قازاقستاندا قاسقىر ازايىپ كەتكەن اۋماقتار انىقتالاتىن بولدى

استانا. قازاقپارات - قازاقستاننىڭ بيو الۋان تۇرلىلىكتى ساقتاۋ قاۋىمداستىعى (ق ب س ق) قاسقىردى زەرتتەۋگە قاتىستى جۇمىستى جالعاستىرۋدا.

بيىل قاۋىمداستىق اقتوبە، اتىراۋ، باتىس قازاقستان جانە ماڭعىستاۋ وبلىستارىندا اڭشىلار مەن جەرگىلىكتى تۇرعىندار اراسىندا ساۋالناما جۇرگىزەدى، دەپ حابارلايدى قازاقپارات قوعامدىق ۇيىمنىڭ سايتىنا سىلتەمە جاساپ.

ساۋالناما بارىسىندا قاۋىمداستىق تۇرعىنداردىڭ ءتۇرلى ساناتتارى اراسىندا قاسقىرعا دەگەن قارىم-قاتىناستى انىقتايدى. بۇعان قاسقىردى كورۋ، جىرتقىش تۋرالى ءبىلۋ دەڭگەيى جانە تابيعاتقا دەگەن جالپى كوزقاراسى اسەر ەتەدى.

سونداي-اق، جەرگىلىكتى تۇرعىندار سوڭعى جىلداردا وسى وڭىردەگى قاسقىر سانى مەن وسىمىنە قاتىستى بىلەتىن دەرەكتەرىمەن بولىسەدى. بۇدان باسقا مال شارۋاشىلىعىنا جىرتقىشتار قانشا شىعىن كەلتىرگەنى دە ەسەپكە الىنادى. ايتا كەتەرلىگى ەلىمىزدە وسىنداي مالىمەتتەر ورتالىقتاندىرىلىپ جيناستىرىلمايدى.

ساۋالناما ناتيجەسى شەكتەۋسىز اۋلاۋ سالدارىنان قاسقىر سانى بارىنشا ازايىپ كەتكەن وڭىرلەردى انىقتاۋعا كومەكتەسەدى. انكەتا جۇرگىزۋ الداعى ۋاقىتتا ەلىمىزدىڭ جازىق القاپتارىندا قاسقىر سانىن رەتتەۋ تەتىگىن ازىرلەۋگە سەپتىگىن تيگىزەدى.

ساۋالنامانى ق ب س ق ماماندارى قاۋىمداستىق كلۋبتارى، فيليالدارى ارقىلى، سونداي-اق، كيىك مەكەندەيتىن جەرلەرگە جاقىن تۇراتىن اۋىل تۇرعىندارى اراسىندا اقپاراتتىق ناۋقان اياسىندا دا جۇرگىزەدى.

انكەتا تيىمدىلىگىن ارتتىرۋ ءۇشىن ول انونيمدى تۇردە الىنادى.

قازىرگى ۋاقىتتا قاۋىمداستىق 800 انكەتا تاراتتى. الداعى ۋاقىتتا انكەتا عالامتوردا جاريالانادى، سول كەزدە ونىڭ سۇراقتارىنا ەلىمىزدەگى بارلىق قالا تۇرعىندارى جاۋاپ بەرە الادى.