بەيسەن قۇرانبەك: التى جىل قاربالاسپەن ءجۇرىپ، جاقىندارىمنىڭ كوڭىلىن قالدىردىم
التى جىل بويى (العاشقىدا «ايتۋعا وڭاي»، ودان بەرىدە «قارەكەت») باعدارلامانى جۇرگىزگەن بەيسەن قۇرانبەكتىڭ تىزگىندى وزگە ارىپتەستەرىنە ۇستاتۋى قوعامدا قىزۋ تالقىعا ءتۇستى، دەپ جازادى Stan.kz ءتىلشىسى.
ءار كەشتە كوگىلدىر ەكرانعا تەلمىرىپ، تەلەجۇرگىزۋشىنى جاقىنىنداي كورىپ كەتكەن حالىق «بەيسەن قۇرانبەكتى قايتارىڭدار» دەپ دابىل قاعۋدا.
بۇل ورايدا تەلەجۇرگىزۋشى كوپتىڭ كوكەيىندەگى ساۋالدارعا جاۋاپ بەرىپ، التى جىل ءومىرىنىڭ ارپالىسپەن وتكەنىن، وسى ۋاقىت ارالىعىندا جاقىندارىنا كوڭىل بولە الماعانىن ايتتى.
«التى جىلىم ارپالىسپەن ءوتىپتى... اپتاسىنا ءبىر حابار جاساۋدىڭ ءوزى وڭاي ەمەستىگىن تەلەارنانىڭ اينالاسىندا جۇرگەن ادامدار جاقسى بىلەدى. ال 4-5 حابار دەگەنىڭىز، بۇل - دەنەگە دە، جۇيكەگە دە اۋىر سالماق. ونىڭ ۇستىنە قيىن تاعدىرلار تۋرالى قينالماي ايتۋ جۇرەگى بار ادامعا مۇمكىن ەمەس»، - دەيدى تەلەجۇلدىز.
قۇرانبەكتىڭ ايتۋىنشا، باعدارلامانى ءارى قاراي دا سول قالىپتا جالعاستىرا بەرۋگە بولار ەدى. الايدا تەلەجۇرگىزۋشى دە، باعدارلاما اۆتورلارى دا وزگە دە ماڭىزدى جايتتارعا نازار اۋدارۋ كەرەكتىگىن، وزگەرىس كەرەكتىگىن تۇسىنگەن.
تەلەجۇرگىزۋشى بۇل جولى تەلەەفيردەگى جاڭالىقتار جايلى ايتقىسى كەلمەيتىنىن، تەك جاقىندارىنان كەشىرىم سۇراعىسى كەلەتىنىن جەتكىزدى.
«قاربالاسپەن ءجۇرىپ، تالاي جاقىن ادامىمنىڭ، دوستاردىڭ، تۋىستاردىڭ، تانىستاردىڭ كوڭىلىن قالدىردىم. قۋانىشىنا بارا المادىم، قايعىدا قاسىندا بولا المادىم، ءتىپتى تۋعان كۇندەرىندە قانشا ادامعا تەلەفون دا شالمادىم... قازىر ويلاپ وتىرسام، سونىڭ بارىندە ءوزىمدى «جۇمىستان قول بوساماي جاتىر عوي» دەپ اقتاپ الىپپىن. كوڭىل دەيتىن وتە نازىك، ادام دەگەن وتە قىمبات، ءومىر دەگەن وتە قىسقا دۇنيە ەكەنىن ۇمىتا جازداپپىن... كەشىرىڭىزدەر»، - دەپ جازدى ول.
