قازاقستاننىڭ قارۋلى كۇشتەرى دابىل بويىنشا كوتەرىلدى

 استانا. قازاقپارات - بۇگىن تاڭەرتەڭ ق ر قورعانىس ءمينيسترى نۇرلان ەرمەكبايەۆتىڭ بۇيرىعى بويىنشا قارۋلى كۇشتەردىڭ اسكەري بولىمدەرى مەن قۇرامالارى وقۋ- جاتتىعۋ دابىلى بويىنشا كوتەرىلدى. بۇل تۋرالى قورعانىس مينيسترلىگىنىڭ باسپا ءسوز قىزمەتىنەن ءمالىم ەتتى.

سەلەكتورلىق رەجيمدە كەڭەس وتكىزىلىپ، ونىڭ بارىسىندا «شىعىس» جانە «وڭتۇستىك» وڭىرلىك قولباسشىلىقتارىنىڭ، دەسانتتىق- شابۋىلداۋ اسكەرلەرىنىڭ ءبىرقاتار اسكەري بولىمدەرىنە قازاقستاننىڭ باتىس وڭىرىنە توپتاسۋ تاپسىرماسى بەرىلدى. اسكەرلەر باتىس ايماققا جاياۋ جانە تەمىرجول كولىگىمەن، سونداي- اق اسكەري- كولىك اۆياتسياسىنىڭ ۇشاقتارىمەن اتتاندى.

ال «باتىس» وڭىرلىك قولباسشىلىعى اسكەرلەرىنىڭ قولباسشىسىنا اسكەرلەردى وقۋ- جاتتىعۋ وتەتىن ورىنعا ورنالاستىرۋ جانە وقۋ- جاۋىنگەرلىك تاپسىرمالاردى ورىنداۋ ءۇشىن «شىعىس» جانە «وڭتۇستىك» وڭىرلىك قولباسشىلىقتارىنىڭ، دەسانتتىق- شابۋىلداۋ اسكەرلەرىنىڭ كەلىپ جاتقان بولىمدەرى مەن بولىمشەلەرىن ەسكەرە وتىرىپ، توپتاردى قۇرۋ تاپسىرماسى جۇكتەلدى.

مايداندىق جانە شابۋىلداۋ اۆياتسياسى - اۋە ايلاقتاردا، ال اسكەري اۆياتسيا دالالىق تىكۇشاق ايلاقتارىندا شوعىرلاندى. اسكەري- تەڭىز كۇشتەرىنىڭ توپتاماسى ق ر ۇ ق ك شەكارا قىزمەتىنىڭ كەمەلەرىمەن جانە كاتەرلەرىمەن كۇشەيتىلدى. سونىمەن قاتار، شالعايداعى شەكارا زاستاۆالارى جالپى اسكەري بولىمشەلەرمەن كۇشەيتىلدى.

وقۋ- جاتتىعۋعا قۇرلىق اسكەرلەرىنىڭ، اۋە قورعانىسى كۇشتەرىنىڭ، اسكەري- تەڭىز كۇشتەرىنىڭ، ارنايى وپەراتسيالار كۇشتەرىنىڭ، ارنايى اسكەرلەردىڭ، ماتەريالدىق- تەحنيكالىق قامتامسىز ەتۋ بولىمدەرى مەن مەكەمەلەرىنىڭ، ۇ ق ك شەكارا قىزمەتى بولىمشەلەرىنىڭ، ق ر ءى ءى م توتەنشە جاعدايلار كوميتەتى جانە ۇلتتىق ۇلاننىڭ 5 مىڭنان استام اسكەري قىزمەتشىسى قاتىسۋدا.