ەلىمىزدە تۇماۋ قاشان ءورشيتىنى بەلگىلى بولدى
بۇگىن دەنساۋلىق ساقتاۋ مينيسترلىگىندە وڭىرلەردىڭ الداعى تۇماۋ مەن ءجىتى رەسپيراتورلىق ۆيرۋستىق ينفەكتسياسىىنىڭ ەپيدەميالىق ماۋسىمىنا دايىندىعى تالقىلاندى.
«تۇماۋعا كوپتەگەن ادام ءمان بەرمەيدى. ءبىراق، ءتۇرلى اسقىنۋلار، وتيت، پنيەۆمونيا، جۇرەك، بۇيرەك جانە تاعى باسقا اۋرۋلار تۇماۋدىڭ جانە ءجىتى رەسپيراتورلىق ۆيرۋستىق ينفەكتسيالاردىڭ ناتيجەسى ەكەنىن ەستەرىڭىزگە سالعىم كەلەدى. 2009-2010 -جىلدارى تۇماۋدىڭ H1N1 ءتۇرى شىعىپ، ولىممەن اياقتالعان جاعدايلار كوپ تىركەلدى. سول جىلدارى ەل بويىنشا 20 دان استام جاعداي ءولىم- جىتىممەن اياقتالدى. بىلتىر تۇماۋدان 1 ناۋقاس قايتىس بولدى. سوندىقتان، ءبىزدى الاڭداتىنى - تۇماۋدىڭ جاڭا تۇرلەرىنىڭ شىعۋى. سول ءۇشىن باقىلاۋدى كۇشەيتىپ وتىرمىز. ياعني، تۇماۋدىڭ جاڭا تۇرلەرىن مەزگىلىندە انىقتاپ، الدىن الۋىمىز كەرەك. ءبىز جاڭادان شىعىپ جاتقان تۇماۋ تۇرلەرىنەن قاۋىپ كۇتەمىز. نەگە دەسەڭىز. ميچيگان سياقتى جىلدا تىركەلەتىن تۇماۋدىڭ تۇرلەرىنە قوعامدىق يممۋنيتەت قالىپتاسقان. ال جاڭادان شىعىپ جاتقان تۇماۋدىڭ تۇرلەرىنە حالىقتا يممۋنيتەت جوق. سوندىقتان، بۇل ماسەلەنى ءبىز باقىلاۋدا ۇستاپ وتىرمىز» ، - دەدى بەكشين.
ونىڭ ايتۋىنشا، كوميتەت ءوز تاراپىنان ۆاكسينا ساتىپ الۋعا كونكۋرستى ۋاقىتىندا وتكىزگەن. ءبىراق، بيىل قوستاناي، تۇركىستان وبلىستارى، استانا مەن شىمكەنت قالالارى ۆاكسينانى جەتكىلىكسىز مولشەردە ساتىپ العان. دەگەنمەن، ەلوردا بۇل پروبلەمانى شەشىپ، قوسىمشا 50 مىڭ دوزا ۆاكتسينا الدى.
«ءبىز باسقا ايماقتارعا دا قوسىمشا ۆاكسينا ساتىپ الۋعا كەڭەس بەرەمىز. نەگىزى، قازاقستانعا اكەلىنگەن 1 ميلليون 628 مىڭ دوزانىڭ بارلىعى وڭىرلەرگە جەتكىزىلدى. بىلتىر ەل بويىنشا 2 ميلليون استام ادامعا ەكپە جاسالعان بولاتىن. بىزدە تۇماۋدىڭ ءورشۋ مەرزىمى جىلدا وزگەرىپ وتىرادى. بيىلعى بولجام بويىنشا ول قاڭتار ايىنىڭ ورتاسىندا بولادى. نەگە دەسەڭىز. سول كەزدە كوپتەگەن وقۋشى، ستۋدەنتتەر كانيكۋلدان كەلىپ، ۇيىمدارىنا جينالادى. ولار دەمالىستا بارلىق ايماقتاردا، ءتىپتى شەتەلدە بولىپ كەلەدى. وسى كەزدە تۇماۋ كۇرت كوبەيەدى. ال جالپى، تۇماۋ جاعدايلارى قازان، قاراشا، جەلتوقسان ايلارىندا تىركەلە باستايدى» ، - دەدى جانداربەك بەكشين.
Baq.kz
