قازاقستاندا ەڭ ۇزاق وتاسقان جۇپتىڭ سىڭارى كوز جۇمدى
جيەنبايەۆتار وتباسى ەڭ ۇزاق وتاسقان وتباسى رەتىندە قازاقستاندىق گيننەس رەكوردتار كىتابىنا ەنگەن بولاتىن.
قايعىلى اقپاراتتى سۇلتان جيەنبايەۆتىڭ نەمەرەلەرى حابارلادى.
ولاردىڭ ايتۋىنشا، نۇرانيا اجەي 96 جاسقا قاراعان شاعىندا، 15- قىركۇيەكتە كوز جۇمعان. مارقۇمنىڭ دەنەسى 18- قىركۇيەكتە تولەبايەۆ 119 مەكەنجايىنداعى ۇيىنەن تاڭەرتەڭگى 10:30 دا شىعارىلادى.
ۇلى وتان سوعىسىنىڭ ارداگەرى، پارتيا جانە مەملەكەت قايراتكەرى، قۇرمەتتى تەمىرجولشى، تاريحي ەسكەرتكىشتەر مەن مادەنيەتتى قورعاۋ جونىندەگى قازاق قوعامىنىڭ قۇرمەتتى پرەزيدەنتى جيەنبايەۆ سۇلتان سۇلەيمەن ۇلى مەن نۇرانيا كەرەي قىزى 1945-جىلى 17- قاڭتارىندا نەكەلەسكەن.
قازاقستاننىڭ ەڭ ۇزاق وتاسقان وتباسى تۋرالى سايتىمىزدا 2015-جىلى جازىلعان بولاتىن. وندا قاريالار شاڭىراقتى شايقالتپاۋدىڭ قۇپيالارىمەن بولىسكەن ەدى.
باقىتتى وتباسى 70 جىلدىق وتباسىلىق ومىرىندە 3 بالا تاربيەلەپ، 6 نەمەرە، 13 شوبەرە سۇيگەن.
وتاناسى نۇرانيا كەرەي قىزى 38 جىل بويى ەڭبەك جولىن قازاقستاننىڭ زاڭ سالاسىنىڭ دامۋىنا ارناعان ادام. 38 جىل بويى مەملەكەتتىك اربيتراجدا، ق ر باس اربيترىنىڭ ورىنباسارى رەتىندە بىرنەشە جىل قىزمەت ەتكەن. وسى ەڭبەگى ءۇشىن ق ر ەڭبەگى سىڭگەن زاڭگەرى اتاعىن العان.
ۇلى وتان سوعىسى كەزىندەگى ەرەن ەڭبەگى ءۇشىن 6 مەدال، بىرنەشە قۇرمەت گراموتاسىنا لايىق دەپ تانىلعان.
نۇرانيا كەرەي قىزىنىڭ جەتەكشىلىگىمەن قازاقستانعا بەلگىلى بىرنەشە زاڭگەرلەردىڭ ساڭلاقتارى تاربيەلەنگەن. ولاردىڭ كوپشىلىگى قازىر قازاقستاننىڭ سوت جۇيەسىندە لاۋازىمدى قىزمەت اتقارىپ وتىر.
