الەمگە اتى ايگىلى جازۋشى اگاتا كريستي نەگە جوعالىپ كەتتى؟
جەلتوقساننىڭ 3- كۇنى كۇيەۋىنىڭ بارلىق دەمالىس كۇندەرىن كوڭىلدەسىمەن بىرگە وتكىزەتىنىن سەزىپ، ءتۇن ىشىندە ۇيىقتاپ جاتقان قىزىنىڭ بەتىنەن ءسۇيىپ، كيىمدەرىن الىپ كەتىپ قالادى.
قايدا كەتكەنىن ەشكىم بىلمەيدى، ءىز- ءتۇزسىز جوق بولادى...
قارسىلاستارى اگاتا كريستيدىڭ اياق استىنان جوعالىپ كەتۋىن ول ءوز- ءوزىن جارنامالاۋ ءۇشىن ادەيى ىستەدى دەيدى.
ال كەيبىرەۋلەرى ونىڭ كۇيەۋى كوڭىلدەسىنە كەتىپ قالعان سوڭ، ءوز- وزىنە قول جۇمسادى دەپ جورامالدايدى.
بۇل ءىستى ىشكى ىستەر ءمينيسترى ۋيليام دجاينسان حيكس ءوز باقىلاۋىنا الادى.
ارتۋر كونان دويل اگاتانىڭ قولعابىن مەديۋمگە اپارادى، ءبىراق ودان دا ەش ناتيجە شىقپايدى. ونىڭ جوعالىپ كەتكەنى تۋرالى تەك بريتاندىق گازەتتەر ەمەس، بۇكىل دۇنيەجۇزىلىك اقپاراتتىق قۇرالدار دا جاريالايدى. «دەيلي نيۋس» گازەتى اگاتا كريستيدىڭ قايدا ەكەنىن بىلەتىن ادامعا قوماقتى قارجى ۇسىنادى. ءار جەرگە بويى 170 س م. سارى شاشتى، 35 جاستاعى ايەل جوعالىپ كەتتى دەگەن پلاكاتتار ىلىنەدى.
تەك 11 كۇن وتكەن سوڭ ءبىر مۋزىكانت حورراۋگەيت كۋرورتىندا اگاتا كريستيگە ۇقسايتىن ايەلدى كورگەنىن حابارلايدى. سويتسە، بەلگىلى جازۋشى «كارى اققۋ» اتتى قوناق ۇيدە تەرەزا نيل دەگەن لاقاپ اتپەن تۇرىپ جاتىر ەكەن.
وسى حاباردى ەستي سالا كۇيەۋى ارچيبالد كريستي حەرراۋگەيت كۋرورتىنا جەتەدى. ول ەكەۋى كەزدەسكەن ساتتە رەپورتەرلەر، پوليتسەيلەر دە بولادى. ولاردىڭ ءبارى جازۋشىنىڭ قيمىل، ءىس- ارەكەتى، سويلەگەن ءسوزى دە ءبىرتۇرلى وزگەرىپ كەتكەنىن بايقايدى. ال كۇيەۋىن تانىماي، ءوزىمنىڭ اعام دەسە قىزىنىڭ سۋرەتىن كورىپ: «بۇل مەنىڭ ۇلىم عوي»، - دەيدى.
ەرتەسىنە- اق بۇكىل ۇلى بريتانيا بويىنشا اگاتا كريستي تابىلدى، ءبىراق ۋاقىتشا ەستە ساقتاۋ قابىلەتىنەن ايىرىلعان دەگەن حابار تاراپ كەتەدى. ايگىلى جازۋشىنىڭ وسىنداي حالگە دۋشار بولعانىنا كەيبىرەۋلەردىڭ سەنگىلەرى كەلمەيدى.
قوناق ءۇي قىزمەتكەرلەرى اگاتا كريستيدىڭ ءىس- ارەكەتىنەن ەشقانداي وزگەرىس بايقالماعانىن ايتادى. جازۋشى كۇندە كىتاپحاناعا بارادى، پيانينودا وينايدى، دارىگەرلەر بەلگىلەگەن ەمدى دە قابىلدايدى. ءبىر جۋرناليست «ТЕRESА» دەگەن سوزدەگى ارىپتەردىڭ ورنىن اۋىستىرسا، ТЕASER - باس قاتىرۋ» دەگەن ماعىنانى بىلدىرەتىنىن بايقايدى.
ءبىراق كوپشىلىك اگاتا كريستي كۇيەۋىنەن ءوش الۋ ءۇشىن ادەيى كەتىپ قالدى دەگەن جورامالدان تايمايدى. ەندريۋ نارتون اتتى بيوگراف جانە دارىگەر كريستي ءديسسوتسياتيۆتى فۋگا دەگەن اۋرۋعا شالدىققانىن انىقتايدى. بۇل اۋرۋمەن اۋىراتىندار ءوزىنىڭ اتىن ۇمىتىپ قالادى. كۇندەلىكتى ومىردە بولاتىن جاعدايلاردى ۇمىتپايدى. ءبىراق ولار وزدەرىنىڭ وسىنداي اۋرۋمەن اۋىراتىندارىن بىلمەيدى ەكەن. ولار وزدەرىنە جاڭا ات تاڭداپ الادى، جاڭا جۇمىس تاۋىپ، ەل قاتارلى ءومىر سۇرە بەرەدى.
بۇل اۋرۋمەن قالاي اۋىرادى؟
ونىڭ سەبەپتەرى بىرنەشە. مىسالى، قاتتى رەنجىگەندە، سترەستىك جاعدايدا بولادى ەكەن. اۋىرعان ادامدار ءوز باستارىنا تۇسكەن اۋىرتپاشىلىقتى ۇمىتىپ، تۇك بولماعانداي كۇندەلىكتى ومىرگە ارالاسىپ جۇرە بەرەتىن كورىنەدى. ديسسوتسياتيۆتى فۋگامەن بىرنەشە ساعاتتان، بىرنەشە ايعا دەيىن اۋىرادى ەكەن. ونىڭ ەڭ باستى بەلگىسى - اۋىرعان ادام ءوزىن باسقا اداممىن دەپ ەسەپتەيدى. كريستي ءوز- ءوزىن تەرەزا نيل دەپ ەسەپتەپ، ءتىپتى ءوزىن سۋرەتتەردەن تانىماي قالادى. كريستي ىزدەۋ قاعازدارىندا جازىلعان حابارلامانى وقىپ: «مىنا اگاتا كريستي دەگەن ايەل جوعالىپ كەتىپتى، بايقۇس- اي، تەزىرەك تابىلسا ەكەن»، دەپ ۋايىمدايتىن كورىنەدى.
اتاقتى جازۋشىنىڭ وسىنداي اۋرۋعا شالدىققانىنا ونىڭ كۇيەۋى كىنالى دەسەدى.
