پويىزداردا ايەلدەرگە ارنالعان كۋپەلەر بولادى

كولىك كوميتەتىنىڭ ءتوراعاسى اسەت اساۆبايەۆتىڭ ايتۋىنشا، شەتەلدە ونداي قىزمەت بار. ال ءوز ەلىمىزدە ونى ەنگىزۋ ءۇشىن ورتاق جۇيەنىڭ فۋنكتسيونالىن رەتكە كەلتىرۋ كەرەك.

«نەگىزى، شەتەلدە ايەلدەر ءۇشىن ارنايى كۋپەلەر بار. قازىرگى كەزدە ءبىز ءتيىستى زاڭ جوباسىنىڭ تۇجىرىمداماسىن ازىرلەپ جاتىرمىز. سونىڭ اياسىندا بيلەت ساتۋدىڭ جاڭا قىزمەتى ىسكە قوسىلادى. وعان سايكەس، ايەلدەر تەك ايەلدەر وتىراتىن كۋپەنى تاڭداي الادى. ءسويتىپ، ايەلدەر وزدەرى ءبىر كۋپەگە وتىرا الادى. بيلەت ساتىلعاندا سونداي فۋنكسيا بولادى. ءدال قازىر ءبىز وسى ماسەلەنى «قازاقستان تەمىر جولى» ۇلتتىق كومپانياسىمەن بىرگە پىسىقتاپ جاتىرمىز» ، - دەدى ءا. اساۆبايەۆ پارلامەنت ماجىلىسىندە.

ونىڭ ايتۋىنشا، كۋپەلەردىڭ ءبارى بىردەي بولادى. وندايدا تەك ايەلدەر وتىرعان كۋپەنى عانا تاڭداۋ قۇقىعى بولادى. ەركەكتەر دە توپتاسىپ جۇرە الادى.

«ۆاگونداردى ەشكىم بولمەيدى. ءبارى بىردەي بولادى. ارينە، جاڭا قىزمەتتى ەنگىزۋ ءۇشىن الدىمەن ورتاق ءبىر جۇيەنى جاساپ الۋ قاجەت. بيىل سونى بىتىرەتىن شىعارمىز. ال كەلەسى جىلدان باستاپ جاڭا قىزمەت ىسكە قوسىلادى» ، - دەپ اتاپ كورسەتتى ا. اساۆبايەۆ جۋرناليستەرگە بەرگەن سۇحباتىندا.

ايتا كەتەيىك، پارلامەنت ءماجىلىسىنىڭ دەپۋتاتتارى كولىك ماسەلەلەرى بويىنشا كەيبىر زاڭنامالىق وزگەرىستەردى تالقىلاۋعا كىرىستى. سونىڭ ىشىندە رەسپۋبليكالىق جولداردا كولىك قۇرالدارىن جاپپاي توقتاتۋ تاجىريبەسىنە تىيىم سالۋ ماسەلەسى دە بار.

بۇدان بولەك، Uber، InDriver مەن ياندەكس تاكسي سياقتى ءموبيلدى قوسىمشالار بويىنشا ادام تاسيتىن كولىك جۇرگىزۋشىلەرىن زاڭداستىرۋ شارالارى قولعا الىنادى.