قاندى تاڭەرتەڭ تاپسىرۋ مىندەتتى مە؟

 استانا. قازاقپارات -  اناليز تاپسىرۋدى جاعىمسىز ەتەتىن ارەكەتتەردىڭ ءبىرى -  تاڭەرتەڭ ەرتەمەن ۇيقىدان تۇرىپ، ەمحاناعا بارۋ. كەيدە ءتىپتى، تاڭعى اس ىشۋگە دە بولمايتىنىن ەسكەرتەدى.

اناليز تاپسىرۋ تۋرالى كەي سۇراقتارعا جاۋاپ بەرەمىز. نەلىكتەن ءاناليزدى تەك تاڭەرتەڭ قابىلدايدى؟ قانداعى ەريتروتسيتتەر، لەيكوتسيتتەر، ترومبوتسيتتەر جانە باسقا دا كەي گورمونداردىڭ دەڭگەيى كۇنى بويىنا وزگەرىسكە ۇشىرايدى. سوندىقتان، تاڭەرتەڭ مەن كەشكە الىنعان ءبىر ءاناليزدىڭ ناتيجەلەرى ءارتۇرلى بولىپ شىعادى. ولاردى سالىستىرۋ دارىگەرگە قيىنعا سوعادى. سونىمەن قاتار، كەي زەرتتەۋدى جاڭا بيوماتەريالدا وتكىزۋ كەرەك. مىسالى، قان 4-6 ساعاتتان ارتىق ساقتالماۋى ءتيىس بولادى. سوندىقتان، اناليز تاڭەرتەڭ تۇسكەن كەزدە زەرتحاناشى ۇلگىنىڭ بۇزىلماعانىنا سەنىمدى بولادى.

جەكە زەرتحانالار ءاناليزدى كۇنى بويى قابىلداي بەرەدى. الايدا، ءبىر ءاناليزدى بىرنەشە رەت تاپسىرۋ كەرەك بولسا، زەرتحاناعا كۇندە ءبىر ۋاقىتتا كەلگەن ءجون.

اش بولۋ مىندەتتى مە؟ ول اناليز تۇرىنە بايلانىستى. كەي اناليزدەرگە تاماق اسەر ەتپەيدى. ءبىراق قان تاپسىراردا مايلى تاماق جەمەگەن ءجون. ول قاندى بىرنەشە ساعاتقا بۇلدىر ەتەدى.

بريتانيالىق جانە امەريكالىق عالىمدار اناليز تاپسىرار الدىندا اش بولۋ مىندەتتى ەمەس ەكەنىن ايتادى. ولاردىڭ ويىنشا، ناتيجەگە تەك ءتاتتى جانە مايلى تاماق اسەر ەتۋى مۇمكىن. ءبىراق كوپتەگەن ەمحانالاردا ەرەجە ورناتىلعان: اناليزدى اش قارىنعا تاپسىرۋ كەرەك. باسقا نە ىستەۋگە بولمايدى؟

اناليز تاپسىرار الدىندا تەمەكى تارتۋعا، سۋدان باسقا نارسە ىشۋگە، ساعىز شايناۋعا، سپورتپەن اينالىسۋعا جانە كەي دارىلەر مەن ب ب ق (بيولوگيالىق بەلسەندى قوسپا) قابىلداۋعا بولمايدى. مۇنىڭ بارلىعى ناتيجەگە اسەر ەتەدى.

قان تاپسىرۋ كەزىندە اۋرۋ جۇقتىرىپ الۋ مۇمكىن بە؟

جوق. ەگەر ەمحانادا ءبىر رەتتىك قولعاپ قولدانباسا نەمەسە قۇرالدار بارلىق ەرەجە بويىنشا زارارسىزداندىرىلعان بولماسا، ونىڭ ليتسەنزياسىن تارتىپ الادى.

Massaget.kz