قاراقۇيرىق اتقان قاسكويلەر سويىپ جاتقان جەرىنەن ۇستالدى
ق ر ا ش م ورمان شارۋاشىلىعى جانە جانۋارلار الەمى كوميتەتىنىڭ باسپا ءسوز حاتشىسى ساكەن دىلداحمەت زاڭسىز اڭشىلىق تۋرالى فەيسبۋكتەگى پاراقشاسىندا جازدى. بەلگىلى بولعانداي، 11 -قىركۇيەكتە ساعات تاڭعى 04:00-دەر شاماسىندا قىزىلوردا وبلىستىق ورمان شارۋاشىلىعى جانە جانۋارلار دۇنيەسى اۋماقتىق ينسپەكسياسى مەن «وحوتزووپروم» ءو ب» ر م ق ك قىزىلوردا فيليالىنىڭ ينسپەكتورلارى بىرلەسكەن رەيد بارىسىندا قىزىلوردا وبلىسى قازالى اۋدانى اقسۋات اۋىلىنىڭ تۇرعىندارى ب. ق. (1975 ج) مەن ش. ا- نى (1973 ج) ەكى باس قاراقۇيرىق اڭىن سويىپ جاتقان جەرىنەن ۇستالعان.
«وقيعا ورنىنان قاراقۇيرىق اڭىنىڭ سويىلعان 2 دەنەسى، 12 كاليبرلى قوس ۇڭعىلى اڭشى مىلتىعى، وتكىر جارىق سالعىش قۇرال مەن مەملەكەتتىك ءنومىرى 587EYA 11 KZ تويوتا «لەند كرۋزەر 105» اۆتوكولىگى انىقتالدى. جيناقتالعان قۇجاتتار مەن ايعاقتى زاتتار قازالى اۋدانىنىڭ ىشكى ىستەر بولىمىندە تىركەلىپ، ق ر قىلمىستىق كودەكسىنىڭ 337-بابى 4-تارماعى 2-تارماقشاسى بويىنشا قىلمىستىق ءىس قوزعالدى»، - دەيدى ساكەن دىلداحمەت.
