كۇزدە اعزادا قانداي وزگەرىستەر بولادى؟

 استانا. قازاقپارات - كۇزدىڭ العاشقى ايى دا ورتاسىنا جەتىپ كالدى. قازىر تابيعاتتا كۇن قىسقارۋى، اۋا قىزۋىنىڭ قۇبىلۋى سەكىلدى وزگەرىستەر ءجۇرىپ جاتىر.

وسىعان وراي اعزاداعى ىشكى بيولوگيالىق ىرعاق تا وزگەرۋدە. بۇگىندە اعزانىڭ ىشكى بيولوگيالىق ىرعاعى سىرتقى تابيعي ىرعاققا بەيىمدەلۋگە ارەكەت جاساپ جاتىر. سىرتقى وزگەرىستەر اعزاعا كۇيزەلىس اكەلەدى. نەگىزى سالدارىنان دەنساۋلىعىندا كىناراتى بار ادامداردا ومىرلىك قۋات ازايا تۇسەدى. بۇدان تەز شارشاۋ، كوڭىل- كۇيدىڭ ناشارلاۋى، كەيدە سەبەپسىز قۇلازۋ تۋىندايدى. ءبىر قىزىعى، بۇل كەزدە ادامدا مي جۇمىسىنىڭ بەلسەندىلىگى ارتا باستايدى. ءبىراق ول دەپرەسسيا تۋىنداتادى.

بۇل كۇندىزگى ۋاقىتتىڭ ءبىرشاما قىسقارۋىنا بايلانىستى، ول مەلاتونين گورمونى ءتۇزىلۋىن تومەندەتەدى. مۇندايدا تازا اۋادا ءجيى سەرۋەندەگەن ءجون. جارىق جاقسى تۇسەتىن جەرلەردە كوبىرەك بولعان ابزال. جالبىز، ۆالەريانا سياقتى جۇيكەنى تىنىشتاندىراتىن تۇنبالار ءىشىپ تۇرعان جاقسى.

كۇزگە قاراي تەرى استىنا ماي جينالا باستايدى. بۇل دا اعزانىڭ قىسقا دايىندالۋىنا بايلانىستى تابيعي قۇبىلىس. دەگەنمەن بۇل كەزدە اسقازان- ىشەك دۇرىس جۇمىس ىستەيدى. سوندىقتان ىشەك بەلسەندىلىگى جىلدام ارتا باستايدى، اسقازان جانە ىشەك ءسولى كوپتەپ بولىنەدى. ولار اس قورىتۋ جولدارىنىڭ كىلەگەي قاباتىن تىتىركەندىرەدى. بۇدان اسقازان- ىشەك جولىندا كىناراتى بارلاردا اۋرۋدىڭ اسقىنۋى تۋىندايدى. ال مۇنداي بولماس ءۇشىن اسقازان- ىشەكتىڭ كىلەگەي قاباتىن تىتىركەندىرەتىن ازىقتاردان (چيپسى، تۇزدى دامدەر، گازدى سۋسىن، الكوگول، ت. س. س. ) اۋلاق جۇرگەن دۇرىس. اسقا دامدەۋىشتى بارىنشا از قوسقان ابزال. ونى ءپىسىرىپ، بۋلاپ، بۇقتىرىپ جەگەن جاقسى.

تىتىركەنۋدى باساتىن ءشوپ شاي (تۇيمەداق، زۆەروبوي، ت. ب. ) ءىشىپ، اسقازان سازعاندا ءانتيتسيدتى پرەپاراتتار ىشكەن جاقسى. كۇزدە اعزا جۇمىسى وزگەرۋىنە قاراي قان قىسىمى دا كوتەرىلە تۇسەدى، ودان جۇرەككە، ونىڭ بۇلشىق ەتتەرىنە سالماق ارتادى. سوندىقتان بۇل كەزدە قان قىسىمىن دا قاداعالاۋ كەرەك. ەگەر قىسىم قالىپ شەگىنە جەتىپ كەلە جاتسا، وندا ءزار قۋاتىن، جۇرەككە جەڭىلدىك بەرەتىن دارمەكتەردى قولدانعان ءجون (ارينە، دارىگەر كەڭەسىمەن) .

بۇل كەزدە وكپەگە دە وڭاي ەمەس. ونىڭ جۇمىسى كۇشەيەدى: تىنىس الۋ جيىلەيدى، گاز الماسۋى ارتادى. وعان وتتەگى كوبىرەك كەرەك. وكپەنىڭ، تىنىس جولدارىنىڭ جۇمىسى ارتۋ سوزىلمالى تىنىس جولدارى كىناراتتارىنىڭ قابىنۋىنا الىپ بارادى. ادام ءجيى سۋىقتايدى. ويتكەنى يممۋنيتەت تومەندەپ جاتىر، ونىڭ ۇستىنە ادام كوپشىلىك جينالعان جابىق عيماراتتاردا ءجيى بولادى. اۋا تەمپەراتۋراسى تومەندەگەننەن- اق اعزاعا قاجەتتى كالوريا 5 پايىزعا ارتادى. دەنە قىزۋىن قالىپتا ۇستاۋ ءۇشىن تەرى استىنا ماي تۇزىلە باستايدى، ول قاجەتتى دەڭگەيگە قالىڭدايدى.

 اۋا قۋاتى جىلۋ تۇزۋگە كوبىرەك باعىتتالادى. كومىرسۋلار ازايىپ، ماي كوبەيە باستايدى. اعزادان زارمەن بىرگە سۋدى ەرىتەتىن س، ا، ۆ2 ۆدارۋمەندەرى كوبىرەك شىعادى، ەسەسىنە مايدا ەريتىن ا، د، ە دارۋمەندەرى كوبەيەدى. سوندىقتان بالعىن كوكونىس، جەمىس- جيدەكتى كوبىرەك جەگەن ءجون. دارىگەرمەن كەڭەسىپ، دارۋمەندەر كەشەنىن قابىلداعان جاقسى.

 zamana.kz