تۋريستەردىڭ كوبى اقتوبەگە ىسكەرلىك ساپارمەن كەلەدى
اقتوبە وبلىسىنىڭ اكىمى بەردىبەك ساپاربايەۆ تۋريستىك الەۋەتتى ارتتىرۋ جۇمىسىنىڭ جوسپارىمەن تانىستى. ءارى جول بويىنداعى قىزمەت كورسەتۋ ورتالىقتارىنىڭ قۇرىلىسى، ساپاسى تالقىلاندى.
وبلىستىق كاسىپكەرلىك باسقارماسىنىڭ باسشىسى انار دارجانوۆانىڭ ايتۋىنشا، العاشقى جارتى جىلدىقتا قوناق ۇيلەر مەن حوستەلدەردە 54 مىڭ مەيمان تىركەلگەن. بۇل 2017-جىلدىڭ سايكەس كەزەڭىندەگى كورسەتكىشتەن %16,6 كوپ. دەگەنمەن تۋريزمدە ىسكەرلىك ساپارلار باسىم. مادەني، تاريحي مۇرامەن تانىسۋعا كەلۋشىلەر قاتارى از.
«وكىنىشكە قاراي، ءبىزدىڭ وبلىستىڭ تۋريستىك الەۋەتى بۇگىندە تولىق مولشەردە قولدانىلىپ جاتقان جوق. مارتوك، قوبدا، ىرعىز، بايعانين اۋداندارىنىڭ كەلەشەگى بار. ەگەر دە ولاردىڭ كورىكتى جەرلەرىن دارىپتەسەك، كەلۋشىلەر از بولمايدى»، - دەدى بەردىبەك ساپاربايەۆ.
تۋريزمدى دامىتۋعا قىزمەتتەر ساپاسى مەن قىزمەت كورسەتۋ مادەنيەتىنىڭ تومەندىگى دە كەدەرگى بولىپ تۇر.
«قىزمەت كورسەتۋ مادەنيەتى ءالى دە جاقسارتۋدى تالاپ ەتەدى. بۇل ماسەلە ءىس جۇزىندە نولدىك دەڭگەيدە. قىزمەتكەرلەردى ادەپتىلىككە ۇيرەتۋ كەرەك. بىزدە توقساننان استام قوناق ءۇي مەن مەيمانحانا بار. ءبىراق جازىلعان پىكىرلەرگە قاراساق، ولاردىڭ ءبىر دە بىرەۋىندە نە قىزمەتتەر، نە جاقسى نومىرلەر، نە ءجوندى تاماقتار جوق ەكەن»، - دەدى وبلىس اكىمى.
جيىن كەزىندە تۋريستەردىڭ وبلىسقا كەلۋىن ارتتىرۋدا جول بويىنداعى قىزمەت كورسەتۋدى دامىتۋدىڭ ماڭىزدىلىعى اتاپ ءوتىلدى.
«ءتيىستى ينفراقۇرىلىمنىڭ بولماۋى - تۋريزمدى تەجەيتىن باستى پروبلەمالاردىڭ ءبىرى. ءبىز جولداردى كوبىرەك سالىپ جاتىرمىز، ءبىراق جول بويىندا قىزمەت كورسەتەتىن نىسانداردىڭ جارتىسى ستاندارتتارعا ساي ەمەس. «اقتوبە - اتىراۋ» جولىن قايتا سالۋ باستالعان كەزدە جول بويىندا قىزمەت كورسەتۋ نىساندارىن قاتار سالۋ تاپسىرىلعان بولاتىن. الايدا بۇل جۇمىس ول جاقتا ءالى كۇنگە دەيىن جۇرگىزىلىپ جاتقان جوق. ال بۇل كىرىس كوزى، جاڭا جۇمىس ورىندارى ەمەس پە»، - دەدى ءوڭىر باسشىسى.
وبلىس اكىمىنىڭ باسپا ءسوز قىزمەتىنىڭ حابارلاۋىنشا، جيىن كەزىندە بارلىق باعىتتار بويىنشا جۇمىستاردى جاقسارتۋ تاپسىرىلدى.
