استانادا كەنەسارى حاننىڭ ەسكەرتكىشى جوندەلىپ جاتىر
«ءبىزدىڭ ءوڭىردىڭ كليماتتىق جاعدايىنا، ونىڭ ىشىندە جاۋىن- شاشىن مەن اۋا تەمپەراتۋراسىنىڭ وزگەرۋىنە بايلانىستى جەلىم نەگىزىنە ورناتىلعان قىش تاقتايلار قابىرشىقتانىپ، قابىرعادان اجىراي باستايدى. تاقتايلاردىڭ ءتۇسى وزگەشە بولعانىمەن، قابىرشىقتانا بەرەدى. وسىعان وراي، ەسكەرتكىشتىڭ اۆتورىمەن بىرلەسىپ جوندەۋ- قالپىنا كەلتىرۋ جۇمىستارىن جۇرگىزۋ تۋرالى شەشىم قابىلداندى»، - دەدى استانا قالاسىنىڭ تاريحي- مادەني مۇرا مەن ەسكەرتكىشتەردى ساقتاۋدى قامتاماسىز ەتۋ ديرەكسياسىنىڭ ديرەكتورى مەيرامباي ورالوۆ.
ونىڭ ايتۋىنشا، جوندەۋ جۇمىستارى كەزىندە ەسكەرتكىشتىڭ تۇعىرىنداعى بارلىق ەسكى قىش تاقتايلار الىنىپ (تاقتايشالاردىڭ قالىڭدىعى - 2 س م)، قالىڭدىعى 4 س م قىش تاقتايشالارعا اۋىستىرىلادى.
«قازىرگى كۇنى قايتا قالپىنا كەلتىرۋ جۇمىستارى جۇرگىزىلىپ جاتىر. ەسكەرتكىشتىڭ تۇعىرى بەكىتىلىپ، قىش تاقتايشالار جەتكىزىلىپ، مونتاجداۋ جۇمىستارى باستالدى. جوندەۋ جۇمىسىن 17 - قىركۇيەككە دەيىن اياقتاۋدى جوسپارلاپ وتىرمىز»، - دەدى ول.
ايتا كەتەيىك، استاناداعى ەسىل وزەنىنىڭ جاعاسىنداعى كەنەسارى حاننىڭ ەسكەرتكىشى 2001 -جىلى ورناتىلعان. قولادان قۇيىلعان ەسكەرتكىشتىڭ ساۋلەتشىسى شوتا ءۋاليحانوۆ پەن ءمۇسىنشىسى نۇرلان دوناي. سالماعى 10 توننا بولاتىن ەسكەرتكىش تۇعىردىڭ بيىكتىگى - 6 مەتر.
