قازىر ەلىمىزدە ەركىن ەكونوميكا قۇرىلىپ، ول بارلىق سالاعا وڭ سەرپىن بەردى. وسى ۋاقىتتىڭ ىشىندە ەكى ميلليوننان استام جاڭا جۇمىس ورنى قۇرىلىپ، ورتاشا جالاقى 17 ەسەگە دەيىن ءوستى. بۇل ءبىزدىڭ قول جەتكەن ەڭ ۇلكەن تابستارىمىزدىڭ ءبىرى دەپ سانايمىز. وسى جەتىستىكتەرىمىزدى ساقتاپ، ودان ءارى ارتتىرۋ ءۇشىن پرەزيدەنت «قازاقستان-2050» ستراتەگياسىندا، ءداستۇرلى جولداۋلارىندا، باسقا دا الەۋمەتتىك باستامالاردا ەڭبەكپەن قامتاماسىز ەتۋدىڭ ناقتى جولدارىن كورسەتىپ كەلەدى»، - دەپ توقتالدى ن. نىعماتۋلين.

وسى ورايدا ول بۇل باعىتتا 2011-2016-جىلداردا «جۇمىسپەن قامتۋ جول كارتاسى» جۇزەگە اسىرىلعانىن ەسكە سالىپ ءوتتى. ناتيجەسىندە، بەس جىلدا 800 مىڭنان استام ادام جۇمىسقا ورنالاستى. ال بىلتىردان بەرى ەلىمىزدە «ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋ» باعدارلاماسى باستالدى.

«2017-2021-جىلدارعا ارنالعان جۇمىسپەن قامتۋدىڭ كەشەندى جوسپارى رەسپۋبليكامىزدىڭ بارلىق ايماقتارىن قامتيدى دەۋگە بولادى. وزدەرىڭىز بىلەسىزدەر، بۇگىنگى كۇنى جۇمىسقا دەگەن سۇرانىس وتە جوعارى. سول ءۇشىن ەلباسىمىز نۇرسۇلتان ءابىش ۇلى نازاربايەۆ ءوزىنىڭ ءاربىر تاپسىرماسىندا جاڭا كاسىپورىنداردى اشىپ، جۇمىس ورىندارىن كوبەيتۋ تۋرالى ناقتى مىندەتتەر قويىپ وتىر. ولاردى، ساپالى زاڭدارمەن قامتاماسىز ەتۋ - پارلامەنتتىڭ نەگىزگى ماقساتى. سوندىقتان، وسى ماسەلەگە بايلانىستى ماجىلىستە كوپتەگەن شارالار اتقارىلىپ جاتىر»، - دەدى ءماجىلىس ءتوراعاسى.

اتاپ ايتقاندا، وتكەن سەسسيادا پرەزيدەنتتىڭ «بەس الەۋمەتتىك باستاماسى» ءتيىستى زاڭدارمەن قامتاماسىز ەتىلدى. سونىمەن بىرگە، «100 ناقتى قادام» ۇلت جوسپارىن ىسكە اسىرۋ شەڭبەرىندە قابىلدانعان «ەڭبەك كودەكسى» سياقتى نەگىزگى قۇجاتتى ەرەكشە اتاپ ءوتۋ قاجەت. وندا جۇمىس بەرۋشى مەن جۇمىسكەر اراسىنداعى ەڭبەك قاتىناستارى رەتتەلگەن. ال 2016-جىلى «حالىقتى جۇمىسپەن قامتۋ تۋرالى» جاڭا زاڭ قابىلداندى. ول ەڭبەك كورسەتكىشتەرىن حالىقارالىق ستاندارتتارعا سايكەس جاساۋعا جول اشتى.

«بيىلعى جىلى پارلامەنت «جۇمىسپەن قامتۋ جانە كوشى-قون ماسەلەلەرى بويىنشا» زاڭنامالىق قۇجاتىن دا قابىلدادى. اتالعان زاڭ جۇمىسپەن قامتۋ قىزمەتتەرىنىڭ جۇيەسىن رەفورمالاۋدى، ەلەكتروندىق ەڭبەك بيرجاسىن ەنگىزۋدى جانە جۇمىسقا ورنالاستىرۋ ءۇشىن جەكە اگەنتتىكتەردى تارتۋدى كوزدەيدى. بۇل اقپاراتتاردى ءبىرىڭعاي ينتەرنەت-رەسۋرستارعا بىرىكتىرۋگە مۇمكىندىك بەرەدى»، - دەدى ن. نىعماتۋلين.